قصيدة لا كبت للحرية

كلمات : سامح عبد الهادي

مكتوبة يوم 25 يناير 2011
تباعا لأحداث ثورة الحرية والكرامة فى مصر

يا ثورة هبى فى وش الظلم وبقوة نادى

وارفعى راية بلادنا فوق كل وادى

واطردى رموز الفساد بره بلادى

يا ثورة طهرى البلد من كل عادى

حياة كريمة وكرامة وحرية

حلم بيتحقق ما بقاش مجرد أمنية

العلم يرجع يرفرف فوق البيوت

والأمان يضلل عليك وعليا

مش عايزين رشوة وفساد

ولا عايزين ظلم واستعباد

ولا فيه واسطة تانى ولا محسوبية

احنا مش ضد الحكومة ولا ضد القانون

إحنا ضد الفساد اللى ملا كل العيون

ضد توريث البلد زى العبيد

واضطهاد وتعذيب وحقيقة متداريه

عايزين نسأل وزير بقاله ميت سنة

إنت عملت ايه فى الميت سنة ؟؟؟

عايزين نصرخ صرخة مكتومة منسية

مش عايزين كلام يوهمنا بأحلام وردية

خلاص انهارت كل الأسوار المحمية

زال القناع عن حكم الصخرة والوسية

والظلم اترفع عن كل الأمة العربية

آن الآوان يا صاحبى تجيب إيديك فى إديا

آن الآوان نصرخ وانت وهى

عايزين حياة كريمة

ولا مساس بالكرامة

ولا كبت للحرية

سامح عبد الهادى  25 يناير 2011