أنا قررت أتجوز صح
هاقولكو ليه
لما قالو ان الجواز مشروع خسران
تدفع عمرك ودم قلبك وتعيش فقران
وهم وغم ومسئولية وسجن كمان
وعيال تعيط وهيصة وشغل جنان
ولما خطبت قالولى توب قبل الآوان
بلاش تضيع نفسك زى ما ضعنا زمان
يابنى خسارة حرام دانت غلبان
هو انت لاقى تاكل لما تتجوز كمان ؟؟
احترت أنا .. مابقتش عارف أصدق مين
حسيت ان اخرى سراية المجانين
أفلسع البت وأبيع حب السنين
وللا أكمل بقلب جامد وأقول يامعين
ربنا يكرمنا جميعا .. قولوا آمين
أنا قلت مافيش غير فطومة .. هى اللى بتسلك اللعابيك
قلت الحقينى يا فطومة .. قالت شبيك لبيك
قلت أنا عقلى احتار …قالتلى أنا حاسة بيك
قلت عرفتى منين ؟؟ .. قالتلى الحب باين فى عنيك
اختار حبيبتك صح وامسك فيها باديك
وبعد الخطوبة فكر واتعامل بشكل شيك
أوزن أمورك صح ما تستعجلش الله يخليك
وخطط لكل حياتك دا العمر كله ليك
وأهم حاجة الثقة .. خليها تحافظ عليك
دى مراتك أكبر نعمة .. شيلها جوا عنيك
حبيبتك وأم عيالك .. أوفى وأجدع شريك
علشان كده قررت خلاص
ما أسمعش لتعقيد الناس
ولما أتجوز أختار صح
وأبنى صح من الاساس
علشان كده قررت أتجوز صح
وأعيش بحب وباخلاص
—
كلمات الشاعر : سامح عبد الهادى 24 مارس 2011
