كيف تهزم الإكتئاب ؟ عدوك الخفي

شارك هذا الموضوع
الاكتئاب

الاكتئاب​

الاكتئاب
كتبت: منه زين

السلام عليكم

أتمنى يكون الكل بخير

وزي ما عودتك يا عزيزي القارئ على الوضوح التام في مقالاتي…

من الاخر مابنزينش الحقايق حتى لو وحشة…

وده عشان نعالج موقف…

الهدف من المقال دايما انه يخليك تتعامل في أسرع وقت…

أنا بحطك على alert mode وباخدك هنا وهنا وبفرهدك عناصر وشرح وطرق تعامل… من الاخر انا وانت بنفرهد في الرحلة الطويلة دي… لكن ان شاء الله كله بفايده…

وزي ما عودتك حط الخوذه وامسك كويس علشان هننطلق في رحلة جديدة من رحلات الاضطرابات النفسية…

سوسة الجسم… الاكتئاب… واحد من ضمن الاضطرابات النفسية اللي انا اتشخصت بيهم مؤخرا… وأخبث مرض شفته في حياتي بعد السرطان والعياذ بالله… هياكل فيك وانت مش حاسس… انا بكلمك النهارده عن تجربة شخصية انا بمر بيها…

خليني أعرفك الأول ايه الاكتئاب علميا:

علميا هو اضطراب نفسي بيلعب على المزاج… يوووه زهقنا… ما خلينا متفقين يا عزيزي القارئ إن أي اضطراب نفسي بيلعب على المزاج

على السيروتونين

على الهرمونات وبالتالي ماتستغربش لو بتعاني من مرض عضوي نتيجة لده…

أو العكس احنا قلنا ان الجسم والنفسية مرتبطين ببعض… وبيتأثروا ببعض…

فالاكتئاب هنا بيأثر على مزاجك… بيخليك مقفول من الدنيا… أبيض واسود! أبيض واسود…

الدنيا مالهاش طعم… مش حاسس بأي حاجه…

ماسك لنفسك كرباج… وبتلوم نفسك على الفاضي والمليان…

حتى على غلطات انت ما ارتكبتهاش…

الموت سيرته بتكتر على لسانك…

وبيبدأ مخك ياخد على وضع توكسيك يدخلك في مود “هيحصل ايه لو بلعت الدواء ده كله!” “طب لو نطيت من فوق السور” …

بتفقد الاهتمام والشغف بكل حاجه وكل اللي حواليك…

ومش قادر تركز حتى في المهام البسيطة…

لا انت مش كسول وخملان عشان انت بتدلع… ده لو انت فعلا مش بتدلع…

انت عندك اكتئاب…

أو ندلعه نقوله اضطراب اكتئابي…

وله أنواع هديك منهم شوية، تعالى نهدي السرعة ونبدأ بأول نوع/ أقصد بأول شارع:

“اكتئاب جزئي”

هنا الاكتئاب مش متلاحظ قوي… الشخص بيعاني اه… بس على الخفيف ويا خوفي من الخفيف يا بدران…

هو بيعاني بشكل ما يأثرش على وظايفه اليومية… بس هو زعلان وموده مش مظبوط…

ومابيتشخصش اضطراب اكتئاب جزئي إلا بعد سنتين على الأقل… وده علشان الاعراض هنا بتاخد وقتها في الظهور… وعلى قد ما هي خفيفة على قد ما هي سامة وبتنهش في البني ادم من غير ما يحس…

تاني شارع عندنا هو “الاكتئاب الموسمي”

هنا انا بسميه “البيات الشتوي” بالمعنى الحرفي…

الشخص بينعزل على روحه… ياكل ويشرب وينام… مافيش شمس… مافيش خروج… مافيش حاجه خالص… بيخش ف كهف ومابيطلعش منه غير لما الفصل يتغير… لأنه زي ما قلت بيات شتوي…

تالت شارع “الاكتئاب الذهاني”

الشارع هس هس… مرعب… يمكن الشوارع اللي قبليه كانت مضيئة شوية وتوحي ان في حياة بس مستخبيه هنا ولا هنا…

لكن ده بالذات مرعب… مقبض…

اكتئاب من النوع الحاد… أعراضه كلها واضحة وشديدة وساعات مصحوبة بهلاوس…

الشخص هنا ممكن يحلف لك على المصحف انه عنده الحصبة وهو واخد التطعيم أساسا بس هو هنا مش بينافقك ولا عايز اهتمام ولا بيمثل هو فعلا مقتنع انه تعبان…

الشارع الرابع “اكتئاب ما بعد الولادة”

الأم هنا بتهمل نفسها وطفلها… مابيبقاش عندها القدرة انها تعمل أي مهام يومية… حاسة بخمول… وعلى الأغلب بيتقالها جمل استنكاريه زي “انتي أم انتي!”

فالناس لازم يكون عندها وعي بالحالات اللي زي كده وتبطل تمسك لنفسها وللي حواليها كرباج…

الشارع الخامس معانا “اكتئاب ثنائي القطب”

فاكر ال 3 مراحل اللي بيمر بيهم شخص عنده اضطراب ثنائي القطب؟

راجع معايا المقال ده تاني على السريع قبل ما تكمل…

الشارع السادس “اكتئاب ما قبل الحيض” أو pms

بعبع بيخاف منه الستات والرجاله على حد سواء…

بيظهر فيه كل أعراض الاكتئاب بس بيستمر لفترة معينة ويروح لحال سبيله بعد الحيض أو أثناء فترة الحيض الموضوع نسبي من أنثى لأخرى…

طب تعالى ارجع بيك تاني لباب الهرمونات واتكلم معاك عن أهمية السيروتونين غير انه باختصار عبارة عن ناقل عصبي وهرمون بيأثر على المزاج…

هو في الحقيقة ليه وظايف أخرى بتتمثل في:

  1. سلوكك
  2. درجة حرارتك
  3. الميموري بتاعتك
  4. قدراتك على التعلم
  5. النوم
  6. النشاط الجنسي
  7. الجهاز الهضمي
  8. الجهاز العصبي والعضلي
  9. وصحة العظام

وأنا كان عندي خلل في كل اللي فوق دول… وعلاماتهم أو الأعراض بدأت بالتدريج تظهر…

مره اشتكي من رقبتي… فقراتي… أطرافي…

حالة كسل وخمول رهيبة…

مابقدرش أعمل أقل مجهود…

مش مريحة دماغي بقى… لأ انا متبلده في المرحلة دي…

مش حاسه بحاجه…

ماباخدش رد فعل في أي موقف… سلبية…

متشائمة…

عندي قولون عصبي…

بفكر في الموت كتير…

وبفكر في الانتحار كتير…

بس عشان انا عايزه أكون احسن انا خضعت لفحص طبي أكتر من مره عضوي… وخدت أدوية كتير… ومافيش نفع…

فقلت أكمل جميلي وأروح لطبيب نفسي يمكن كل ده يخف لما أبدأ علاج…

وقد كان…

طبعا الأسباب كتير أهمهم:

  1. نقص فيتامين د
  2. ورم في الدماغ
  3. الغدة الدرقية يا عزيزي طالب الثانوية العامة
  4. عوامل وراثية
  5. اضطرابات القلق
  6. الإدمان
  7. التعرض لضغوطات أو مواقف صادمة

فوق اديتك فكرة إجمالية عن الأعراض وأعراض كل نوع كمان…

لكن خليني أفصص لك الأعراض للاكتئاب العام هنا:

–         لأعراض نفسية

–         جسدية

–         سلوكية (بتأثر على سلوك الفرد في البيئة المحيطة بيه أو المجتمع بوجه عام)

يبقى عندنا 3 محاور منهم أول محور “النفسي”

1.    شعور دائم بالحزن

2.    قلة ثقة بالنفس

3.    فاكر اضطراب القلق؟

4.    فقدان الرغبة او الاهتمام بالأشياء أو الأشخاص المحيطين

5.    صعوبات في التركيز

6.    وبالتالي سلبية في اتخاذ القرارات

7.    ميول انتحارية

بالنسبة للمحور “الجسدي”

1.    أرق أو اضطراب في النوم

2.    يا تلاقي شخص مابينامش يا بينام زياده والاتنين مش حلو

3.    الكسل أو فقدان النشاط

4.    اضطرابات الأكل يا تاكل كتير يا ماتاكلش خالص بردو

5.    صداع مزمن وآلام في العضلات

6.    تقل اللسان أو الجسم… تحس ان انت حاطط الشخص المكتئب على سلو موشن

7.    اضطرابات الهضم بالصلاة على رسول الله

8.    فقدان الرغبة الجنسية…

9.    وبالنسبة للأنثى بيبقى في اضطراب في مواعيد الدورة الشهرية أو الطمث

المحور “السلوكي”

هيوضح لك هنا سلوك الفرد في المجتمع او ردود أفعاله تجاه اللي حواليه…

1.    عزلة

2.    انخفاض المستوى الدراسي

3.    وأحيانا والعياذ بالله الإدمان ساعتها الشخص بيهرب من حاجه خطر لحاجه أخطر منها…

“طب يا عم طالما انت زعلان كده ما تيجي افسحك ونلم الليلة يعني مش حوار”…

لأ حوار… وحوار مهم…

علشان توضح الفرق بين الحزن والاكتئاب لازم تكون عارف كذا حاجه:

1-   ان الحزن ده رد فعل طبيعي بيحصل في موقف يستدعي ده… الاكتئاب الشخص مابيديش فيه أي رد فعل… بيتصف بالجمود… أو العجز وبيبقى الموضوع بقاله فتره معاه وهو مش واخد باله انه تعبان… ده النوع اللي ربنا يعيذكم منه “بيكتم”… وبيراكم… وبيحصله shock أو صدمه تخليه يقف محلك سر في موقف يستفز الفرد عاطفيا… أو فكريا حتى… نقول كل الوظايف في أجازه لفتره معينه…

2-   الشخص وهو حزين ممكن اه ينبسط ويعدي الموقف بخروجة… الشخص الكئيب نظرته للحياة مختلفه ومش هيتأثر بأمور زي دي…

3-   الشخص الحزين ما بيفقدش الثقة في نفسه ولا بيلوم نفسه على حاجه… الشخص الكئيب شغال كربجه… مابيرحمش نفسه… وجاي عليها بزياده… زي ما انا جايه على نفسي وشغاله على المقال بتاعك أهو…

طب العلاج؟

–         علاج سلوكي معرفي طبعا

–         وعلاج كيميائي… يعني أدوية… يعني باكسيتين وباروكسيتين وسيروكسات وبروزاك ومرتيماش وجابيماش لعلاج الصرع والأعصاب وأنالارج كمهدئ وميلجا عشان الأعصاب بردو وأندرال عشان تظبيط ضربات القلب للي بيجيلهم بانيك أتاكس وبيعانوا من فقر الدم أو هبوط ضغط الدم… يعني كورتيلون… وحقن ديكسا… وركب يابني المحاليل وشيل يابني المحاليل… وشفانا الله وعفانا وإياكم

كل الأدوية دي جايز تمر على شخص بيعاني من الاكتئاب وكل حالة نسبية من شخص للتاني… وبتتصرف بروشته من الطبيب المختص وبتتاخد بجرعات معينة وبالتدريج ولها أعراض انسحاب زي ما لها أعراض جانبية بتظهر أول مره… أهم حاجة إنك تاخد خطوة وماتستناش لما الحالة تزيد سوء

اخضع للعلاج وتوكل على الله وعلشان ماتتخضش أول كام جلسة بيبقوا كابوس اتفقنا؟ يعني انت مش هتلاقي حل سحري أول ما تروح وهتقعد في البيت… في متابعة واحنا بنعمل اللي علينا كمرضى وكأطباء… مش طرف واحد اللي شغال…

مش الدكتور بس اللي بيتعب… المريض كمان…

كمل في رحلة الجهاد اللي انت داخلها دي وربنا يعينك…

سلام الله عليكم وألقاكم في مقال آخر…

ما هي أسرار الإنضباط فى الحياة؟ما هي أسرار الإنضباط فى الحياة؟

قد يتسأل البعض عن حلول  تجعله اكثر انضباطا والتزاما تجاه نفسه ، و في كل مجالات حياته؟؟!
قبل الاجابة عن هذا السؤال ، يجب ان نعرف ما هو الانضباط ؟
الانضباط ،هو أن نقوم بعمل ما يجب عمله سواء كان هذا العمل تحبه أم لا، فأنت المسؤول على القيام به.
والانضباط هو عملية تسير وفقا لمجموعة من القوانين التي تفرضها على نفسك لاتباعها و بالتالي تجعلك تكسب عادة جديدة ، تتعلم من خلالها ادراة الوقت بشكل جيد يجعلك اكثر انضباطا في  الحياة

إقرأ الموضوع كاملا
Borderline personality disorderBorderline personality disorder

Today I’m going to pose a remarkable subject we all should be aware of, hence we can obtain a good chance to have a better mental health and try helping those who in need to be recovered…
Therefore, I’m initiating my primary lines with a common symbol includes three letters (BPD)…
What is BPD? And why is it considered as your main topic today?
Dear, reader, let me give you an insight why am I talking about this today…

إقرأ الموضوع كاملا
Anxiety disorder and panic disorderAnxiety disorder and panic disorder

panic disorder is sometimes considered as based on the other, panic disorder is more relevant and dangerous…
It can take place in whatever occasion you attend even if it wasn’t sad, a person suffers from panic attacks all in regular packages as zoomed in… can physically move rapidly and unconditionally according to the activity of both hormones “Adrenaline/ noradrenaline” released when you feel danger,
A person with panic disorder can suffer from constant panic attacks happening more than once a day, and not only in traumatic events, anytime and with no terms included.

إقرأ الموضوع كاملا
تعرف على أسرار شخصيتك بهذا الاختبارتعرف على أسرار شخصيتك بهذا الاختبار

حاول كتير من الباحثين وعلماء النفس
أنهم يكتبوا عن الشخصيات ويعطوا تفسيرات ليها زي عالم النفس النمساوي كارل غوستاف الي ألف كتاب في أنماط الشخصية .
وسنه 1962م تم إصدار إختبار للشخصيه تحت بند (MBTI) وده إختصار لMyers Briggs Types Indicator يعني “مؤشرمايرز بريغز للأنماط”.
والي طورته كانت كاثرين بريغز وبنتها إليزابيل بريغز.

إقرأ الموضوع كاملا
Tagged , , , , , , , , . Bookmark the permalink.

اترك تعليقاً

لن يتم نشر عنوان بريدك الإلكتروني.