كيف تكتشف النصاب بوضوح

الإعلان والحقيقة

الإعلان والحقيقة

الإعلان والحقيقة | كيف تكتشف النصاب بوضوح
كتب : حسين بكري

عزيزي المغفل الكسول الطماع اللي معاك قرش محيره وعايز يطيره..
نحن نساعدك لاختيار نوع الكف الذي ستأخذه على قفاك.

قبل ماتشترك:
– نعلمك صنعة ونبيعلك الماكينات والمواد الخام ونشتري منك الانتاج.
بعد ماتشترك:
– انتاجك غير مطابق بيعه بمعرفتك.

 

قبل ماتشتري:
– اشتري جملة ولو مابعتش ممكن ترجع المنتج.
بعد ماتشتري:
– لأ معلش انت شاريه من اسبوع والكيس إتبهدل والبضاعة خرجت من المخزن.

 

قبل ماتتداول:
– تداول معنا بأول رصيد ١٠ دولار هدية.
بعد ماتتداول:
– انت كسبت ٢٠ دولار وعشان تاخدهم لازم تدفع ٥٠ .

 

قبل الشبكي:
– اشتري منتج يساوي ١٠ جنيه ب ٣٠٠٠ جنيه ولو بعت لصحبك زيه( لو بعت صاحبك زي مااتبعت) هاتاخد ١٥٠٠ جنيه.
بعد الشبكي:
– لازم كل اصحابك يبيعوا اصحابهم والا مش هتكسب زي المستر الوحيد في مجموعة من ١٠ الاف فرد اللي متصور جنب العربية اللي ب ٤٠٠ الف جنيه اللي كسبها بعد مادفع معارفه ومعارفهم
(٣ الاف للسلعة × ١٠ الاف فرد= ٣٠ مليون)

 

قبل ماتساهم:
– ساهم في شركة مساهمة واقل قيمة مساهمة ٥٠ الف جنيه وليك فرصة عمل انت واولادك وربح سنوي متوقع ٣٥% والضمانات بشيك.
انت هتساهم في ايه؟:
– في شركة اموال ومالكش دعوة بادارتها لا انت ولا ولادك، وشيك ايه وانت مفروض تأخد اسهم رسمية بمساهمتك..لو خدت يعني.. ومافيش ربح سنوي متوقع من غير دراسة جدوى،وحد فاهم يعملها تقييم ،وتقييم لادارتها،وتقييم لمصداقيتهم.

النصب:
– محتاج تمويل لعملية توريد لمدة شهر بربح ٥٠%.
الحقيقة:
– طيب ده انت لو قلت لاي تاجر هيدخل معاك بالبضاعة ويقبل ب ١٠% واقل.

 

قبل الدفع
– باشتغل في الادوية/تجارة جملة/تربية حيوانية/بيع بالتقسيط.. ومحتاج سيولة كبيرة وربحك شهري ٣% وفلوسك مضمونة بشيك وايصال امانة.
وقت الحساب:
– معلش نتحاسب اخر السنة انا ماعملتش الجرد ولو عايز تخرج..هات حد مكانك.

 

يالله نساهم:
– هانعمل مساهمة في حتة ارض كبيرة وليك شقة ياتبيعها ياتسكن فيها.
يالله نقسم:
– معلش المرافق.. السيولة..الترخيص.. المشروع وقف..خد حتة الارض انت و٥٠٠ مساهم وإعملوا عليها مظاهرة..انتم حرين في ملككم.

تعرف النصاب بأيه:
١- يقولك شيك او ايصال امانه..مع انها عملية تجارية يعني تكون بعقد.
٢- مايكونش ملهوف على فلوسك..ولازم انت تتحايل عليه عشان ياخدها وينصب عليك.
٣- تلاقيه مفصل لك موضوع على مقاسك.. يعني انت مغترب..يقولك هاادفع للعيال الربح شهري عشان المصاريف،
و لو مقيم وعايز تستثمر ..يقولك انت مدير في المشروع، وبعدها لاتشوفه ولاتشوف مشروع،
ولو نفسك في شقة..يلعب عقاري، ولو نفسك في وظيفة يوعدك بوظيفة، ولو عايز تضحك عليه وتعرف سر شغله..هيروقك ويضحك عليك.
٤- مجرد قبولك لعملية غير قانونية او ربوية او استغلال لطرف آخر..يخليك نصاب زيه.
٥- غاويين وبيحبوا وبيفضلوا وبيختاروا الناس الجامدين الواصليين واللي صعب حد يضحك عليهم واللي ممكن يجيبوا حقهم عافية..عشان دول بيطمنوا بقية الناس ان مافيش مشكلة ولو حصلت هتتحل.
(معلش لو مش فاهم الجزء ده..هتحتاج وقت تقرأ وتفكر تاني).

أخيرا:
١- الشراكة والتمويل والمساهمة..أدوات استثمار جيدة وحلال..لكل من لايستطيع عمل مشروع..ولكن لها قواعد قانونية وتنظيمية ورسمية.
٢- أمانة عليك ماتبعتش تقولي ايه رأيك في شركة كذا للاستثمار سريع الطلقات؟أو تبعتلي عقد او دراسة جدوى اعملهم تقييم.. أنا مااعرفش كفاءة مديرينهم ولا ذمتهم ولامصداقيتهم.
٣- ماتزعلش مني لو حد استثمر وكسب، وانا بكلامي ضيعت عليك الفرصة..نص اللي بيستثمروا مع الناس دول بيشتغلوا معاهم او عايزين حد يدخل..عشان يخرجوا.
٤- اعذرني لقلة معلوماتي او لتقادمهما لاني من جيل قديم ومن مدرسة ( الفلوس مابتجيش الا بالشقا) لا اعرف في التعدين ولا التداول ولا بناء الثروة، وقريت الف كتاب عن الحرية المالية..مافهمتش كلمة منهم.

Tagged , , , , , , , , , , , , , , . Bookmark the permalink.

Comments are closed.