السحر
كتبت: منه زين
السلام عليكم أتمنى الكل يكون بخير
موضوع النهارده مهم جدا وكان ولا زال محل شك بالنسبة لناس كتير…
مبدئيا خليني اسألك ايه مدى تصديقك بالسحر؟
عشان ما اقعدش أتكلم واسيبك لشكوك توديك وتجيبك…
فخليني أتكلم معاك شوية من جانب منطقي… اعتقد ان اللي بيقرأ لي شخص راشد وبيفكر كويس…
انت مؤمن صح؟
مؤمن ان في اله حتى لو اختلفنا فى العقيدة ، لكن المبدأ نفسه موجود …
وبعيدا عن الدين أو العقائد … فانت على الأقل مؤمن ان في نشاط او طاقة موجوده في العالم بتفوق قدراتنا…
انت مؤمن ان في غيب… أيا كان نوع الغيب ده…
سواء علم لم يكتشف بعد… او علم تم اكتشافه مسبقا واندفن…
يعنى متفقين وما تقدرش تنكر ان في ركن غيبي في العالم بتاعنا…
العلماء كل يوم بيكتشفوا علم جديد واحنا والكون في تطور مستمر وده إن دل على شيء فبيدل على إن في حاجات انت لسه ماتعرفهاش…
وانا عودتك وانت بتقرأ لي تقول “ليه لأ” بدل ما انت ماشي تكذب في كل شيء بدون دليل… وجملتك الوحيده “عمري ما هبقى على يقين بشئ غير مادي” وتسمح لي يعني أقولك انه منظور ساذج…
وطالما خلاص احنا اتفقنا ان في نشاط في العالم بتاعنا نشاط قوته تفوق القدرات البشرية العادية بتاعتنا… فخلينا نتفق إن جزء من النشاط ده بيتلخص في مسمى اسمه “السحر”
وخليني اقولك ان تعريف السحر في اللغة هو تجريد الشئ من حقيقته…
طب في الاصطلاح؟
كل شيء خفي… كل شيء ايه؟ خفي…
طب هل معنى انه خفي ما اصدقش بيه؟
ليه هو الخفي مش ممكن يبقى ليه تأثير عليك؟
انت ممكن تشعر بشئ خفي… انت بتشعر بالهواء وهو خفي… بتشعر بالرطوبة في المواسم الحارة… أنواع الجراثيم والفطريات اللي اكتشفوا لها علم مخصوص زمان كانت شيء خفي ولا زالت بس للعين المجرده مش تحت المجهر…
فالخفي محسوس… ولو مش محسوس لسه فهو موجود…
الكون ده كله مليان جزيئات وفوتونات الضوء او الطاقة المنبعثة المتحررة من فقد إلكترون والتاني مش مرئيين للبعض بس موجودين… وهم السبب في ظهور العالم بالترتيب ده…
يبقى لحد دلوقتي احنا قلنا ان السحر هو كل شيء خفي… بس كده؟
لا… انت الخفي ممكن يفيدك… شوية هوا هيحسسوك انك أخيرا بتتنفس بعد مشوار متعب مثلا… لكن ده خفي بشكل سلبي… خفي عشان يأذي… سواء يسبب لك انت الأذى أو يسببه لغيرك… حتى لو في أذية غيرك فايدة ليك…
يبقى هو كل شيء خفي غرضه الإيذاء والخداع…
والسحر أنواع وموجود في كل بلد… مشهور في الوسط العربي أكتر في المغرب ومصر
وده علشان الأمازيغ والفراعنة معروف قوتهم في السحر…
فانتشر في البلدين دول بناءا على الخلفية السابقة للمهرة في السحر من أجدادنا الفراعنة أو في بلد من بلاد الأمازيغ زي المغرب…
احنا اتكلمنا بالمنطق… طب انت مؤمن وعايز دليل من الكتاب والسنة عشان تستدل بيه على وجود السحر…
في سورة البقرة ربنا سبحانه وتعالى قال “وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ ۖ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ ۚ وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ ۚ وَلَقَدْ عَلِمُوا لَمَنِ اشْتَرَاهُ مَا لَهُ فِي الْآخِرَةِ مِنْ خَلَاقٍ ۚ وَلَبِئْسَ مَا شَرَوْا بِهِ أَنفُسَهُمْ ۚ لَوْ كَانُوا يَعْلَمُونَ”
طب في السنة؟
النبي صلى الله عليه وسلم اتسحر من رجل يهودي اسمه لبيد ابن الأعصم…
وقعد ست شهور يخيل له انه بيعمل الشئ وهو مابيعملهوش فدعا الله ثلاث أيام بلياليهم…
متخيل النبي صلى الله عليه وسلم بيدعي ربنا تلات أيام؟ وهو أعز عند الله مننا جميعا!
مبدئيا كون النبي كلم ربنا مباشرة بدون وسيط وهو سيدنا جبريل عليه السلام فده في حد ذاته عبرة للي بيروح يقول اتوسط لي عند ربنا واشفع لي عند ربنا … انت منك لربنا مباشرة مافيش اكتر من انه قالك “فإني قريب أجيب دعوة الداع إذا دعان”…
تاني حاجه النبي صلى الله عليه وسلم بيعلمنا نلح في الدعاء وما نيأسش…
نام النبي صلى الله عليه وسلم وشاف رؤية نبأه الله بها باللي سحره ومكان السحر…
نقلت السيدة عائشة رضي الله عنها روايتها قائلة: «سُحِرَ النَّبِيُّ صَلَّى اللَّهُ عَلَيْهِ وَسَلَّمَ حَتَّى كَانَ يُخَيَّلُ إِلَيْهِ أَنَّهُ يَفْعَلُ الشَّيْءَ وَمَا يَفْعَلُهُ، حَتَّى كَانَ ذَاتَ يَوْمٍ دَعَا، وَدَعَا ثُمَّ قَالَ: أَشَعَرْتِ أَنَّ اللَّهَ أَفْتَانِي فِيمَا فِيهِ شِفَائِي؟ أَتَانِي رَجُلانِ فَقَعَدَ أَحَدُهُمَا عِنْدَ رَأْسِي وَالآخَرُ عِنْدَ رِجْلَيَّ، فَقَالَ أَحَدُهُمَا لِلآخَرِ: مَا وَجَعُ الرَّجُلِ؟ قَالَ: مَطْبُوبٌ؟ قَالَ: وَمَنْ طَبَّهُ؟ قَالَ: لَبِيدُ بْنُ الأَعْصَمِ. قَالَ: فِيمَا ذَا؟ قَالَ: فِي مُشُطٍ وَمُشَاقَةٍ وَجُفِّ طَلْعَةٍ ذَكَرٍ. قَالَ فَأَيْنَ هُوَ؟ قَالَ: فِي بِئْرِ ذَرْوَانَ. فَخَرَجَ إِلَيْهَا النَّبِيُّ صَلَّى اللَّهُ عَلَيْهِ وَسَلَّمَ ثُمَّ رَجَعَ فَقَالَ لِعَائِشَةَ حِينَ رَجَعَ: نَخْلُهَا كَأَنَّهُ رُءُوسُ الشَّيَاطِينِ. فَقُلْتُ: اسْتَخْرَجْتَهُ؟ فَقَالَ: لا، أَمَّا أَنَا فَقَدْ شَفَانِي اللَّهُ، وَخَشِيتُ أَنْ يُثِيرَ ذَلِكَ عَلَى النَّاسِ شَرًّا، ثُمَّ دُفِنَتْ الْبِئْرُ»
إلى الآن أنا كلمتك بالمنطق وكلمتك بالدين
طب انا أعرف منين إني مسحور؟
معظم الأعراض بتبقى تعب في الجسم وهنا ما بنقدرش نميز إنت مسحور ولا تعبان عادي…
وما اقدرش أقولك ان من كتر الابتلاءات ممكن تكون مسحور… لأن الابتلاء اجر وترتيب الأحداث مقدر من عند الله… انت بدعائك تقدر تخفف شدة الابتلاء او ترفعه كله برحمة ربنا وجايز تكون المصايب دي بسبب حد عايز يضرك وجايز لأ…
فالأعراض هنا دايما غامضة وأسبابها كتير… وانا مش عايزاك توسوس
الرقية الشرعية هي الفيصل
هتحصن نفسك وحبايبك من غير ما تشكك في الناس ولا تشكك في اللي بيحصلك… عشان الموضوع مايوصلش للوسوسة…
طب عبارة عن ايه الرقية الشرعية للي مايعرفش؟
نصلي ركعتين لله ونقرأ الفاتحة وآية الكرسي وبعدين سورة الإخلاص 3 مرات
وسورتي الفلق والناس 3 مرات
بعدين نقول الدعاء ده “أعوذ بكلمات الله التامات من شر ما خلق” 3 مرات
و “بسم الله الذي لا يضر مع اسمه شيء في الأرض ولا في السماء وهو السميع العليم” 3 مرات
وننفخ في أيدينا…
ونمسح على جسمنا من فوق لتحت…
بداية من الرأس…
مع الحفاظ على الصلاة وأذكار الصباح والمساء وورد يومي من القرآن ولو حائض فقراءة القرآن من الموبايل متاحة عادي…
وناخد بالنا بقى من كام نقطة كده…
نضافة البيت شيء مفروغ منه… والبخور بردو بيطرد الشياطين… والقرآن…
مانديش حاجتنا لحد وناخد بالنا بعد ما كل شخص يمشي نشوف في ايه مكان ما قعد ونعيد ترتيب المكان مش وسوسة انت كده كده هتنضف بيتك لكن لازم تاخد بالك…
عشان بيبقوا متصنعين الود ووراهم شر يهد جبل…
نضفنا الشقة ومالقيناش حاجه؟ طب الحمدلله خير وبركة…
نركز تاني مانديش حاجتنا لحد… عايزين نجيب هدايا نجيب لكن مانديش حاجتنا لحد يعملنا بيها عمل هنا ولا هنا…
غير كده انت مش هتقدر تميز بقى سواء السحر ده انت أكلته او عتبت عليه او أيا كان وماتفكرش كتير… انا اديتك اهم الطرق اللي تحصن نفسك وعيلتك بيها…
طب حاجه كمان قبل ما تمشي وتسيبني…
النبي صلى الله عليه وسلم أوصى بسبع تمرات عجوة على الريق وقاية من السم والسحر
والدليل عندك اهو… في صحيح البخاري
عن النبي صلى الله عليه وسلم قال: “من تصبح كل يوم سبع تمرات عجوة لم يضره في ذلك اليوم سم ولا سحر”
وياريت تبعد عن أي حاجه ليست من هذا القبيل… جو الدم والسحر والدجل وإنك تبطل سحر بسحر… ده حرام… وبدل ما تنقذ روحك هتدخل نفسك في متاهات…
وافتكر دايما اننا مش في العالم ده لوحدنا…
وربنا يحفظنا ويحفظكم جميعا
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
