كيف تقتل قلة النوم ؟
كتب : أحمد عبيد حامد
فاز هذا المقال بالمركز الرابع بمسابقة Sci Articles Lab من بين أكثر من 140 مقال.
القصة بدأت من لمّا كنت قاعد مع صحابي من قيمة كام يوم، وبعدين سمعت واحد منهم بيقول: يجدعان أنا هموت من قلة النوم؟
طبْعا أنا قعدت أفكر في الجملة، وسألت جوجل: هل ممكن قلة النوم تقتل؟
حضرت أربع كياس بن، وقولت هقضيها قهوة بقا ومش هنام، طبعا أنت عارف إني مش مريض بالإكتئاب وعايز أموت، أنا بس هكافح بدون نوم في سبيل العلم “مزيكا انتصار”.
جوجل حكالي قصة غريبة، في سنة 1974 طبيب إيطالي اسمه إيجنازيو رويتر اكتشف وفاة امرأتين من نفس العيلة بسبب قلة النوم!
أنا في الأول فكرت إنهم كانوا عاشقات مكسورات الخاطر، ولكن اللي حصل بعد كدا كان خطير؟
بعدها بحوالي 10 سينين، فرد جديد من نفس العائلة حس بنفس الأعراض اللي كانت بتمر بيها الستات اللي ماتت من قلة النوم؟ وهنا بدأوا الدكاترة يدرسوا حالته ويتابعوه، وفي الآخر للأسف برضو مات وساعتها أخدوا دماغه وقرروا يدرسوا الحالة الغريبة دي؟
وهنا.. قبل ما نفهم الدماغ النادرة دي.. واللي تعتبر واحدة من حوالي 40 عائلة فقط حوالين العالم، خلينا نفهم الأول.. ايه اللي ممكن ندرسه عشان نفهم الطبيعة الفسيولوجية الخاصة بالكائنات البشرية أصلا؟
طبعا طبعا طبعا..
هنقول الـ DNA أو الحمض النووى اللي بيحمل بداخله كل ما يخص الكائن البشري
استني بس.. فين الـ DNA أو الحمض النووي دا يا عمو عُبيد يا بتاع القهوة أنت؟
الحمض النووي دا يا بيه موجود في خلايا جميع الكائنات الحية، بيحمل جواه كل المعلومات اللي تخص الكائن دا، التكاثر الخاص بيه، تطوره ككائن بشري، تصرفاته الفسيولوجية بشكل كامل مبنية على الحمض النووي أو الـ DNA!!
وإيه علاقة دا أصلا بالدماغ النادرة اللي استخلصناها من واحد مات من قلة النوم؟
المصادر كانت ناجحة جدًا في إبهاري في الجزئية دي، ونا بشرب قهوتي قالي إن في بروتين اسمه البرايون Prion، البروتين دا عملية تكوينه بيحصل فيها خلل طفيف في الأشخاص اللي ماتوا، خلل بيتسبب فيه تغيير في مناطق بعض الجينات في سلسلة الـ DNA الخاصة بالمريض، واللي بتتسبب في تكوين بروتين البرايون على هيئة لا تذوب في الماء!
ثواني بس، هو البرايون دا هو اللي بيخليني عايزين ننام؟ مش التاني كان اسمه هرمون ميلاتونين؟
شطور يا حبيب أخوك، الميلاتونين بيخلينا نحس إننا عاوزين ننام، إنما بروتين البرايون فـ دا بيعمل شئ تاني خالص، احنا اتفقنا إن الطفرة الوراثية اللي بتحصل في الـ..
-استني استني، طفرة وراثية؟
= أيوة يا عم عمال أقولك هما أربعين عيلة والـ2 الستات كانوا من نفس العيلة، ركز معايا يا استاذ عاطف إلهي تنستر!
المهم.. الطفرة الوراثية اللي بتحصل بتخلي البرايون يتكون بشكل لا يذوب في الماء، ويقعد يتجمع في منطقة (المهاد) في المخ، ويملي كل الفراغات، وحاجة آخر زنقة.. وبعدين المنطقة دي هي المسئولة عن النوم.. وعمالة تتزنق.. فجأة المريض يبطل ينام.. ومفيش كلها شهور معدودة والمريض بيموت.. بعد صراع رهيب للنوم إنشالله ربع ساعة يا حاجة!
في النهاية..
أنا أدركت إن فناجين القهوة اللي عمال أضربها دي مش هتمنعني أقوم أنام زي الناس عادي، دا غير إن الحوار أصلا حتى الآن ما يزال مقتصر على الطفرات الوراثية بس، على أساس إن القهوة بنت خالة عمي يعني هتعملي طفرة، قوم عالتلاجة يراجل بلا قلة عقل :”D
– تلك كانت إحدى المشاركات المتأهلة للمرحلة النهائية بمسابقة Sci Articles Lab، جميع المصادر المذكورة موجودة بالأسفل ، نود التنبيه أن تعليقك الخاص سيكون له قدر كبير من الأهمية فى إثراء المحتوى.
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
