مواصفات لعب الأطفال

مواصفات لعب الأطفال
كتب : يسر الجميل

انضم لقناة كوكب المعرفة على تليجرام

.. 🚗🦋⚽️ ماما…أنا عايزلعبة 🦋⚽️🚗

أمهات كتير بتحتار في شراء لعب أولادها ،مابين :

• طلبات أولادها إلى مبتخلصش

• الميزانية القليلة

• أو أنها مش عارفة ايه اللعب المناسبة لهم

الأول خلينا اطمنك واقولك إنك عشان تحققى لأولاك متعة اللعب وكمان هدفه التعليمي مش شرط خالص تشترى لعب كتير 
مش شرط تشتري أصلا 😉

أهم اللعب موجودة في كراكيب بيتنا وأنا واحدة من الناس إلى لحد النهاردة مش بنسى المتعة إلى كنت بحسها أثناء اللعب وأنا صغيرة بالرغم من إن معظم لعبنا كانت من خامات البيت وكنا أحنا إلى بنصنعها كمان بنفسنا 😍😍

لحد دلوقتى منساش عروستى إلى كانت من الخيط الصوف والطيارة إلى كنا بنعملها من أكياس التلاجة والخيط 😂 أو اللعب بمشابك الغسيل أو …
كل المطلوب منك إنك تعيدى النظر مرة تانية لسلة المخلفات فى بيتك

أهم حاجات ممكن نستغلها :
كرتونة البيض أو بكر المناديل الفاضى أو أزايز اللبن أو العصير أو كرتونة الشوز الجديدة أو …
كل دى وسائل للإبداع،ابنك ممكن يصنع منها عالمه الخاص ،
كل ما عليك انك توفرى لابنك الكراكيب دى من غير توجيه أو أوامر وهو عقله هيشتغل وهيبدع وهيبهرك
وع فكرة دى وسيلة مهمة جدا لتنمية التخيل والإبداع عند الطفل إنه يعيد استخدام الأشياء بشكل جديد او يستنتج استخدامات غريبة لأشياء موجودة بالفعل،وهتبقى لعبته الجديدة إلى صنعها بإيده أهم وأغلى عنده من أى لعبة تانية ممكن يشتريها

طب ولما اشترى لابنى لعبة اشتريها إزاى ؟
أنا هنا هقولك الجملة السحرية إلى مينفعش تنسيها أبدا وانت بتشترى ألعاب طفلك وهى
جسمية …إنشائية…جماعية 
لازم اللعب تغطى التلات جوانب دول ولازم يكون بينهم تكامل يعنى مثلا
لو حضرتك محددة إنك بتشترى لعبة كل شهر فهيكون النظام كالتالى

الشهر الأول : لعبة جسمية
يعنى لعبة تساعده على تنمية عضلات جسمه لعبة تساعد على الحركة والتنطيط زى الكرة أو نط الحبل ….

الشهر التانى : لعبة إنشائية
يعنى لعبة تساعده على إنشاء شكل من خياله تساعده على الإبداع والإبتكار
زى الصلصال إلى بيشكله زى ما يحب أو الميكانو او الليجو أو التانجرام
او اى لعبة بتخلي الطفل ينشأ شكل نهائى من أجزاء صغيرة

الشهر التالت : لعبة جماعية
يعنى بتتلعب بأكتر من طرف ودي من خلالها الطفل هيتعلم قواعد التعامل مع الأخر والمشاركة وأسس التفاوض وتقبل الرأى المختلف والوصول لحلول وسط
زى مثلا الشطرنج ،البينج بونج ،التمثيل ، ،…اى لعب متتلعبش بواحد بس

وبكده تكونى حققتى التوازن بين أهم ٣ جوانب

استنى✋✋
لسه المقال مخلصش النقطة إلى جاية دى أهم نقطة

إزاى ممكن احقق التلات جوانب فى لعبة واحدة ؟
الأم الذكية مبتنساش أبدا المعادلة دى فى كل لعبة
( جسمية..إنشائية ..جماعية)
وبتقدر تخلى معظم الألعاب بتشمل التلات جوانب
يعنى مثلا
الصلصال لعبة فالأصل إنشائية لكن كمان هى بتنمى العضلات الدقيقة للطفل إلى هى عضلات اليد فتبقى كمان جسمية
طب لو جمعنا الأخوات او الأصحاب مع بعض يشتركوا فمجسم كبير بالصلصال أو كل واحد يعمل جزء من البيت ويتفاوضوا بقا 😊
على الشكل النهائى تبقى كمان بقت جماعية
وبكده تكونى حققتي التلات جوانب في لعبة واحدة

المهم إنك دايما متنسيش
( جسمية …إنشائية …جماعية ) 😊

[latest-selected-content limit=”10″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]