التربية السلبية التى تدمر أولادك

التربية السلبية التى تدمر أولادك
كتب : نهاد رجب

---

– ولد .. خليك راجل
– ولد .. عيب.. لما تكبر وتبقى راجل

لكل أب ولكل أم، ابنك/بنت احتمال يكون جالي أو بيفكر يجيلي أو راح لمتخصص علاج نفسي من وراكم.. اقروا المقالة ديه هتعجبكم ..

دليلك للتربية بيوضحلك ، اللي انت عايزه وممكن يخلق ايه بناءا على عدد المستفيدين اللي بيحجزوا في قاعات الجلسات..

عايز ابنك يبقى مؤدب وهادي وميتكلمش في وجود حد كبير علشان عيب؟
نفسك ابنك يبطل شقاوة ويكسفك قدام الناس؟

مبروك ابنك مؤدب ومبيتكلمش في وجود حد كبير ، بس المشكلة انه مع الوقت ممكن يطور اضطراب الشخصية التجنبية ولو حد شخط فيه في الشارع أو في الشغل ، مش هيقدر يدافع عن نفسه لانك زرعت فيه الخوف من السلطة..

عايز ابنك ياخد رأيك في كل حاجة قبل ما يتصرف لانه طفل وممكن تحصله مشاكل؟
نفسك ابنك يرجعلك دايما في قراراته لانك خايف عليه؟
بتزعقله لانه غلط لما قرر يفكر ويتصرف وغلط؟

مبروك .. ابنك هيبقى طويل وعريض وعنده ملامح اضطراب الشخصية الاعتمادية ومش هيعرف يتجوز او يشتغل وحياته كلها هتقف ولو انت مت ممكن يجيله اكتئاب حاد وينتحر او يتنازل عن حقوقه علشان خايف يخسر الناس اللي حواليه.

نفسك ابنك ياخد حقه بدراعه ويبقى ناشف كده ويشنكل اللي شنكله ويفرط عضلاته على الناس؟
نفسك ابنك يتف على عمو؟
عايزه يطلع جامد كده وناشف؟ ودايما خايف عليه من الناس الوحشة اللي عايشين برة؟

مبروك في نادي السيكوباتيين مع عضوية محتملة في نادي الباراونيدز ، ابنك هيخرشم عربيات الناس والناس هتتجنبه وهيكبر حبة كمان ويديك على دماغك .. ابنك احتمال كبير يهاجم المجتمع ويتخانق مع دبان وشه . ممكن يكذب ، يإذي ، يحور ، علشان ياخد حقه.. وفي النهاية وفي البداية هييجي عليك وهيزعلك.

نفسك ابنك يطلع منظم كده ومرتب في نفسه؟ بتربيه دايما انه ميتهاونش ولا يبقى مرن ؟ بتربيه تربية عسكرية كده علشان يطلع قوي كده ؟

مبروك عليك ، ابنك غالبا ممكن يطور اضطراب الشخصية الوسواسية ، هيجنن اللي حواليه وهيجنن ولاده ، هيمشي يتخانق في الشارع ، الناس هتكرهه او هتتجنبه او هتطبله علشان تحمي نفسها من بطشه .. هيكون عرضة للأمراض النفسية والجسدية ، اقل حاجة هتحصل غصب عنه ، هيقلق ويتوتر وهيكسر الفازة على دماغك أول واحد.

وأخيرا نفسك ابنك يحب نفسه؟ شايفه احسن من كل الناس اللي حواليه؟ عايزه دايما يعرف هو ابن مين؟ ويفتخر بعيلته وبيك ؟ ميتكلمش مع العيال علشان اقل منه؟

مبروك علينا المرة ديه، ابنك احتمال يطلع نرجسي ، هيحب نفسه ، وهييجي على الناس ، هيكون احسن واحد وهو قاعد مكانه ، هيتكلم دايما عن انجازاته اللي غالبا متحققتش بسبب عيون الناس ، هيبصلك من فوق لتحت لانه احسن منك وانت بقيت تكسفه في المناسبات الاجتماعية.

عايز تربي ابنك بجد؟
سيبه .. بس قبل ما تسيبه ، اخلقله frame of refrence ، مرجعية هي اللي تربيه ، وديه هتكون افضل هدية تقدمهاله في حياتك وحياته..

التربية المبنية على التعليمات والتوجيهات هي اكتر نوع من انواع التربية اللي ممكن تخلق مريض نفسي بامتياز ، التربية الصحيحة هو انك تعلمه دينه مهما كان ، وتخلي كتاب ربنا هو اللي يقوله الصح والغلط

التربية الصحيحة هي تربية المثال، انك تكون مثال للي انت عايز توصلهوله، طالما انت بتتصرف بطريقة سوية بتكسب بيها والناس اللي حواليك بتتراضى.

لو لاقيت نفسك بتديله اوامر وتوجيهات وقواعد وحكم، انت بتهيئه لمشاكل كبيرة جدا في المستقبل ، هيعجبك جدا وهو طفل بس لما هيكبر هيزعلك ويتعبك.

عرفه دينه ، عرفه الصلاة والصلاة هتربيه زي ما بيتقال ، خليه يعرف ويسمع قصص ايجابية عن الناس الحلوين الناجحين ، خليه يتطلع يبقى زيهم ، وهو بشكل تلقائي هيتغير ويتعدل ويتحسن بشكل آمن علشان يوصل للصورة ديه

اقبله زي ماهو ، حبه ، احتويه وهيأ البيئة المناسبة اللي هتوجهه بشكل تلقائي للنتيجة المطلوبة .. اوعى تحط نفسك في الصورة بشكل مباشر.

ربنا عز وجل قال “وأمر أهلك بالصلاة واصطبر عليها”

زوجة سيدنا لوط كانت عاصية
ابن سيدنا نوحى راح مع الطوفان

عليك بنفسك ، وهو هيتعلم منك .. وصدقني ، كمان كام سنة، هتفهم وتكون مبسوط بيه ، لما تعرف انه لا طلع مدمن ولا مستني دوره عند طبيب نفسي.

وافتكر : لو حطيت نفسك في الصورة ، هيتبع كلامك ، وانت ممكن تتغير ، تنسى، تغلط ، لكن لما تحطله مرجعية حقيقية سليمة يمشي عليها ، ده التأثير اللي هيستمر وهيدوم معاه.

ويومكم اجمل من يومي

[latest-selected-content limit=”10″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]