رهاب الموت
كتبت: منه زين
السلام عليكم… أيها الحضور الكرام…
النهارده هيبقى أهم مقال بكتبه مش عشان قوة المحتوى من حيث تدعيمه بالمعلومات لأ انا كده كده بديك محتوى جامد كل مره… ولا إيه!
يا سيدي الموضوع وما فيه اني هتكلم عن تجربة شخصية… فاسمع مني وبإذن الله أكون اديتك فكره عن حاجه ممكن تكون لأول مره بتعرفها وممكن تكون عارفها بس مش عارف تتعامل معاها ازاي ان كان الموضوع يخصك أو يخص غيرك… فعلك تستفيد اليوم…
خليني اديك فكرة مبدئية عن معنى كلمة “رهاب” أو “فوبيا”… هو مش رهاب ده يعني خوف؟ هقولك اه… بس مش الخوف العادي اللي أي حد بيحس بيه في مواقف معينة لا… درجة الخوف هنا أعلى… الجسم هنا بيبقى على أتم استعداد… الجهاز الهضمي بيقلب الدنيا قلبان… والأدرينالين شغال على ودنه… الشخص عنده hyperactivity وحساسية زيادة لأي شيء حواليه… مقشعر ومركز مع كل حاجه تأهبا للي جاي… اللي هو ممكن مايكونش عارفه ولا عارف هيواجهه ازاي… وليه! كل ده ممكن عشان الشخص شاف صرصار… ولا طلع مصيف مع قرايبه وخايف ينزل المياه… طلع على كوبري… زار المقابر مع والدته… انت مش عارف ان الشخص ده عضه صرصار وهو صغير فبقى يخاف من الصراصير من ساعتها… ولا انت عارف ان الشخص التاني والده مات غرقان فخاف ينزل المياه يموت زيه… بردو انت ماعندكش فكره ان اللي زار المقابر مع والدته ده عنده رهاب الموت بسبب ان جدته ماتت قدامه… ولا ان اللي طلع ع الكوبري بيخاف من المرتفعات لمجرد انه بيتخيل نفسه بيقع منها وبيفقد توازنه على أي مبنى أعلى من مستوى الأرض بدورين تلاته…
فباختصار اقدر اقولك ان الفوبيا/ الرهاب كلمتين مرتبطتين بالخوف آه، بس خوف مش منطقي… من شيء أو من شخص أو من التعرض لموقف محدد… نتيجة لحدوثه مسبقا والتأثير على الشخص المصاب بشكل سلبي…
اتكلمنا المقال اللي فات عن ال anxiety وال panic disorder وعرفتك أعراض ال panic attack ومدى قوة ارتباطهم بشخص عنده خوف او قلق من حاجه معينة بشكل متكرر…
المره دي هتكلم عن نوع من أنواع ال anxiety disorders…
مصطلح زي thanatophobia تقدر تعرفه ازاي؟
اقولك ان thanato دي كلمة يونانية تعني الموت… الخوف من الموت… ما بعد الموت… فالموضوع هنا متعلق بالغيب مش بالحاضر أو الواقع… مش بالأشياء المتعلقة بالموت او بالميت…
فلما حد يقولك انا كان عندي thanatophobia واتعالجت اعرف انه مر بأسود أيام حياته حرفيا عشان يبقى على الأقل نورمال زي الناس النورمال اللي ماشيه هنا وهناك دي… ماتقفش تتريق زي الجحش وتقوله ايه يعني ما خالتي كان عندها حصوة ف الكلى وكانت بتقعد تلعب معانا كوتشينه لحد الفجر… اتفقنا؟ عشان صاحبك لو لسانه سليط هيزعلك وانا كمان هزعلك معاه وهيبقى حقي وحقه… اتفقنا؟
قبل ما احكيلك انا مريت بإيه واتعالجت ازاي… هقولك الفرق بين thanatophobia و necrophobia…
الكلمة الأولى وضحت لك معناها التانية بقى… في اللغة اليونانية necra يعني ميت…
فلما تربطها بكلمة فوبيا بتبقى الخوف من الميت… أو ما يتعلق به… توابيت… أكفان… أي شيء ثابت زي التماثيل والعرايس البلاستيك والمانيكانات… نسبة للجثث… القبور… فالشخص اللي راح مع والدته المقابر ده كأنه كان بيحفر لنفسه قبر جنب اللي هي واقفه بتدعيلهم…
نفس الأعراض اللي بتيجي لشخص عنده panic disorder هي نفس أعراض النوعين اللي فوق دول النيكروفوبيا والثاناتوفوبيا أو ال death axiety…
والأسباب
-
ممكن تكون وراثية…
2. ممكن يكون الشخص اتعرض لموقف عصيب قربه للموت… عمل عملية جراحية صعبة… وقع من ارتفاع معين… عنده مرض مزمن وشاف نتايج سلبية لناس كتير نفس حالته… عمل حادث…
3.وكذلك ممكن يكون الشخص فقد شخص عزيز عليه جدا وشافه وهو بيموت وده أثر عليه…
للأسف النيكروفوبيا والثاناتوفوبيا ساعات بيكونوا ملازمين لبعض… هنا الشخص يخاف من الموت ومن الميت… يخاف يمشي في جنازة… ويخاف يسمع خبر وفاة حد… لكن ملحوقة بإذن الله… وبعد اذن حبايبي بتوع ” ده ضعف إيمان” … نبطل نطلع أي شخص مريض انه على باطل وانه وانه وانه… علشان مالهاش علاقة… ياريت نبطل ننسب المرض للدين… عشان بتوسع منكم ومابتعالجوش أي حاجه بالعكس بتزيدوا الوضع سوء على الناس اللي حواليكم … ماتجيش لشخص شكاك أساسا وبيتعالج وفيه اللي مكفيه وتقوله ما انت تلاقيك مابتصليش فتشككه في علاقته بربنا وتزودها عليه وانت فاكر انك كسبت فيه ثواب…
نبدأ بقى… الصلاة والسلام عليك يا حبيبي يا رسول الله…
الموضوع بدأ في 2016…
انا من الناس الشكاكة… عندي وسواس قهري… ودماغي مليانة أسئلة طول الوقت إلى الآن… الموضوع بدأ عندي بالخوف من المجهول… مما بعد الموت… كنت بفكر في الموت بشكل متكرر… حتى وأنا بصلي… والمفروض إنك تقف تصلي وانت مرتاح ومطمئن بين يدي الله… انا كنت بصلي وأنا خايفه… من كتر خوفي من الآخرة… كان كل ما اعمل حاجه كويسه أقول ان ده ولا شيء… وبدل ما اعمل حاجه احسن بقيت بقف محلك سر… قصّرت في كل شيء حتى الدين… خفت أكتر… الموضوع تحول من مجرد خوف من شيء غيبي للشئ نفسه اللي متعلق بالغيب ده… الأكفان… التماثيل… القبور… الجثث… بقيت حاطه ايدي على قلبي كل شوية حد يموت أو انا اللي اموت… جالي كل أعراض الpanic attack … جالي هلاوس… ان اللي حواليا اتحولوا جثث على حسب أحجامهم وأشكالهم… وكنت بشوف في الأكل دود… كنت بتخيل نفسي جوا كفن لما بتغطى فبحس بخنقة فعلا واحس اني مضغوطة ومقفول عليا… فبكشف الغطا واقوم… بطلت انام ع سراير من كتر ما بحس اني في قبر وبطلت انام في الضلمة لنفس السبب… وبطلت اخلي ماما تنام جنبي ولا كأني عيلة صغيرة… فبقى أنسب مكان ليا على الكنبة… في الصالة… من شخص يحب الهدوء والظلام لشخص يحب يسمع حس الناس حواليه… وينام في النور عادي جدا ومتقبل ده على عكس طبيعته… ومع ذلك ماكنتش مقربة من حد حق القرب حتى عشان اقوله حاجه زي كده… وعلى قد ما كان ليا معارف إلا إني كنت بردو بتجنب الصخب والتجمعات… بشكل ملحوظ.
وزني قل… عدد ساعات نومي قلت… بقيت بروح الدروس تعبانه وبجهز لها قبل معادها بحوالي ساعه ولا ساعتين عشان انزل اتمشى وسط الزحمة اللي انا أساسا مابطيقهاش… وكنت بوصل مجموعاتي دايما متأخر بردو…
اتعاملت مع الموضوع كأنه تحدي… وانا مابحبش اخسر…
خدت الموضوع عافية وأجبرت نفسي ازور مقابر مع اهلي لو حد رايح… وبقيت اشوف صور جثث بالعافية… وأكفان… وقرأت بعمق في الموت بيولوجيا وغيبيا… مع الوقت والترويض بقى عندي استعداد اناقشه وما اتجاهلش انا حاسه بإيه… بقيت اكتب عنه… حبيته!
وربنا انا جت عليا فترة بقيت فيها مهووسة بالموت… لدرجة ان في ناس حواليا بقوا حاسين ان قعدتي مقبضة لأني مابتكلمش عن حاجه غيره…
احلامي بقت كلها عن القبور… والأموات… وده بردو مش حلو
لكن مع الوقت كان سهل علاجه… بدأت ادخل نفسي في مواضيع تانيه… واشغل نفسي بالمذاكرة او بخروجات… اروح هنا اروح هناك … ازور دي… أتكلم مع دي بالساعات… فالموضوع مع الوقت الحمدلله اتحل…
بقيت حاسة بالرضا بشكل مطلق… الموت! وايه يعني… وادعي دعوتين حلوين وخلاص…
دي كانت طريقتي أنا في العلاج… انا من النوع اللي لما بيخاف من حاجه بيخوض فيها مابيطنشهاش…
صحصح معايا بقى لأنواع الطرق العلاجية في وضع زي ده… انت بتتعامل مع نوع من أنواع الانزايتي تمام؟
فعلاجه ممكن يكون بطريقتين:
-
علاج سلوكي معرفي: هنقعد مع الدكتور نحكي له وهو بعد كام جلسة هيغير المنطلق اللي بنفكر بيه تماما ويساعدنا نريح دماغنا ازاي…
-
بالأدوية: زي مضادات الاكتئاب والقلق كده…
وبالشفاء للجميع
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
