تأسيس الأطفال فى الكتابة بطرق علمية صحيحة
كتبت : وفاء أبو النجا
طبعا كلنا عارفين أن أصعب فترة في الكتابة هي البداية أن الطفل يتعرف على البداية للأشكال والصور والحروف علشان كدة هاقدملك شوية النصايح دى للطفل من سن ثلاث سنوات
أولا : تدريبات لتقوية عضلة الأيد
1- فتح وغلق زجاجات المياه
يعني هاتي كام أزازة وخلي ابنك يلعب بيهم يفتح ويقفل في الأول خليها سهلة الفتح وبعدين جمدى الغطا شوية اكتر
2- اللعب بالمشابك
طبعا كل بيت فيه مشابك ايوه مشابك الغسيل هاتي طبق حلو كده حرفه رفيع وخلي طفلك يشبك الطبق بالمشبك ويشلهم ويشبكهم تاني
3- سوستة الملابس و وأزرار القميص ومقبض الباب
خلي ابنك حبيبك قره عينك يفتح ويقفل فيهم التمارين دى مهمة جدا قبل الكتابة
4- اللعب بالمكعبات
اللعب بالمكعبات مسلي جدا للأطفال فيه نوع من الأبداع انه يشكل بيت أو تمثال أو شخصيات كرتونية
هاتيله رسومات ( حيوانات – خضروات – لفاكهه ، …. )
وخليه يتعرف علي الأشكال ويعرف كل حاجة اسمها إيه ولونها إيه
علشان لما يدخل في المرحلة الثالثة يعرف الشكل دا أسمه أيه ولونه ايه
ثالثا : الخطوة الثالثة وهي مسكة القلم
هاتي كراسة وارسمي أشكال زى
(مثلثات – مربعات – دوائر- مستطيلات – سطور مموجة – حيوانات )
بس بالنقط ، وخلي ابنك يوصل النقط لحد ما يكون الشكل.
طبعا كل خطوة بتاخد فترة متستعجليش ، اسسيه كويس علشان مايحسش بملل ويرتاح بعدين.
رابعا : ربط الشكل بالكلمة
هاتي بعض الصور زى
(ولد – بنت – شجرة – تفاحة – كرسي – قطة – حصان – … )
حتي لو ترسميهم انتي
وشجعي ابنك وخليه يعرف الصورة ويوصل الصور المرتبطة ببعض أو ليهم علاقة ببعض.
خامسا : تدريبات التلوين
طبعا فيه كتب تلوين كتير ورسومات شيقة …
هاتي رسومات تكون كبيرة ووضحة ، لأن الهدف من التلوين إن الطفل يتحكم في مسكة القلم
في البداية هيطلع برة الرسمة ، وهنا دورك .. شجعيه وساعدية أنه يلون جوه الرسمة بس، واكتر تشجيع أنك تلزقي الصور اللي لونها علي الحيطة ، ووريه إنك
بتحبيها وانك بتفتخري بيها.
سادسا : التعامل مع الحروف
خلاص قوينا عضلة اليد وإبنك اتعرف علي الخضروات والفاكهة والحيوانات واشكال كتير
نيجي للكتابة …
في طرق بتخلي ابنك يحفظ الحرف بسهولة زي ايه …
أسهل الطرق للكتابة وحفظ شكل الحرف اللعب بالصلصال
كتابة الحرف على ورقة والطفل يكتب الحرف بالصلصال فوق الورقة
اللعبة دى بتكون جميلة جدا وممتعة بالنسبة للطفل
كتابة الحروف على الرمال
تلعب الأم مع الطفل هي تقوله يكتب حرف وهو يقولها تكتب حرف على الرملة
وكل مجموعة حروف تقوم الأم بإملاء الطفل الحروف اللي اتعلمها بس من غير ترتيب
قص ولزق
وهو أن الطفل يقص حرف ويقوم بلزقة بكراسة الأنشطة
وبكده هيكون الطفل اتعلم معاكى الألوان والأشكال والحروف والكتابة بشكل جيد وبطرق ممتعة