Menu Close

علموا ولادنا السنادى | قصيدة عن التعليم

قصيدة : علمو ولادنا السنادي

قصيدة عن التعليم المتميز  باللهجة العامية المصرية

كتب : سامح عبد الهادي
علمو ولادنا
علمو ولادنا

انضم لكوكب المعرفة   تابع أشعار سامح عبد الهادي  

علمو ولادنا السنادى ..

يقدسوا حق الإله

يبنوا فى القلب ( الوطن )

ويبنوا فى الارض ( الحياة )

علموهم يحلموا ببكره البعيد

ويرسموا بإيدهم خطاه

علموهم ..

انهم طوق النجاه

انهم هم الأمل

للوطن المجروح اللى تاه

القضية .. هى هى

جيل جديد بيتولد

حالف يشيل المسئولية

علموه ازاى يصلح

ما يشتغلش عشان مهيّه

علموا ولادنا الأمانه

لجل لا يخونوا القضية

وإن العمل صلب العبادة

من غيره مافيش حريه

فهموا ولادنا …

ياعنى ايه كلمة ضمير

ازاى يكون الحق سايد

والعدل سيف مالوش كبير

كلموهم عن كلمة ( انسانيه )

وإزاى تدى وتسامح كتير

اكتبولهم فى الكتاب

ان الحلم مافيهوش مستحيل

غذوهم بالأمل

واغرسوا فيهم بذور الخير

درسولهم فى الكتاب معنى الإيمان

وحسسوهم بالأمان ..

إن الوطن ده ملكهم

وعشقه فى الروح والكيان

وان التمن كان دمهم

مدفوع عشانهم من زمان

عرفوهم ..

ان تراب الوطن غالى

ومابيشيلش خاين جبان

اكتبولهم فى التاريخ

اسم كل واحد شهيد

واحكولهم الحكاية

لما عشنا عصر العبيد

فهمومهم انهم لازم

يبنوا مستقبل جديد

اكتبولهم فى الحساب

إن الواحد .. دايما وحيد

وان القوة فى الجماعة

حاصل ضرب إيد فى ايد

علموا ولادنا الحياة

علموا الجيل الجديد

كلمات سامح عبد الهادى
جميع الحقوق محفوظة للمؤلف 

شاهد قصيدة علمو ولادنا السنادي فى التليفزيون

مقترح لك ...