حوار مع الطالبة المصرية الأولى على الثانوية فى الكويت
حوار: خديجة الحداد
الطالبة المصرية المتفوقة نور زياد وجيه عبد الرحمن شهاب الدين من مدرسة السالمية الثانوية للبنات في دولة الكويت.
والتي حصلت على المركز الأول على الشعبة الأدبية بنسبة 99.96%.
كانت في حوار مع كوكب المعرفة للتعرف على تجربتها والتحديات التي مرت بها وأسرار تفوقها ونصائح لطلاب الثانوية ، فلنتابع سويا
بعد أن عرفتنا المتفوقة نور زياد شهاب الدين باسمها وتخصصها وجهنا إليها بعض الأسئلة المهمة التي قد يستفيد منها طلاب الثانوية العامة وهي.
كيف كنتِ تنظمين وقتكِ وعدد ساعات الدراسة في اليوم؟ وما هو هدفكِ وطموحكِ؟
أوضحت المتفوقة نور زياد شهاب الدين أنها كانت تهتم بجودة المذاكرة أكثر من كم الساعات التي تقضيها في المذاكرة.
واستكملت حديثها قائلة : نظرا لأنها سنة مهمة فكان معظم وقتي أقضيه في مذاكرة ومتابعة الدروس
بجانب ذلك كنت أخرج من وقت لآخر حتى لأ أمل في أوقات المذاكرة المهمة مثل فترة الامتحانات.
نظام الدراسة إنّي مش بهتم بكم الساعات على قد جودة المذاكرة .. بس في أغلب الأحيان وبما إنها سنة مهمة ف كنت بقضيها في المذاكرة وبردوا كنت بخرج عشان مزهقش من المذاكرة في الأوقات المهمة.
القرآن فرق جداً معايا فعلاً ما زاحم القرآن شيئاً إلا باركه
مش بشتت نفسي بكذا مصدر مذاكرة وكذا مدرس .. بس بتابع مُدرسات المدرسة كويس وبما إني أدبي فالكتاب مصدر مهم جداً بعد المذاكرة بحل الأسئلة السابقة وبنك أسئلة الوزارة وبتوكل على الله …
مبراجعش بعد الامتحان النهائي أي سؤال عشان ده بيأثر على الامتحان إللي بعده..
الاشاعات بتبقى كتير في الثانوية العامّة ف الطالب المفروض ميسمعش إلا من المصادر الرسمية ..
حدثينا عن العملية التعليمية ونظام المدرسة فى الكويت فيما يتعلق بالحضور والمنهج الدراسي، وما هي مزايا التعليم في المدارس الكويتية.
بالتأكيد لديك فكرة عن نظام الدراسة في مصر ، فما هي الاختلافات بينهم، وهل تقارني بينهم أصلا أم لم تهتمي.
نور زياد شهاب الدين🌸:
أنا في مدرسة السالمية الثانوية للبنات في حي السالمية بالكويت العاصمة وهي من المدارس التي تتبع لوزارة التربية وبتكون فقط لأبناء المدرسين من المقيمين (الوالد مدرس كيمياء ) ولأبناء الكويتيين.
طبعاً نظراً لقلّة أعداد البلد عموماً الفصول الدراسية بيكون فيها أعداد قليلة أقصاها ٢٤ طالب في كل فصل فبيتيح للطلاب التركيز أثناء الحصص .
وبيعجبني إن المدارس الكويتية الوزارية بتهتم بالأنشطة الطلابية وبترعى مسابقات في المجالات العلمية والأدبية على مستوى المحافظات
أما بالنسبة للمقارنة بين نظام الثانوية المصرية والكويتية فالمحتوى الدراسي معروف عنّه في الكويت إنّه أسهل من مصر بس بعد ما تصفحت سريعاً محتوى المنهج المصري حسيت إنّهم نفس المستوى مع اختلافات بسيطة .
ومن مميزات الدراسة بمدارس الكويت اللي بتعجبني إن العام الدراسي يقسم لترمين فصلين، وده بيخلي الطالب بيحس إنّه فصل شوية، وبتبقى مراجعة المحتوى الدراسي أسهل في الامتحانات النهائية عكس مصر إللي بيبقى فيها سنة دراسية كاملة وامتحان واحد.
ومن العيوب في نظام الثانوية بالكويت إنه بتحسب درجة الثانوية العامة اعتماداً على ال ٣ سنين ثانوي مجموع تراكمي فقد يكون الموضوع مرهق للطلبة عشان بنبقى لازم نحقق درجات عالية في ٣ سنين ورا بعض .
على عكس الثانوية المصرية مش مهم الطالب يجيب فيها مجموع كويس في أولى و ثانية ثانوي وبيعتمد المجموع الكلي على سنة ثالثة فقط.
كنت بقارن بين نظام الثانوية المصرية والكويتية ومهتمة بالمناهج المصرية وكان الهدف إنه عايزه أعرف هل احنا نفس مستوى طلاب مصر ولا لأ
بس في النهاية بحس الموضوع بيعتمد على كل طالب وهو عايز يأسس نفسه كويس ولا لأ .. أياً كان بيدرس في أي بلد ..
حدثينا عن دور أهلك وكيف كان دعمهم واهتمامهم بك؟
ماما وبابا وأختي الداعمين الأكبر ليّا وخصوصاً بعد قراري إن حابّه أدخل أدبي إللي كان المجتمع إللي حوليّا مش متقبله إطلاقاً سواء من مُعلماتي أو أقربائنا أو صحباتي
لأنهم كانوا شايفين إنّي أشطر من إنّي أدخل أدبي أو إنّي ظلمت نفسي ومستحقش أكون في أدبي (عشان الأدبي للطلاب الفاشلين على حسب نظرتهم)
ودي كانت تماماً عكس نظرتي للأدبي بغض النظر عن نوعية الطلاب إللي بيختاروه(وإللي في الواقع بيكون أغلبيتهم مش شاطرين ومش مهتمين بالدراسة إلا من رحم ربي )
كنت شايفة إن الأدبي وتخصصاته الجامعية فيما بعد هي للمفكرين وإللي بيحبوا العلوم الإنسانية ومهتمين بالإنسان والتفكير والبحث ودي كنت حاجة مش شيفاها أوي في المواد العلمية .. ولذلك اخترت الأدبي
وأهلي شجعوني جداً جداً على قراري وقالولي كل إنسان بيتميز في مجاله الناس بتحترمه وإن الإنسان هو اللي بيعمل اسم للتخصص مش التخصص هو إللي بيعمل الإنسان .. ودي كنت حاجة محترماها جداً في أهلي إنهم بيفكروا بالطريقة دي .. ولغاية دلوقتي بدعي ليهم إنهم مكانوش عائق في اختياري للحاجة إللي عايزه ادرسها
ما هو هدفك؟ وما هي نظرتك لنفسك؟
من ساعة ما اخترت في التشعيب الشعبة الأدبية وأنا حاطّه في بالي إنّي عايزه أطلع الأولى على الشعبة والحمد لله ربنا كان كريم والهدف أتحقق.
والصراحه كنت بذاكر بكل ما أوتيت من قوّة عشان أحقق الهدف ده… على الرغم من إنّ فصلي في المدرسة مكنش بيشجع أوي على المذاكرة(لأن مدرستي مشهورة بجودة الشعبة العلمية وردائه الشعبة الأدبية )
فعانيت كتير مع فصلي من ساعة ما دخلت أدبي .. لإنهم كانوا عكس أي دفعة كنت معاها ومش متوافقين مع أهدافي لدرجة إني مكنش عندي أي صحبات من الأدبي ودايماً كنت لوحدي أغلب الأحيان بس الموضوع للأسف في الأواخر كان بدأ يأثر نفسياً (ودي نصيحة للطلاب لو مكانك الدراسي مفيهوش أصحاب صالحين افضل أنّك تقعد لوحدك من إنّك تصاحب أي حد وخلاص مش متوافق مع أخلاقك ولا أهدافك)
ورغم إنّي تعبت جامد بس دايماً كان عندي يقين إن ربنا هيعوضني عوض كبير وده بالفعل إللي لقيته يوم النتيجة الحمد لله ومكنتش مصدقة ..
صحباتي كلهم من ساعة ما عرفوا إني هدخل أدبي كانوا بيقولوا ليا هتبقي الأولى على الكويت بس بردوا مكنتش متأكدة يعني ..
وأكييد فرحانه جداً الحمد لله باللي ربنا كرمني بيه ويعني حسيته دافع إني اقدم أكتر إن شاء الله في الجامعه بإذن الله..
ولسه مش مصدقة النتيجة لحد انهردة.
كيف كنت تنظمين وقتك بين المذاكرة والمهام الأخرى؟
ظروفي شوية كانت مختلفة لإن ماما نزلت مصر من وأنا في 8 متوسط لظروف صحية وإللي كانت أول صدمة بالنسبالي
.. وبعدين أختي نزلت مصر وأنا في 9 متوسط ف كنت لوحدي أنا وبابا 9, 10, 11 , 12 ..
كانت أصعب سنين ولكن دايماً رحمة ربنا بتبقى في أي اختبار للإنسان، وده خلاني أكيد أتحمل مسؤولية البيت وإني أقوم ب أعمال المنزل كاملة .. بس دايماً كنت بردد لما بتزنق في امتحان وإني أغسل المواعين مثلاً لا يكلف الله نفساً إلا وسعها وأقوم معيطه😂
بس سبحان الله كنت بلاقي بركة رهيبة في وقتي وتوفيق حتى لو مثلاً حسيت إني مقصرة في مذاكرتي .. وكنت بحس لازم أتحمل المسؤولية إللي ربنا حاطتني فيها …
ف كنت بعمل شغل البيت إللي بحاول أخلصه بسرعه وأكمل مذاكرتي واتصل ب ماما وأختي واقعد مع بابا وهكذا ..
بس بما إن نسبتنا تراكمي فبردوا المذاكرة هي اللي كانت غالبة معظم الوقت
والدي هو الجندي المجهول
وهنا أذكر دور بابا إللي كان قايم بدور الأم والأب وعلى قد ما بيقدر كان بيتعب عشان يخفف عنّي، وكان مراعي جداً الظروف النفسية والدراسية ف هو الجندي المجهول
ربنا يباركله يا رب ويعوّضه عنّي كل خير ويسعده ويباركله في صحته
علما بأن الوالد يعمل مدرس كيمياء بمدارس الكويت.
هل كنتِ تمارسين هواياتك أم كنتِ متفرغة للمذاكرة والدراسة؟
الصراحه أنا من نوع إللي ألعب جامد جامد في الأجازة .. ومش ببدأ عمري الدراسة من الأجازة أو إني آخد دروس ..
وأذاكر جامد في الدراسة.. ف بالنسبالي أول ما الترم يبدأ ف هو للدراسة فقط وأكيد طبعاً بخرج مع أهلي أو أصحابي ..
بس يعتبر مش بعمل حاجة جانب الدراسة زي إني أرسم / اقرأ كتاب / ألعب رياضة ..
بس بشترك في المسابقات العلمية والمعرفية على مستوى المحافظات إللي كنت بعتبرها من هواياتي.
ما هو تأثير القرآن في حياتك؟
في 3 ثانوي وبعد ما اشتركت في المشروع ولأول مره بعد انقطااع ألتزم بكمية حلوة من القرآن كل يوم .. حسيت ب بركه في وقتي، القرآن حقيقي فرق جداً معايا فعلاً “ما زاحم القرآن شيئاً إلا باركه”
هي بجد مش بتتشرح لإن الحاجات الروحية العقل مش بيستوعبها بس الإنسان إللي جربها هو إللي بيعرف طعمها.. كنت في الأول خايفة القرآن يأثر على مستواي أو إنه ياخد الوقت بس بجد كل ما الإنسان بيزود قراءة القرآن كل ما البركة في الوقت بتزيد يعني العلاقة طردية
ما هو طموحك يا نور، وما التخصص الذي تنوين دراسته؟
تقريباً إن شاء الله هبقى في مجال اللغات أي لغة تحديداً لسه مش متأكدة بس يمكن ألماني / روسي / صيني ….
لسه معرفش أي مجال هيكون الخير ليا بس طموحي إن أي مجال أدخل فيه ربنا يسخرني ويوفقني لخدمة المسلمين فيه.
نور زياد، ما هي النصائح التي تودين تقديمها لطلاب الثانوية العامة في نقاط محددة؟
- عقد النية في المذاكرة إنه ينفع بيها نفسه وأهله والمسلمين لإنها بتهون تعب المذاكرة. 😮💨
- عدم التشتت بكذا مصدر للدراسة . 😵💫
- الدعااااء سلاح الطالب 📚⚔.
- إيااكم واليأس لإن كله بيعدي 🚘 🐾
- مبدئياً محدش بيبدأ قبل المدرسة بشهرين😂
- متسمعش أي إشاعات 👂🎧 وركز مع نفسك وبس🎯 وأبعد عن شخصين إللي بيقول إنه ختم المنهج ٤ مرات وإللي بيقول إنه مفتحش الكتاب من أول السنة😂
- لو شاطر أشرح لغيرك إللي مش فاهمه كصدقة من علمك ..💸📚
- احنا مش في معتقل ف اخرج واتبسط مع أهلك بس المذاكرة الأول 🚓
- متتكلمش كتير عن ذاكرت ايه أو مراكم ايه
- ١اقفل السوشيال ميديا واستمتع في البريك بأي حاجة ثانية
- بر بأهلك وصّلي وتوكل على الله ودي حاجات أساسية..👩👩👧👧
- أدرس أي فرع بتحبه علمي /أدبي ومتسمعش لرأي الناس فيه لو نجحت فيه إللي كانوا بيمنعوك هيصقفولك 👏
شكرا لك نور ذياد على هذا الحوار الطيب، تتمنى لك أسرة كوكب المعرفة دوام التوفيق.
