البارانويا | إضطراب الشخصية الزوراني
كتبت: منه زين
السلام عليكم… بدون ذكر أسماء…
أنا جايه أحكي قصتي وهمشي…
ماحدش هنا يعرفني وانا مش عايزه حد يعرفني… أنا بس عايزه اتخلص من العبء اللي انا شايلاه فوق دماغي…
عبء مش عارفه اتخلص منه بقالي سنين… بقالي سنين بشوف اللي حواليا بالمعنى الحرفي شياطين… رغم إن المنطق بيكدب شعوري…
لكن مافيش حاجة هتغير شعوري…
من زمان وانا بيتقال عليا شخص عدواني وصعب التعامل معاه… سواء في المرحلة التعليمية أو حياتي الاجتماعية والعاطفية الأفشل من بعض…
مش عشان انا فاشله… ده عشان هم وحشين! هم السبب.
ما هو مش معقول هطلع كل مره غلط، صح!
البارانويا … !
أنا عايزه أحس بالأمان…
انا مفتقدة الأمان في حياتي… دايما متأهبة لأي حدث… دايما حاسه بالخطر…
إن الشخص ده بيتربص بيا… وإن البنت دي بتحسدني ومش بتحب لي الخير…
إن الأستاذ اللي اشتكى من مستوايا مستقصدني عشان شايفني أذكى منه… وإن الطالبة دي بتغير مني عشان أنا أشطر منها.
على طول كنت بتجنب النشاطات الاجتماعية خوفا من إن حد ممكن يسرق مجهودي…
دايما كنت كل ما اتخطب أشك إن الشخص ده مش هيوفر لي أمان بالقدر اللي انا محتاجاه وإنه خاين وماعندهوش ولاء…
طب هو ايه قدر الأمان الكافي بالنسبة لي أساسا؟
وهيتحقق ف يوم من الأيام ولا لأ؟
بجد انا بكتب رسالتي هنا وانا تعبانة جدا…
أنا طول الوقت عصبية نتيجة للخوف اللي حاسه بيه… بقيت في معزل عن العالم بسبب إن ماحدش طايقني… أو انا اللي مش طايقة حد…
دايما في حالة دفاع عن النفس وحتى المقالات اللي بكتبها أسبوعيا على البلوج بتاعي مابتقبلش نقد حد عليها لدرجة إني ممكن أخش جدال مع واحد من الفانز بتوعي واخسره… لمجرد إنه ماعجبهوش شيء معين وبيذكر رأيه…
أنا رافضة أي نوع من أنواع التطور لمجرد إن غيري بيفرضه عليا…
دايما بحاول أمسك أي حاجه على أي حد عشان اعرف استغلها ضده بعدين…
ودايما بحاول أعتمد على نفسي عشان مش عايزه أبدا أذل نفسي لحد من اللي انا بستحقرهم دول… أنا مافيش حد مابستحقرهوش تقريبا… أنا آخر واحد تتوقع يطلب منك شربة مياه لو هيموت من العطش…
أتمنى أبويا وأمي يكونوا مبسوطين من النتيجة اللي أنا فيها دي دلوقتي… اللي هم سبب فيها… وهم أكتر ناس بيلوموني على شخصيتي دلوقتي…
أنا بسببهم فقدت الأمان للأبد وكرهت البشر كلهم والوضع مش هين…
لو فاكر إن ده سهل عليا… فانت ماتعرفش حاجه… انا في عذاب ومتاهات لا ليهم اول ولا آخر…
جيت ارميلك قصتي زي ما قلت في البداية وماشيه… مع السلامة
شكرًا على الرسالة، صديقتي…
أنا حابه أقولك إن انتي مش لوحدك وإن فعلا معاناتك مش سهلة وماحدش هنا أبدا هيستخف باللي قلتيه…
انتي اخترتي المكان الصح اللي ترمي فيه حكايتك…
وأنا هرد عليكي بالقدر اللي يكفيكي بإذن الله وزيادة إنك تاخدي خطوة من خطوات العلاج النفسي.
علاج نفسي ؟!
أيوه، إنتي بتعاني من اضطراب نفسي اسمه اضطراب الشخصية المرتابة
(PPD: Paranoid personality disorder)
واحد من العشر إضطرابات نفسية المتعارف عليهم وبيتصنف ضمن المجموعة أ أو cluster A
المجموعة أ بتضم 3 اضطرابات شخصية:
- اضطراب الشخصية المرتابة Paranoid personality disorder (موضوعنا)
- اضطراب الشخصية الفصامية Schizotypal personality disorder
- اضطراب الشخصية الفصامانية schizoid personality disorder
هشرح لك الفرق بين آخر اتنين لما نخلص موضوعنا الأساسي…
اللي هو البارانويا أو Paranoid personality disorder
وبيكون مصاحب ليه الأعراض اللي انتي بشكل غير مباشر شرحتيها… زي انك دايما مش حاسه بالأمان وفي وضع defensive مش قادرة تطلعي منه وده مأثر على علاقاتك باللي حواليكي…
ده إجمالا…
تفصيلا صديقتي العزيزة:
- انتي بتحسي بالشك طول الوقت
- قلق شديد
- تأهب نتيجة لخوفك من نية الناس حواليكي تجاهك
- عدوانية نتيجة لترجمتك الخاطئة لسلوك الآخرين معاكي… دايما أسلوبك فيه تهديد وسخرية من الآخرين…
- قلتي انك بتخافي تشتركي في نشاطات اجتماعية عشان خايفة حد يسرق مجهودك وده إن دل فيدل على إن درجة الحذر عندك مرضية لدرجة إنك تجنبتي جزء انساني جميل زي التعاون واكتساب مهارات اجتماعية من التجارب الاجتماعية اللي زي دي… فرص بتضيع اهو
- ضعف مهاراتك الاجتماعية وخوفك المستمر وشعورك بالخطر خلاكي حاسه بالوحدة او خلاكي تحسي إن الوحدة هي أفضل اختيار عشان تتجنبي المشاكل… بقيتي عايشه في قوقعة منفصلة تماما عن الواقع ده بنسميه (dissociation)
- قلتي انك ماعندكيش تقبل الرأي والرأي الآخر
- نرجسية جدا وكلامك فيه استعلاء وطبيعي تحسي كده لأن شعورك الدائم إنك عايزه تحمي نفسك خلاكي تشوفي نفسك جامده ومافيش زيك علشان ماحدش يقدر يستغل ضعفك مثلا ضدك… اللي عندك ده بيتسمى “megalomania أو جنون العظمة” وبيتعالج… على الأقل تطلعي من ال toxic stage اللي انتي فيها ونوصل بيكي لبر الأمان…
- بتتهمي الناس علنا إنهم خونة وماعندهمش ولاء رغم إنك لم تشقي عن صدر أحد وماصدرش من أي شخص حواليكي طول الفترة اللي فاتت أي تصرف يوحي بإنه شخص وحش زي ما انتي شايفاه … كل شيء عندك بيتبرر بكلمة “ما يمكن” … لا مش يمكن… ده أكيد… :””””””””
بهزر معاكي…
- مين اللي مبوظ سمعته ايفري وير وع البلوج بتاعه بسبب جدالاته اللي بتخسره الفانز بتوعه مييييين! أيوه اضحكي كده هتفرج بإذن الله…
- وطبيعي شخص زيك يبقى بيتعصب بسرعة وحساس لأي موقف…
كل ده أسبابه إنتي وضحتيها في سطر… إن والدك ووالدتك هم السبب في تواجد عقدة زي دي عندك لفترات طويلة… ولولا إنك نشرتي رسالتك بيننا هنا ماكناش قدرنا نوصلك إنك محتاجة علاج وإن انتي أساسا متشخصة باضطراب الشخصية المرتابة…
غيرك كتير اتواصل معانا… انتي مش لوحدك زي ما قلت لك… وفي منهم خضع للعلاج وبقى كويس بفضل الله…
في ناس اسبابهم كانت مختلفة عن اسبابك… امسكي المنديل ده وامسحي دموعك كده وقربي كرسيكي انا مابعضش…
وتعالي أديكي فكرة عن الأسباب دي، هاتي صوابعك الحلوين دول عشان نعد مع بعض:
- جينات وراثية، في ناس كان سببهم الوحيد إن جدهم لأمهم ولا خالهم مثلا عندهم مشكلة ذهنية واتورثت لهم.
- وفي ناس اتعرضوا للخذلان بشكل متتالي أو حتى مرة كانت بألف مرة… ده أثر عليهم وعلى سلوكهم وبالتالي علاقاتهم باللي حواليهم… في اللي عنده تفكك أسري وفي اللي اتعرضت للاغتصاب ومالقيتش الدعم من أهلها… في اللي اتخدعت في صديقة عمرها… وفي اللي سرق مال أخوه وعايش حياته عادي دلوقتي بعيد عنه وبيتمتع بفلوسه… كل دول أمثلة وانتي منهم…
طب العمل؟
هبعتلك عالخاص رقم دكتور نفسي شاطر قوي تتعاملي معاه… وعلشان ماتروحيش مش فاهمه حاجه خالص عن طريقة العلاج وتبقي قلقانه وانتي مش ناقصه… هديكي فكرة العلاج بيبقى شكله ايه بعد التشخيص… أيوه انتي هيتم إعادة تشخيصك بإذن الله… وماتقلقيش بنسبة 100% كلامي صح… :”””” ايوه انتي فاكره ان انتي الوحيدة اللي نرجسية ولا ايه!
بصي يا ست الكل…
طريقة علاج البارانويا كالآتي:
بعد التشخيص انتي ممكن تخضعي للعلاج السلوكي المعرفي… هتقعدي تتكلمي مع الدكتور وتفضفضي… هتقوليله كل اللي في الرسالة ده وزيادة… لأن كل ما التفاصيل بتكتر كل ما فرصة انك تتعالجي بتبقى أدق وفعالة أكتر…
هو بناءا على كلامك هيديكي إرشادات هتاخدي بالك منها وتنفذيها بالحرف… وبالتدريج وواحده واحده… علشان مافيش تغيير بيحصل في يوم وليلة…
لو لقيتي روشته ودواء ماتصوتيش وتقولي “هيسمني” ولا “هيموتني منتحرة” علشان هو فاهم شغله كويس وعارف الجرعات اللي هيمشي بيها معاكي وهيدرجهالك ولو عندك أي مرض مزمن عرفيه علشان الأعراض الجانبية ماتمسكيش بسوء… والعياذ بالله
ماتخافيش كده… اهدي…
الأدوية اللي هتاخديها دي عبارة عن مضادات اكتئاب antidepressants ومضادات للقلق antianxiety على سبيل المثال… بيخففوا من حدة القلق والتوتر اللي انتي حاسه بيهم معظم الوقت… الدكتور النفسي لعبته “السيروتونين” وده هرمون وناقل عصبي في حين لو لسه لأول مره بتتعرفي عليه… بيلعب على المزاج… بيشقلب حاله…
ده الحشيش بتاعك… يعني لما حد بيسألك بتحششي ولا لا وايه السواد اللي تحت عيونك ده! ما تتردديش وقولي أيوه بحشش… :”””””” احنا هنخاف ولا ايه! حد ليه عندنا حاجه!
بإذن الله هتبقي كويسه وأتمنى ليكي وكل المرضى النفسيين في العالم كله وأنا من ضمنهم الشفاء… مع السلامة.
هاشرح لك الفرق بين اضطراب الشخصية الفصامية “schizotypal personality disorder” واضطراب الشخصية الفصامانية “schizoid personality disorder”… أيوه والله هو اسمه كده.
ايه الفرق بقى؟
الفرق كبير… رغم ان الأسماء تبدو متماثلة…
اضطراب الشخصية الفصامية:
بيحس الشخص فيه إنه فقد الرغبة في الاختلاط بالناس… فقدان الرغبة مش القدرة وناخد بالنا من الفرق هنا… شخص بيتسم بالبرود … ده علشان مابيقدرش يعبر عن مشاعره بشكل واضح… مابيتفاعلش معاك لا ساعة الحزن ولا ساعة السعادة… وبالتالي ماعندهوش القدرة حتى انه يستمتع بأي شيء … مابيحبش شيء… ماعندهوش حاجة مفضلة… ماعندهوش خبرات اجتماعية… أكيد انتي فاهمه ليه… فده باختصار صفات الشخص اللي عنده اضطراب الشخصية الفصامية…
نيجي بقى لاضطراب الشخصية الفصامانية:
اسمها غريب قوي بجد بحبها بالانجلش اكتر :”””
هنا الشخص بيتسم بالغرابة … في سلوكه ومظهره وبيجيله هلاوس سمعية بيعاني من القلق الاجتماعي وبيتشتت في انه يستمر في علاقاته ولا لا وبينتهي الموضوع بيه بالانسحاب… عشان هو مش قادر ي maintain علاقاته بالناس وي cope معاهم بشكل طبيعي… عنده لامبالاة رهيبة بالأحداث اللي بتحصل حواليه ده مش dissociation مش انفصال عن الواقع لا… هو فاهم ايه اللي بيحصل بس مش فارق معاه… عنده اعتقاد انه صاحب قدرات فائقة… زي انه بيقرأ الأفكار أو عنده القدرة على تغيير الواقع… ال becoming hero للعالم… أو ال villain أيهما أقرب المهم انه مؤمن إن أي حد أو أي Impulse من أي حد سببها هو… هو المؤثر الوحيد…
حاسس إن العالم عمال يبعتله ف شفرات وماحدش هيقدر يترجمها غيره وإن العالم في انتظاره… خيالي بشكل توكسيك… وأكتر شخص بيتفاعل مع الاحداث بشكل خاطئ… جدته لسه متوفية وهو واقف يضحك ضحك هستيري بدون سبب… هو مش مبسوط ومش بيكرهها… هو تعبان ومحتاج حد يفهمه انه تعبان عشان يتعالج ويبقى كويس وسوي نفسيا مش اكتر…
الفرق بين الاتنين في حوار التفاعل مع المواقف… إن واحد بيتفاعل بس بيتفاعل غلط… الموقف حصل وهو اتفاعل معاه بس بشكل خاطئ… وده في اضطراب الشخصية الفصامانية… أما التاني الموقف حصل وهو ما تفاعلش معاه نهائي…
بإذن الله الرسالة الجايه تكتبيها وانتي في أفضل حال…
إلى كل أخوتي في كل مكان… دمتم سالمين
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
