ماذا تعرف عن اضطراب الشخصية الحدية
كتبت : منه زين
النهارده هتكلم عن موضوع مهم تحت عنوان “اضطراب الشخصية الحدية/الاندفاعية“..
ايه هو اضطراب الشخصية الحدية؟ وليه هو موضوع النهارده؟
هبدأ بالسؤال التاني…
لأن إجابة السؤال الأول هتبقى طويلة وهي المحتوى كله اساسا..
طيب انا بكتب البوست ده مخصوص عشان انا من الناس اللي اتشخصوا باضطراب الشخصية الحدية (BPD/ borderline personality disorder)
وكنت حابه اقرأ عنه وفي نفس الوقت اعرف الناس اللي عندي انا وغيري من اللي حواليهم بنمر بإيه بشكل خاص وبمعلومة جديدة بوجه عام
زي ما اتعودت اشارك معاكم محتويات علمية قبل كده…
طب ي ستي شكرا ربنا يسلمك من كل مكروه..
ايه هو بقى اضطراب الشخصية الحدية؟
بص حواليك كده … بص بقولك لا إله إلا الله باصص لي انا ليه!
شفت سمير جارك اللي اتخانق مع عم احمد البقال تحت وضربه ضرب مبرح عشان قاله الشيبسي ابو جبنة متبلة خلصان؟
جيت انت بقى سألته ليه عملت كده والموضوع مش مستاهل يعني! رد قالك ايه؟
قالك “ماحسيتش بنفسي”
صح؟ قالك ايه تاني؟
“بص لي بقرف وراح مبرطم”
أممم…
طب بص تاني كده…
مالها نادية؟ ايه؟
زعلانه وكانت بتقول عايزه تنتحر؟ وبتعور نفسها؟
ماقالتش ليه طيب؟ أممم
طب ركز شوية تاني يمكن نلاقي لنا مثال كده…
عم حسن كل شوية يتخانق مع مراته وصوتهم جايب اخر الشارع؟ مره واحده كده؟
لا حول ولا قوة الا بالله ده كانوا سمنه ع عسل!
اكيد محسودين… والله اقولك جايز..
وجايز يكون عم حسن او مراته، وسمير ونادية عندهم BPD أو اضطراب الشخصية الحدية
اللي بمقتضاه بيفقد الشخص القدرة على السيطرة على مشاعره ومابيبقاش قادر يعمل مهامه اليومية عادي زي اي حد
مش عشان كسول ومش عشان بيتدلع، لأ
علشان هو بيعاني فعلا ويمكن مايكونش عارف انه بيعاني وبيسمع كلام اللي حواليه اللي بيتقال بدون علم وبيخزنه في دماغه ويتعب اكتر كنتيجة لده…
اضطراب الشخصية الحدية بيأثر على نظرة الإنسان لنفسه بشكل واضح..
وبيفضل حاسس بالخوف طول الوقت، خوف من الوحدة وعدم استقرار من جميع الجوانب،
متقلب المزاج شوية تلاقيه مبسوط ومهيبر وشوية تلاقيه قافل على نفسه ومش طايق حد..
بيبدأ يظهر عليهم علامات ال low self esteem وال insecurities بتاعتهم بتبهدلهم
ده غير انهم بيفصلوا نفسهم عن الواقع وما يدور من حولهم (dissociation) لدرجة انك ممكن تقول عليهم باردين او متبلدين الشعور…
اكتر ناس عرضة لل panic attacks واكتر ناس هتسمعهم بيقولوا “مش حاسس/مش حاسه بحاجه”
الطيش من أبرز الأعراض هنا…
ايوه سواق الميكروباص اللي ركبت معاه امبارح وساق ع أعلى سرعة وهو ف ايده سيجارة حشيش سلوكه يتصنف تحت بند الطيش
والبنت اللي وافقت تروح مع صاحباتها حفلة مشتركة بنات وولاد وكان في خمرا وسجاير بردو تصرفها تصرف طايش
نادية اللي بتأذي نفسها وعايزه تنتحر ومقطعه الدنيا برا ضحك ولعب وجد وحب متصنفه بمرض BPD ومحتاجه علاج ضروري
سمير اللي فقد أعصابه وماقدرش يتحكم فيها وضرب البقال عشان سبب تافه ده عنده اضطراب BPD…
طب ايه السبب يا منه ايه اللي وصلهم لكده؟
بص يا حبيبي الله تعالى أعلى وأعلم والموضوع دايما نسبي من شخص للتاني…
لكن ممكن قوي تكون عوامل وراثيه، أو اضطرابات عقلية معينة
بيبقى في مناطق معينة في المخ بتتأثر فبتأثر سلبيا على عواطف الشخص ودوافعه أو ميوله
نسبة لحدوث خلل ف المواد الكيميائية زي السيروتونين على وجه خاص فبيخضع لعلاج ومن خلاله بياخد أدوية بتساعد على تعديل مزاجه .
وممكن ال traumatic events زي ان شخص يفقد شخص عزيز فيفضل خايف طول عمره من فقدان شخص عزيز تاني وهلم جرا…
المرور بطفولة سيئة… سمعتوا عن ال child abuse ؟
ايوه اننا نسئ لطفل ونتعدى عليه سواء جسديا أو نفسيا… حتى لو عشان مصلحته…
تخيلوا ان انتوا كده كنتوا سبب ف تكوين شخص مشوه نفسيا وبيعاني بمرور الزمن؟
طب ايه المضاعفات اللي ممكن تحصل لو ما اديناش الموضوع أهمية؟
لا ده انت تعد معايا بقى وتجيب صوابع ايديك ورجليك وصوابع سميرة واحمد البقال ونادية وعم حسن ومراته كمان…
خساير فادحة فوق ما تتصور
خساير وظيفية وتعليمية وعاطفية واجتماعية وأي حاجه آخرها (إيّة)…
ماتستغربش لما تلاقي واحد رمى نفسه من فوق برج القاهره ومتشبث قوي بالموت…
ببساطة مش شايف الحياة فارقه له في حاجه وماحدش يطلع لي زي الخازوق يقولي انتي بتبرري الانتحار
انا بقولك معلومة لكن مابنحازش لجهة معينة صديقي القارئ… فماتصدعنيش…
ماتستغربش بردو لما تلاقي حد بيعمل cutting now مش التريند لا، ده الكاتينج اللي بجد بقى مش بتاع الناس الاتنشن اللي محتاجين علاج بردو
آه ياني، طبعا امال فاكرين ايه؟ هو احنا حد فينا سليم!
ماتستغربش لما تلاقي واحده عدت ال٥٠ وجايبه طفل وبعدها بسنه بقت ف ال menopause/ سن اليأس
ماتستغربش لما تلاقي حد في علاقة توكسيك ومش قادر يطلع منها… او يعترف حتى انها توكسيك…
حبايبي وصحابي الماسوكيستس (masochists) اين انتم؟
وماتستغربش لما تلاقي couple لطيف وبيطلع فراشات مره واحده اتقلبوا ع بعض وفي مشاكل مستمرة
توصل للمحاكم والطلاق بل والتلقيح ع الواتس احيانا ب “اللي باعنا خسر دلعنا” والذي منه…
وأخيرا وليس اخرًا لو فتحنا لك زنزانة ف قلب السجن ولا اتنين جايز جدا تلاقي واحد فيهم من اللي بنتكلم عليهم دول..
لأنهم م الاخر معتلّين اجتماعيا وغير مؤهلين نسبة لشدة حالة كل شخص فيهم انهم يتعاملوا مع حد إلى أن تتلاشى بعض او كل هذه الأعراض..
دي صورة اجتماعية…
صورة تقريبية للمضاعفات اللي ممكن يعانوا منها بردو:
الاكتئاب depression
إدمان الكحوليات alcoholism / المخدرات drug addiction
اضطرابات القلق anxiety disorders
اضطرابات الأكل eating disorders
اضطراب ما بعد الصدمة (PTSD/ Post traumatic stress disorder)
اضطراب نقص الانتباه مع فرط النشاط (ADHD/Attention deficit hyperactivity disorder)
واضطرابات تانية جائزة الحدوث…
ومنها مضاعفات أنا بعاني منها فعلا
ومش عايزاك تكرر غلطتي وتفضل تتجاهل مرضك لفترة طويلة وتوهم نفسك انك هتبقى كويس…
وعمر ما التعب هيقلل من قيمتك كشخص قيمة اللي بيسخر منك هي اللي بتقل
وقيمة الشخص بتزيد لما بيفتح عقله وبيتقبل اي معلومة جاياله وبيقاوم ويعافر عشان يبقى احسن.
مطلوب منك ايه كقارئ؟
تسمع الكلام وتخضع للعلاج وتتوكل على الله لو حاسس ان في شئ غلط بيحصل ومش قادر تترجمه
ومطلوب منك كقارئ بردو تاخد بالك من حبايبك اللي حواليك ولو عندك حد بيمر بنفس الظروف
حاول بقدر الإمكان تحتويه وتساعده يخضع للعلاج غير كده “لا يكلف الله نفسا إلا وسعها”
سلامٌ عليكم وبالشفاء للجميع.
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
