اضطراب ثنائي القطب
كتبت: منه زين
موضوعنا النهارده عن:
Bipolar disorder/Manic depressive psychosis
(اضطراب ثنائي القطب/ الذهان الهوسي الاكتئابي)
ركز معايا في الاسم كده وقولي لقطت منه ايه؟ ايوه… كلمة (ثنائي القطب)… دايما كنا بناخد في الفيزياء ان المغناطيس له طرفين، صح؟ طرف سالب وطرف موجب… حلو… وزي ما المغناطيس له طاقة او مجال البني ادم بردو له مجال يعني حتة بتاع زي ده احسن مني ف ايه يعني؟ هه؟ حد يرد عليا؟ انا كبني ادم ساعات بحس بالحزن وساعات بالفرح بردو مش من حقي اخد فرصتي ويتضرب بيا المثل في الجاذبيه زي المغناطيس يعني؟ ايه؟ انجز؟ حاضر… اهو اللفة دي كلها ي سيدي عشان اعرفك ان اضطراب ثنائي القطب ده بقى متعلق بمزاج الشخص… بكيفه… الناس كلها تقول “كيفي كده” إلا شخص عنده اضطراب ثنائي القطب لأنه مش عارف هو كيفه ايه بسبب تغير مزاجه بشكل سريع…
يعني ال bipolar disorder ده قولا واحدا بيركز على المزاج؟ ايوه وممكن تجاهل عدم اتزان المزاج ده والتهاون فيه يعمل مشاكل تعيق الشخص المريض من أداء مهامه اليومية زي اي حد ولا قدر الله ممكن توصل لنتايج تانيه ابرزهم بيننا الانتحار…
سمعتك… اه كلنا عندنا تقلبات مزاجية بس م تقارنش نفسك بشخص بيعاني من ده ف فترات زمنية متقاربة جدا في حين إن انت ممكن تكون زعلان النهارده وبكره مفرفش ودنيتك ماشيه عادي… لأن هو ممكن يحصله ده في غضون دقايق…
هات ايدك بقى وتعالى كده اعرفك على ٣ أنواع للمرض ده:
١- عندنا (اضطراب ثنائي القطب الهوسي/ Unipolar):
وده بيحس الشخص فيه بهيبرة، ببهجة مبالغ فيها، نشاط وفرط حركة وكلام وهات يابني المشروع ده نشتغل عليه انا حاسس اني ف قمة ال productivity دلوقتي، بس مش عارف هيكلف كام، وبعدين ده انا مديون ومش عارف هسدد اقساط العربية للبنك ازاي بعد م شركتي فلست، ده حتى مراتي سابتني وخدت العيال ومشيت، هه، اما اقوم اشغل عمرو دياب… ايوه الشخص اللي قلبها دراما قدامك ده وكان ف قمة الفرح والسعادة والزقططه من شوية عنده bipolar disorder بس الهوس عنده أعلى… زي م اتفقنا عندنا قطبين يعني القطبين موجودين بس طرف فيهم له تأثير أعلى من التاني التأثير الأعلى هنا له علاقة بالطرف الموجب (الهوس/البهجة)
ده حلو؟ لأ مش حلو… انت كأنك بت deal مع شخص سكران… حاسس بالسعادة والهيبرة بس النتايج مش هتعجبه ولا هتعجبك ولا هتعجب حد خالص…
٢- (اضطراب ثنائي القطب الاكتئابي):
هنا بنميل للطرف السالب، بن exaggerate ال amount بتاع الكآبة أضعاف أضعاف مقارنة بالهوس…
ساعتها حالة الهوس هنا بتتسمى (hypomania)
٣- الحالة التالته بنسميها (Rapid cycling):
ميكس بين الاتنين اللي فوق… متخيل ال maze اللي بيخش فيها شخص عنده bipolar disorder ؟!
طب عشان نفرق بين شخص عنده bipolar disorder وشخص بيعاني من اضطراب المزاج الدوري (cyclothymia) نعمل ايه؟ ماتعملش حاجه مش شغلتك دي شغلانة الدكتور :””””” بس هقولك الفرق بين الاتنين حاضر…
باختصار:
ال cyclothymia او اضطراب المزاج الدوري بتبقى تقلبات المزاج فيها مش شديدة ومش خطر زي بتاعة اضطراب ثنائي القطب بس بتدوم لفترات طويلة وبناءا على ده ممكن نلاقي الشخص فجأة أصيب باضطراب ثنائي القطب… اتفقنا كده؟ يعني ده ممكن يحصل نتيجة لده لكن مش شرط…
نعتبر ال cyclothymia خط مستقيم و ال bipolar disorder خط مستقيم، الاتنين جايز يتقاطعوا وجايز جدا لأ… اتفقنا؟ اتفقنا.
نيجي بقى للأسباب:
صلوا على محمد…
فاكرين المقالة اللي فاتت؟ أيوه عن ال borderline personality disorder… مش كنا قلنا أسبابهم؟ حد فاكر؟ لأ! طيب نقولهم تاني…
* اما عوامل وراثية
* وإما في مناطق معينة في المخ حصل فيها خلل فلازم ناخد أدوية تعدل المزاج نسبة لتعديل المواد الكيميائية زي السيروتونين كده وده هرمون وناقل عصبي لو زاد بشكل معتدل بيكون مودنا مظبوط قل او زاد بشكل مبالغ فيه يا بيحصل هيبرة يا بيحصل اكتئاب واضطرابات قلق ومشاكل تانية متعلقه بالمزاج… ايوه يعني يوم ما حد يسألك عامل ايه النهارده قوله هعدي ع السيروتونين اشوف خططه ماشيه ازاي واقولك بعدين…
* قلنا بردو ان ضغوطات الحياة كفيلة تخرج الواحد عن شعوره وده بجد مش هزار
* الأمراض البدنية وماتستغربش لأن ال physical issues نعتبرها القفل وال psychological issues هي المفتاح الاتنين مايستغنوش عن بعض مشكلة هنا تعادل مشكلة هنا… عشان كده لازم نهتم بالاتنين على حد سواء.
استنى هنا انت رايح فين؟ انا لسه ما خلصتش كلامي… هو لسه في كلام؟ اه لسه في كلام…
لسه ما اتكلمناش ع الأعراض ي أستاذي العزيز :””””
مش احنا قلنا فوق ان ال bipolar disorder ٣ أنواع؟ ي سالب (اكتئابي) ي موجب (هوسي) يا مشترك؟
طب تعالى اقولك اعراض اتنين فيهم واستنتج انت التالت…
١- الجزء المتعلق بالاكتئاب:
خلينا بس نتفق اننا عندنا ٤ محاور (محور عاطفي، عقلاني، بدني، سلوكي)
(الجانب العاطفي) هنا بتبقى اعراضه:
* الشعور بالحزن
* فقدان الاهتمام او الشغف
* فقدان الثقة بالنفس
* اليأس
* فقدان القدرة على أداء المهام حتى لو بدت بسيطة
* هياج عصبي
* ميول انتحارية
طب( الجانب العقلاني)؟ طريقة التفكير يعني؟
اقولك ي سيدي
* فقدان التركيز
* عدم القدرة على اتخاذ القرارات حتى لو قرارات بسيطة زي انك مش عارف تعمل اشتراك للجيم ولا تروح بالكلاسات :””””
طب (البدني)؟
عركاااااه بص ي سيدي… مليطة…
اضطرابات في النوم والاكل، إرهاق مزمن وإمساك وفقدان للرغبة الجنسية…
يعني لا اكل ولا شرب ولا نوم ولا حبيب ولا غريب ولا قريب
طب فين( السلوكي) من كل ده؟
* هقولك بسيطة… انا شخص خلقه ضيق وبيزهق بسرعه او بفقد شغفي وحماسي بسرعه… هتقولي اقول اخلص التاسك قبل الديدلاين هقولك مش قادر… طب أبدأ تاسك غيره من التاسكات المتراكمه يمكن الحق نفسي؟ هقولك بردو مش قادر…
خلاصة القول: ماعنديش طاقة لا أبدأ شئ ولا أنهيه
* وبعدين انا حاسس ان انا عايز اعيط بعد اللي بكتبه ده ياخي حال البني ادم يحزن و بعدين اشمعنى امي جابت لاخويا من ١١ سنه التيشيرت النبيتي وانا اللي شاورت عليه الاول؟ بتقول ايه؟ م جاش مقاسي؟ مش موضوعنا… اشمعنى؟ اشمعنااااه :”””””””
ايوه خلاصة القول بردو: دراما كوين هنعيط وعايزين نعيط وبنعيط
*استنى كده انا بكتب ده ليكوا ليه اصلا؟ انا اساسا مش عايزه اكلم حد… مش عايزه اناقش حد… مش عايزه اشوف حد ولا اسمع حد….
لا ده المثال ياض م تاخدش ع خاطرك كده… خلاصة القول؟ قدرت تفهمها؟ لا بردو؟ طيب خلاصة القول ي عمنا كلمة واحده… isolation
هخفي نفسي… هنعزل عن العالم… أوضتي أولى بيا
كده الجانب المتعلق بالاكتئاب خلص… اتفضل اطلع برااااا
بس بس انت صدقت؟ عشان تعرف انك مش مركز… لسه في جانب كمان ي أستاذ…
٢- الهوس
وزي م قلنا ما ننساش ال ٤ محاور… عليهم ٥ درجات أعمال سنه دول خلي بالك… يتكتبوا لي كاملين في الشيت معلش…
(العاطفي):
* شعور بسعادة وحماس مبالغ فيهما
* مين اللي رأيه غلط؟ انا ؟ يعني انت بتكدبني وبتكدب العلماء والأطباء النفسيين عشان ترضي غرورك ي جاهل ي عديم الفايده ي ضلالي؟
(ايوه مبالغة في رد الفعل لما حد يخالفك الرأي)
* اكيد هيموت ويكلمني… *قاعد في عالم موازي بيلعب طاولة مع صاحبه كمونه في قهوة من القهاوي الغير مجاورة لبيته عشان ابوه مايشوفهوش وف ايده الشيشه*
اتعودنا نقول خلاصة القول بعد الشرح صح؟ يبقى هنا احنا حاسين بأهميتنا البالغة في حياة الناس… ف حين إن احنا مش محور الكون عادي والدنيا مش هتقف علينا…
(العقلاني):
* طبعا حالة ال enthusiasm وال joy ال eternal اللي عندي محسسيني إني عندي طاقة اقدر ابذل بيها مجهود ذهني واديك شوية creativity ونعلي الإنتاجية وهطلعكوا غصب م الاجتماع مسقفين لي بس مستغربين من حركتي المفرطة والبعض اشتكى من سرعة كلامي… بس ستيل جامد ومعلّي عليكوا ف الاجتماع…
* و بعد م رجعت اجيب المفاتيح من مكتبي… ايه ده انا عايز اكل اندومي… هو الكلام بيمشي ف سلك التليفون ازاي!
اه ي صديقي بطلع من موضوع اخش ف التاني ومافيش اي link ما بينهم وبين بعضهم
* هلاوس سمعية… ايوه انا سمعت خالتي بتناديني من بير السلم وحياة ربنا…
بتقول ايه؟ ماحدش تحت!!!! جايز… لا هو مش جايز هو سمع وسمع بجد والموضوع بيتكرر معاه مش صدفه
تالت محور، يا مسهل (البدني):
شفت الاكتئاب فوق؟ نعكسه هنا لو سمحت… أظن مافيش أسهل من كده…
* الإحساس بطاقة مفرطة
* مش عارف انام…. مش عارف انام ي ولاد ال….. مش عارف انااام
اما اقوم اكتب رواية وقتيييي
* البت أمل مالها شكلها حلو النهارده ليه كده!
احم… اه انت فهمت صح (زيادة الرغبة الجنسية)
آخر محور (السلوكي) واقولك بعديه خد شنطتك وكتبك واتكل على الله:
* انا عندي فكرة مشروع بمليون جنيه… فعلا مش كلام :”””
انا قلت لك هعمل حاجه وكنت متأكد من ده ساعتها بس الحاجه دي الماتريالز بتاعتها طلعت اكبر من شخصيا وهتحتاج وقت ومجهود ومادة جبارين… فاعذرني ي باشا انا عيل صغير… يبقى هنا اتخاذ قرارات تفوق قدرات الشخص.
* اللي كانوا ف الاجتماع كانوا مستغربين من فرط الحركة وسرعة الكلام صح؟ هو كده بالظبط. نشاط زيادة بينتج عنه الحاجتين دول
* انا متضايق انا متضايق وعايز اولع فيها عليا الطلاق لاهددها بصورها وهي بالبيجاما النبيتي وهي قاعده ف بيت منال صاحبتها… اتعكشت واتحبست وعمها طلع لواء! أني آسف
ايوه اتخاذ قرارات اندفاعية ممكن تكون عواقبها وخيمة ، م الاخر، (الطيش)
* عدم الانضباط… انا هتريق عليك وهخلي الكل يضحك عشان هم مهزئين وانا شخص مش سوي ومش متزن…
طرق العلاج:
بتبقى إما بالعلاج السلوكي المعرفي أو بالأدوية…
طبعا خلاص احنا ومضادات الاكتئاب بقينا صحاب… فآه مضادات الاكتئاب والقلق أحد العلاجات اللي بياخدها شخص عنده اضطراب ثنائي القطب.
وبعد اذنك ياللي بتقرأ ، على راسي من فوق مجيتك والله بس لو مافيهاش إساءة ادب ماتفضل توهم نفسك انك عنده نفس الاعراض ويالهوااااي ده انا ب relate فشخ للي بتقوليه ده وحاسس إني bipolar سيكا عشان دي مش شغلانتك والاعراض مش بسطحية الكلام هنا وبتبقى شديدة ومتكررة مش ثانوية وبتحصل من وقت للتاني لأن كلنا كده… وياريت نتفرج ع أفلام لها علاقة بال topics ال psychological دي عشان نفهم أبعاد الشخصيات اكتر مش مجرد كلام بي get stored وخلاص كل م الموضوع visual اكتر كل م المعرفة بتزيد والمعلومة بتثبت…
دمتم سالمين وكل الدعم لأحبابي اللي بيخضعوا لعلاج نفسي أو بيفكروا لسه، خد الخطوة ياض وبطل تردد، وكل الحب والدعم لكل الناس اللي عندي هنا ف البروفايل و…
سلام.
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
Really interesting subject and informative article, it’s well written and also well costructed, presenting the reader the necessary information to understand the topic