اضطراب القلق واضطراب الهلع
كتبت: منه زين
اتعودنا نبص حوالينا صح؟ شايف ايه؟ مش شرط دلوقتي… شايف ايه عموما؟
-
شايف واحد ماسك شنطته وبيمشي بسرعه وسط الزحمة وهو عرقان ف عز التلج وايده التانيه بتترعش وباصص في الأرض ومش طايق حد…
شايف ايه تاني؟
-
النهارده وانا براقب في اللجنة بردو لفت انتباهي طالبة بتهز رجليها بعنف وبتحاول تتحكم في رعشة ايديها قدام ورقة الامتحان ومش قادره تاخد نفسها…
لا كمل بقى من غير م اسألك شايف ايه…
-
امبارح وانا بكلم جوز اختي علشان نتفق على يوم نتقابل فيه كلنا بما ان الامتحانات قربت تخلص وكلنا هنبقى ف إجازة عرفت انهم كانوا معاقبين حازم ابنهم انه يفضل محبوس في البادروم مع كتبه علشان طول ما هو برا مابيذاكرش وبيفضل يلعب… ولما دخلوا يتطمنوا لقوا حازم فقد الوعي… وفضل عنده ضيق تنفس بعد ما فوقوه.
-
بنت اختي سلمى بردو ملاحظ انها كل ما يجيلها شوية برد ولا سنانها توجعها تفتح في العياط وتترعش وتبقى خايفه جدا تروح لأي دكتور بتكره حاجه اسمها دكاترة وعلاجات…
-
انا نفسي بحس بعجز رهيب ساعة ما بيبقى في مشكلة عويصة بتحصل ومحتاجة حل… مابعرفش اسعف نفسي ولا اللي حواليا… بل بالعكس بستنى اللي يسعفني من كتر م بحس بالخوف من العواقب وبيحصلي مضاعفات تانيه زي اني بفضل اترعش وضربات قلبي سريعه ومعدتي مقلوبة ودايخ وحاسس بهبو سخن داخل عليا… ماببقاش طايق العيال ولا امهم وابسط حاجه توترني… من ساعة ما مشكلة الشغل الأخيرة حصلت وانا في دوامة والشعور ده مابيروحش من عندي.
-
مريم مراتي من ساعة ما عمتها توفت مع العلم إن عمتها دي هي اللي مربياها ولها مكانة خاصة في قلبها لاحظت إن مريم بيجيلها ضيق تنفس وجسمها كله بيتنفض في المواقف المتعلقة بالموت بقت تخليني أنا اروح بالنيابة عنها أي عزاء سواء كان في العائلة او زملائي في الشغل… والموضوع بقى متلاحظ والكل بقى يسأل عنها… ما هو مش كل مره هقول انها تعبانه أو حد من قرايبها تعبان وهي قاعده معاه.
-
ولادي الاتنين أحمد وزياد عندهم نفس الخصلة لمضين لماضة معايا ومع امهم! نيجي مع الغرب سواء ف المدرسة او لما باخدهم معايا الشغل لجلجة وتخريف وتطبيش في الكبير والصغير كأن انا وامهم سايبينهم وقاعدين بنلعب بلايستيشن مثلا… لدرجة ان فاروق صاحبي اقترح عليا أطباء نفسيين وأخصائي تخاطب الخميس اللي فات… احلف مائة يمين انهم كويسين ماحدش مصدق.
-
والدتي إلى الآن بتتصل كل يوم تعرف انا كلت ولا لا ولابس كويس ولا مخفف فمراتي تضايق ويحصل خناقة وانا مابقيتش قادر… وبصراحة انا مقدر زعل مراتي … أصل أمي بتخاف عليا حبتين تلاته يعني… وحصل مشاكل كتير قبل الجواز بسبب الموضوع ده… انا مش عايز أقولك يابني أمي رفضت عرايس قد ايه وكانوا كلهم كويسين… انا فاهم إنها بتعمل ده علشان مش عايزاني أبعد عنها بس دي سنة الحياة يا أخي… طب شفت عريس من جهة أمنية؟ هو كده بالظبط. ايه ده بتضحك؟ اضحك اضحك، هم يبكي وهم يضحك.
-
شفت اول امبارح ولد ماسك ايد أبوه بقوة وخايف خوف شديد وهم طالعين الكوبري قدامي… قدمت عنهم خطوتين لقيت الولد بيعيط وصوته جايب آخر الممر.
-
خالتي صباح بطلت تحط كريمات من ساعة ما جلدها التهب آخر مره.. يلا الله يمسيها بالخير.
طب يا سيدي أشكرك كفيت ووفيت… كل اللي قلته ده حابب أديك فكرة عنه تحت مسمى (إضطراب القلق)… أي إنسان بيقلق… في ناس شاغله نفسها بالديون اللي عليها… واللي قلقان وخايف من مادة دكتور مش عارف ايه علشان مابينجحش حد… اللي بيخاف من الأماكن المغلقة… واللي بيخاف من الزحمة واللي بيخاف ابنه يسيبه ويتجوز او يسافر لشغل المهم يفضل جنبه عالكنبه ومش عايزه يبعد عن عينه… اللي خايف من المرتفعات وبيخاف من مجرد طلوع البلكونه علشان هو ساكن في الدور الخامس… إلخ… كل ده لا يشكل خطر إلا لو حدث معاه مضاعفات أو عواقب أخرى واتحول الموضوع من مجرد قلق وهيروح لحاله الصبح ل (اضطراب قلقanxiety disorder) بيحصل بشكل متكرر ومؤذي
-
يخلي الشخص يقصر في شغله ودراسته وعلاقاته باللي حواليه
-
فقدان السيطرة على الأعصاب، دايما تلاقيه متوتر وخايف ومتعصب عالفاضي والمليان
-
الاكتئاب (سوسة الجسم وأخبث الأمراض النفسية بيساوي السرطان معاذ الله في الأمراض الجسدية) وبيعمل مشاكل بعد كده تخلي الشخص ينحرف سلوكيا أو أخلاقيا ويخش في دوامة تانية… ماتستغربش أبدا لما تلاقي وليد زميلك في الشغل الرجل الشغوف الطيب بقى شخص غير متكلم وطايش في معظم الوقت بقى يدخن وتحت عينيه أسود وبقى يضرب مراته وعياله كل شوية ومابقاش ييجي الكلية كتير… وبقى يتكلم عن الموت كتير ويسأل أسئلة زي “أنا ليه عايش؟” وبقى شايف إن هدفه الوحيد التراب وبيطلع كتير يقف على سطح الكلية من غير ما يطلب من حد يقف معاه. لا شك إنه بيفكر يرمي نفسه
وساعتها أقولك إن في الحالات المذكورة دي أولى بالإنسان يلحق نفسه أو حد قريب منه من إنه يقع في الهاوية… اضطراب القلق مش زي القلق العادي… اضطراب القلق بيكون مصحوب بأعراض شديدة جدا ومتكررة ممكن في اليوم أكتر من مره مش هنصحى الصبح نبقى كويسين…
أعراضه بتتمثل بشكل مفصل في:
-
العصبية والتوتر
-
الإحساس بالخطر
-
سرعة ضربات القلب وبالتالي الإصابة بضيق تنفس
-
التعرق والرعشة
-
اضطرابات النوم
-
يا دنيا طفيتي شمعي يا ناس كترتوا دمعي… محزنة وهات لي يابني كل القرف اللي حصل قبل كده واللي لسه هيحصل دول نفكر فيهم
-
اضطرابات هضمية… مرضى القولون العصبي عارفين الكلام ده
طب عندك فكرة بالأسباب؟
آه عندي… على عيني أقولهم لك… تعد معايا؟
-
مشاكل في القلب
-
مشاكل في الغدة الدرقية… فاكر ي سيد الكل ف منهج الأحياء ف 3 ثانوي باب الهرمونات لما كان بيقولك زيادة هرمون الثايروكسين بيزود معدل الأيض (الحرق) فيخلي الشخص باختصار يفقد وزنه ويعاني من عدم اتزان ضربات قلبه ويبقى عصبي؟ مش فاكر؟ اديني فكرتك بده لأنه سبب من الأسباب.
-
مشاكل في الجهاز التنفسي على سبيل المثال الناس اللي عندهم ربو
-
أعراض الانسحاب من أي حاجه الإنسان كان متعود عليها خاصة الكحول والأدوية
-
القولون العصبي وجايز المشكلة عضوية من البداية وجايز نفسية اعتبرها cycle ده بيأثر على ده. هفضل أكرر لك الجملة دي كتير.
-
بعض الأورام والعياذ بالله.
طب نسأل سؤال: نفرق ازاي بين اضطراب القلق واضطراب الهلع؟
أقولك يا سيدي إن اضطراب الهلع ممكن يكون نتيجة لاضطراب القلق…
لأن اضطراب الهلع أقوى بكتير من اضطراب القلق في أعراضه بيحفز هرموني الأدرينالين والنورأدرينالين اللي بيتم افرازهم خصيصا في أوقات الخطر… ممكن ده يحصل في أي وقت… وانت في مناسبة اجتماعية… وانت في خروجة مع صحابك… وانت بتكتب مقال زي اللي انا بكتبه ده دلوقتي… وانت نايم أو لسه صاحي من النوم…
الموضوع بيحصل من غير معاد واضطراب الهلع عبارة عن نوبات هلع متكررة (panic attacks) وفي فترات زمنية قصيرة مش بعيده أو ثانوية بتحصل في المواقف العصيبة بس… لأ
الشخص بيحس بإيه هنا إجمالا؟ بيحس إنه بيفقد السيطرة على نفسه وبيحس إنه هيموت بسكته قلبية من كتر الخوف…
تفصيلا؟
حاضر…
-
الشعور بالخوف الشديد
-
الخوف من الموت
-
اضطرابات في سرعة ضربات القلب
-
العرق الشديد
-
الاهتزاز بعنف وشكل ملحوظ
-
ضيق تنفس
-
فاكر الهبو السخن؟ بالظبط.
-
صداع وآلام في الصدر
-
دوخة وممكن توصل لإغماء
-
ميل للقئ
-
تنميل
-
انفصال الشخص عن الواقع بتاعه، عدم القدرة على ادراك الشخص للأوضاع اللي حواليه
ليه ممكن يحصل اضطرابات هلع؟
انت بتسأل كتير هه! وانا بحب الفضوليين…
أقولك ليه:
لا بص ما احنا هنعد كتير
-
عوامل وراثية
-
الإرهاق الشديد
-
عدم اتزان المزاج
-
أيوه الأسطوانة المشروخة بتاعتنا… مناطق في المخ اتأثرت فأثرت على مزاج الشخص… فاكرين اسم الهرمون أو الناقل العصبي المسئول عن تعديل المزاج؟ السيروتونين برافو عليك.
-
مواقف صادمة (traumatizing events) زي إن شخص يتعرض لأذى جسدي زي الاعتداء الجنسي أو التحرش… وزي إن شخص يتعرض لأذى نفسي زي إنه يفقد شخص بيحبه سواء الشخص ده مات او بعد عنه.
متخيل يا صديقي شخص عنده اضطراب القلق و عنده اضطراب الهلع مع بعض؟ انا يعني :”””””””
ماتخافش مابعضش… شكرا على وقتك وشكرا على وقتي يعني ما انا بردو داخله أفيدك واشارك معاك تجربة شخصية مش مجرد كلمتين والسلام…
سلام.
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
