قصيدة الحياة بقى لونها فحلقي
كلمات : سامح عبد الهادى
قصيدة تصف حال شاب مصري من الجيل الحديث وبحثه عن ذاته فى ظل ظروف اقتصادية سيئة ومواجهة الواسطة والمحسوبية
انضم لكوكب المعرفة تابع أشعار سامح عبد الهادى
الحياة بقى لونها فحلقي
الحياة بقى لونها فحلقي
فحلقي؟؟؟
آه فحلقي
آآآآه … فحلقي
وإيه الغريب فى لون غريب
بيوصف حياتنا واللى فيها
لا فيه غمامة على عيوننا ..
ولا عدسات نشوف بيها
فحلقي …
وعايشين … وراضيين بيها
عايشين ازاى .. ماعرفش
بس لازم نكمل فيها
أيام … بتمر شبه بعضيها
أتعلم وأدرس وأخد شهادات
ألقى الشغل يا كمبيوتر يا لغات
أشوف سكة سهلة وأقضيها دورات
صاحب الشغل يقولى كويس
ناقص الواسطة .. والألوفات
أشيل أحلامى وارجع
على أى شماعة أرميها
وأسمع الكلمة اللى عايش عليها
إنت فاشل ..
فاشل ؟؟؟؟؟؟
دا أنا أحلامى لسه بهاود فيها
بتموت الأحلام منى وأنا باسقيها
فحلقي …
وعايشين وراضين بيها
أنا لو هاحكى .. ألف حكاية هحكيها
والألف حكاية .. كلنا بنعيش فيها
كل شاب فى البلد دى بيحبها
بس مش قادر يديها
كل شاب فى البلد دى محتاجلها
محتاج يحس الامان فيها
الحيرة بتنبض جوانا
أحلامنا مش عايشين ليها
بنبنى فى أحلام غيرنا
ونوهب نفسنا ليها
ونقول أهى فترة وتعدى
خلاص .. بكرة الحياة وردى
ويجرى العمر حوالينا
يفوت القطر ويعدى
ويجى بكرة
وتفوت سنين على بكرة
ما بتجيش الحياة وردى
فحلقي
وعايشين وراضيين بيها
ورغم الظلم اللى حوالينا
هانبنى حياتنا بإدينا
ما بنستسلمش لليأس
ولا حلمنا بيموت فينا
فساد ورشوة ومحسوبية
ولا حاجة هاتأثر فينا
أحلامنا بتتسرق
وقلوبنا بتتحرق
وياما كان واحد بيحلم
خد احلامه وغرق
بس يمين الله ماحاجة هاتوقف خطاوينا
احنا اختارنا .. والاختيار محسوب علينا
هى فحلقي
أو فسدقي
مش هانشغل نفسينا
هانعيش
وبكرة بنعمله بإدينا
بكرة لينا
#سامح_عبد_الهادى
جميع الحقوق محفوظة للمؤلف
مدرس رياضيات حاصل على ماجستير إدارة الأعمال وكاتب ومحاضر في علوم التنمية البشرية والإدارية
أحمد حبيبى .. انت أجمل ومشاركتك للمدونة عملت ليها قدر تانى .. ربنا يخليك يا قمر .. أخوك سامح
سامح انتا انسان جميل علشان كدة دة كلامك اخوك احمد ابورواش