تخلص من هؤلاء وآمن بنفسك

تخلص من هؤلاء وآمن بنفسك
كتب : نهاد رجب

بحب الناس اللي لو عملتلهم سلطة يقولولك انت احسن طباخ في الدنيا وينصحوك تعمل مطعم وتعلن عن نفسك لانك موهبة متكررتش

مش مهم يدوقوا اكلك ، بس هما ناجحين جدا لدرجة انهم شايفين اي حد تاني يقدر ينجح هو كمان ، وان الموضوع بس محتاج اصرار .

بحب الناس اللي روحتلهم وانت منعكش شعرك يشوفوه hairstyle ولو هدومك مقطعة يقولولك ديه ممكن تبقي موضة وانها لايقة عليك ، لو روحتلهم فاشل يقولولك انت ازاي مختلف اوي كده ومميز عن الناس ولو لاقوك عيان ياخدوا بالهم ان دقات قلبك مظبوطة او ان لون وشك اتحسن درجة.

هما حلوين اوي اوي لدرجة انهم شايفين حاجة حلوة في كل حاجة ، هما مش محتاجين ينافقوك لانهم مش عايزين منك مقابل ، بس هما عارفين انك تقدر تقدم احسن وواثقين فيك ومؤمنين بيك لله ف لله

عارف ليه ؟

لان ربنا رفعهم درجات .. فعايزينك معاهم وشايفينك عندهم ، مهما كانت سلبياتك هما مش شايفينها ، هما بيركزوا بس عالحلو اللي فيك ، علشان هما شاغلين نفسهم بالحلو بس اللي فيك

على النقيض .. فيه ناس تانية لو لاقيتك خدت خطوة لفوق ، بيتكلموا عنك وبيحاولوا يوقعوك ، بينتقدوك وبيحاولوا بنصيحتهم يعلوا عليك درجة ، الناس ديه تحت اوي ، والدليل على كده هو انهم بيشدوك عندهم لتحت برضه ..

محدش بيشدك لتحت الا لو كان هو في درجة اقل منك .

الناس ديه هتغتاب بإسم الله ، هتنم وتشكره ، هتحاول تدمرك وهتخلص وتصلي ركعتين.

تخلص من هؤلاء وآمن بنفسك

هما فاهمين غلط وبيحاولوا يلاقوا مبرر لتصرفاتهم الشريرة جدا ، الناس ديه فاكرة انهم عارفين ، بس المعرفة الحقيقية بتبان منك ومن النتايج اللي بتحصل عليها مش من محاولتك المستمرة انك تقلل من شأن الناس علشان تعلوا عليهم .. ديه مش معرفة . ده جهل .

انت جميل ، استمر ، الحياة حلوة اوي ، انا بقولك كده لانك تقدر ومن زمان بقولك انا مؤمن بيك ، مش مهم اشوفك او اتعرف عليك ، المهم عندي انك موجود وده معناه ان ربنا اختارك وده معناه ان ليك مهمة ، وكل كلمة دعم ليك هي دعم لمهمة انت مسئول عنها . انا معرفش هيا ايه ويمكن انت متكونش عارف بس اللي انا وانت متأكدين منه انك بتنفذها حتى لو مش واخد بالك .. علشان كده ، حاوط نفسك باللي هيساعدوك ويرفعوك معاهم .

ويومك اجمل من يومي