دور الأب في الأسرة
كتبت: منه زين
في قرية من القرى البعيدة هتلاقي بنت بتكلم راجل الساعه 2 بليل على سطح بيتهم والناموس نازل تقريص فيها…
إذ فجأة تطب عليها أمها وفي ايدها شومة وتديها على دماغها…
مره والتانية… و”اعترفي يا بت مين ده…!!؟”
فتفاجأ الأم ان بنتها بتكلم واحد في سن أبوها وبتقولها انه سبب العز اللي هي فيه وان الهدايا دي كلها هو اللي جابها وانه بيعاملها كويس…
الام وقفت ساكته…
وبعدين كملت ضرب وندهت اخوها وابوها يضربوها ويحبسوها…
ونامت ضميرها بيأنبها لأنها عارفه ان جزء من القصة دي والد البنت متورط فيه… حيث إنه ماقدرش يقدم العطف والحنان ويكفي احتياجات ومتطلبات بنته كأي أب عادي…
على غرار قصة تانية حصلت في مدينة من المدن البعيدة بردو…
بنت بترفض العريس رفض تام بسبب ان طريقة كلامه مشابهة لطريقة كلام أبوها…
وأبوها ده شخص مش كويس لا معاها ولا مع والدتها… فاتكررت نفس الصورة الحاضرة في ذهنها بمجرد ثواني من سماعها لكلام هذا الشخص المتقدم لخطبتها…
واتكررت كلمة “لأ” فوق المليون مره وصريخ وعياط ودبدبة…
في الحالتين اللي فوق دول تقدر تقولي لو البنت القروية كانت كملت كلام مع اللي هي بتكلمه ده كان ممكن يحصلها ايه؟ او بطريقة أخرى كان هيبقى شكل العواقب ايه؟
والله كان ممكن الحال يوصل لتجارة نساء… أو أعضاء… وممكن يوصل لإنه يتجوزها وتخلف وتعيش تعيسة باقي عمرها ومذلولة بجملة “انتي ناسيه انتي كنتي ايه قبل ما اتجوزك!”
مافيش حاجه بتيجي ببلاش… كل شيء له مقابل… ولازم قبل ما تتورط تعرف ايه المقابل اللي انت هتاخده… اتفقنا؟ عشان قلة قليلة جدا اللي بتدي عطف وحنان وهدايا ببلاش…
هتقولي طب ما نبص للفئة دي…
بكل بساطة هرد اقولك ماينفعش لأن دي مسألة حظوظ وواجب عليك تجاه نفسك تكون حويط وتحافظ على نفسك من المكائد اللي ممكن تتحط فيها بمنطلقك الساذج…
بالنسبة للحالة التانية طيب؟
الحالة التانية لو كانت وافقت على الجواز وجوزها طلع وحش حسب توقعاتها عيشتها هتبقى سواد بالمعنى الحرفي…
ولو كان كويس… هو اللي عيشته هتبقى سواد لأنها مش هتبطل شك طول الوقت ومش هتبطل تتربص له وتصطاد له في أخطاء على الفاضي والمليان…
مستنياه يغلط وقاعده له بالكرباج… وهتوصل لحالة ان الرجالة كلهم وحشين… ومافيش راجل محترم فيكي يا دنيا…
وهتقعد تشتغلنا ندابة…
طب هل البنات دول هم السبب الرئيسي في اللي بيحصلهم؟
لأ طبعا… الأب دوره مؤثر جدا في حياة أولاده وزوجته… يا بالإيجاب يا بالسلب…
طب انتي قعدتي تضربي في أمثلة سلبية… قولي أي حاجه إيجابية طيب… ادي مثال للأب الحنين…
طب نضرب مثال أخير كمان
ولد لسه باباه متوفي ولما راح المدرسة لقى مدرس لغة عربية بيتكلم بنفس طريقة والده فحس انه ارتبط بيه كارتباط الابن بوالده وبقى يغير من ولاده ويغير من أي طالب تاني لما المدرس يثني عليه…
انت بتربط عيالك بيك من أول يوم بييجوا فيه لحد ما حد فيكم يموت… انت ممكن تكون متخيلك ان عيالك بعيد عنك… بس انت عايش في عيالك… في طباعهم… في ملامحهم… في قلبهم… حتى لو أثرك سلبي… أو سام…
اوعى تفتكر ان كل شيء خارج عن سيطرتك… كل شيء في ايدك انت…
سيدنا نوح عليه السلام حزن على ابنه الكافر لما مات غريق…
وسيدنا إبراهيم عليه السلام حزن على والده الكافر وكان بيستغفر له الله…
علاقة الأب بأبنائه وبزوجته هنا هي المحور الأساسي بتاع المقال…
لأن لو الأب ما بيحترمش زوجته أولاده مش هيحترموا زوجاتهم…
ولو الأب ما عاملش أولاده كويس… أولاده هيطلعوا مشوهين نفسيا ومتجاوزين…
أو نادرا ما تلاقي ولد كويس او بنت كويسه بيعوضوا الحنان اللي مش خدوه…
وعلى الرغم من المجتمع مركز مع الأم أكتر… تعمل ايه وماتعملش ايه… والأم عظيمة ودي حقيقة لا يمكن إنكارها…
إلا ان المجتمع تجاهل دور الأب الحقيقي وإنه الشق التاني من حديث النبي صلى الله عليه وسلم…
الأب مش مكنة فلوس…
ومش شغل بس…
الأب أمان لأولاده ولزوجته…
82% من الدراسات أكدت إن في علاقة قوية ما بين الأب وصحة أولاده العقلية والجسدية…
دور الأب بيساعد في تكوين علاقات اجتماعية وتوسيع دايرة معارف الطفل
وبالتالي تدريبه على التعامل مع مشاكل الحياة والخوض فيها بدل ما يخاف
كمان دعم الأب المستمر بيزود الثقة في النفس عند الأبناء وحفاظ الأب كمان على نفسه بيخليه قدوة لإبنه… يفتخر بيه طول العمر… أو يستحي من ذكر سيرته أمام الناس…
ده غير إن له تأثير كبير على حياة ابنه الزوجية واحترامه للجنس الآخر بشكل عام…
الأب والأم ليهم دور مهمين… مين قال ان الأم مش ملزمة تدعم أولادها وتعتني بيهم؟
أي خلل في أي جهة هيعمل عقد ومشاكل…
الأم لو نقص منها عنصر من العناصر اللي فوق هتبقى ام فاشلة
والأب كذلك…
الاتنين لازم يكونوا على وتيرة واحده عشان الأطفال ينشئوا تنشئة صحية…
انت مسئول عن جزء من الجيل اللي طالع… الموضوع مش اثبات قدرة ذكورية او أنثوية (قدرة الانجاب) والموضوع مش واجب عليك…
لو قد الخلفة هات عيال مش قد الخلفة وهتفقرهم وتفقر امهم مش فلوس بس ده دلال وحنان كمان…
يبقى تاخد بعضك انت وابوك والجاتوه وتسيب البنت لعريس تاني أحسن منك وقادر يربي جيل محترم من غير إهانة ومشاكل…
وزي ما عقوق الآباء كبيرة من الكبائر اللي ذكرت مع القتل والزنا وترك الصلاة
في عقوق للأبناء… اللي انت مسئول عنهم مسئولية كاملة… وهتحاسب عليها امام الله…
اتقوا الله في أولادكم
اتقوا الله في أولادكم
اتقوا الله في أولادكم
كيف يمكن تعليم الطلاب المسؤولية الاجتماعية - حجر الأساس لمجتمع أفضلفي الصف، يمكن للطلاب في الصف مناقشة القضايا الاجتماعية والأخلاقية، مثل الفقر والظلم، والتغير المناخي، هذا بالإضافة إلى أنه يمكنهم العمل على المشاريع المجتمعية مثل جمع التبرعات للجمعيات الخيرية أو مساعدة الأشخاص المحتاجين.
إقرأ الموضوع كاملا
مفهوم التربية الايجابية | كيف تربي طفلك تربية صحيحة؟التربية الإيجابية هي ما تبحث عنه كل أم؛ لتنشئ طفلها على أسس سليمة في بيئة صحية ويكون مستقبله مشرقًا، بينما إذا قامت الأم ببعض الأخطاء أثناء التربية سيتأثر الطفل بشكل سلبي وستترك ندوبًا كثيرة في شخصيته ومستقبله.
إقرأ الموضوع كاملا
الجمعيات الخيرية وأهدافها اتجاه المجتمعتنتشر العديد من الجمعيات الخيرية في جميع أنحاء العالم، وكثيرا ما يتم ذكر هذه الجمعيات عبر البرامج التلفزيونية وعبر وسائل التواصل الاجتماعي، ومن اسمها يستدل على أنها أنشأت لفعل الخير لذوي الاحتياجات المادية من الفقراء والمساكين.
إقرأ الموضوع كاملا
هل تعلم ما هو فضل بر الوالدين وثمرات ذلك في الدنيا والآخرةتعرف على فضل بر الوالدين، وأثر ذلك في الدنيا والآخرة، وتعرف على عقاب العاق لهما، وكيف يكون برهما بعد مماتهما، وكيف يكون البر قلبا وقالبا، كل هذه المعلومات ستجدها في هذا المقال.
إقرأ الموضوع كاملا
التعليم المنزلي | أساليب المذاكرة للطفل بطرق ذكية وفعالةظهرت العديد من الطرق التعليمية الحديثة مؤخرًا، وهو ما يزيد من إستيعاب الطفل للمعلومات، فإذا لم يستطع الطفل فهم المعلومة بطريقة معينة، يمكنه البحث على الإنترنت أو اليوتيوب؛ لكي يستطيع فهمها بشكل أفضل على عكس تقديم المعلومة بطريقة واحدة تقليدية.
إقرأ الموضوع كاملا
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
