تجربتي الشخصية مع التعليم المنزلي
كتبت : يمنى عادل
الكل بيسألني عن أسس التعليم المنزلي والدراسة فى البيت وأسباب اختياري ليه وبدأت ازاي مع بنتي؟.
انا لسه في البدايه ومش عارفه هنجح ولا لا ومش فارق معايا انجح ولا لا، الفضل في النجاح سواء في المدارس أو التعليم المنزلي لله.
انا ليا بالسعي فقط “وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا” ومفيش عندي مشكلة أن بنتى ما تدخلش طب ويكون فضلها الفرق بين بذرة الطماطم في مصر وقشرة القلقاس في الصين المهم تكون مستمتعه بهدفها وشخصيتها وباللي بتعمله.
كيف بدأت بتطبيق التربية الإيجابية والتعليم المنزلي؟
وانا حامل في بنتى أول حد فتح عيني على المونتيسوري والتربيه الإيجابيه جزاها الله خيرا هي الجميله إيناس عباس.
بدأت بمقالات وكورسات أونلاين ومتابعة صفحات تربويه وصنع أدوات بسيطه تنمي مهاراتها الحسيه والحركيه وما عنديش استعداد أودي بنتي لمكان يهدم كل اللي عملته معاها.
واغلط مرتين لاني وديت بنتي الحضانه لظروف شغلي وما كسبتش غير بعدها عني ومرضها اللي كان هيدخلها في عمليه لولا لطف الله.
رغم اني صرفت على الحضانه نصف مرتبي حرفيا لضمان بقاء بنتي في مكان نضيف وكده ولما غيرت الحضانه لحضانه تانيه ارتبطت بحاجات بالنسبه لي كارثه.
زي تنه ورنه من التليفزيون هناك اللي فيها مخالفات في العقيده تؤدي للشرك بالله زي الجنيات هما اللي بيخلقوا الطبيعه وبيلونوا الفراشات والعياذ بالله، الحمد لله على كل حال.
أسباب اختياري للطريق ده
أولا
الوزير أول ما قال كلمة بحث كانت كارثه بكل المقاييس أطفال 12 و13 سنه مش عارفين يعملوا بحث والمصيبه الأكبر أمهات 30 سنه و40 سنه مش عارفين يعملوا بحث او يبحثوا في مصادر.
وده إن دل فيدل على فشل النظام الدراسي الأكاديمي بكل طرقه وكل اللي درسناه من حضانه إلى الآن بلح …
ثانيا
الأساليب التربوية المتبعه لمدرسين معظمهم بيصبوا أمراضهم النفسيه وفشلهم على الأطفال إلا ما رحم ربي زي النوتي كورنر ده لو مدرسه بنت ناس شويه.
كمان باقي المدارس عصيان وضرب أو شيل شنط على اديهم جلد نفسي وإهانه وأذى بدني يدخل النار حدف غير التحرش وعدم الأمان والبلاوي الزرقا اللي بقينا فيها ربنا يلطف بينا ويحفظ ولادنا.
اقرأ أيضا:- التعليم المنزلي | أساليب المذاكرة للطفل بطرق ذكية وفعالة
ثالثا
الظروف الماديه ال15 وال 30 ألف اللي هتصرفيهم على المدارس تقدري بيهم توصلي لوسائل تعليميه مسليه بالنسبه للطفل ومريحه ليه وليكي.
هذكر بعضها في بوست تاني مع ورش وأشخاص باختيارك انتي علميا وتربويا فاهمين مش معقدين انتي وطفلك هتكوني في بيئه آمنه شبهكم مش بيئه معظمها سخريه على الأساليب التربويه الحديثه المنبثقه أصلا من دينا.
ومش هتسمعي جملة تربية إيجابيه ايه ما كلنا اتربينا بالشبشب وزي الفل الجمله دي أصلا بتضحكني جدا خاصة في جيلنا اللي معظمه اصلا شبه معقد نفسيا من كل اللي حصله جيل ما اترباش حتى على ازاي يواجه الظروف والأزمات ويحلها ولو أولوياتك زي ما قالت أميرة أحمد
التعليم والتربيه صح بفلوسك ووقتك ومجهودك وفضل الله هتقدري تعملي ده …
رابعا
اللي بيقول المدارس زي الفل سواء لغات أزهري رهبان حكومي انترناشونال كل نوع فيهم فيه عيوب ملموسه بالنسبه لي.
وأول كلمه هتسمعيها وأنت بتاخدي رأي أي أم هي مدرسه مش كويسه أوي بس على الأقل أبنك هيكون مع ولاد ناس ما تفتكريش أن المدارس بتعلم أنت اللي بتعلمي ، بس عشان لازم يكون في مدرسه معرفش مين اللي لزمه.
والانترناشونال ابنك ممكن من المستويات الماديه حرفيا يطلع معقد لو ما عيشتيهوش في نفس المستوى غير بقى الأخلاقيات وغيرها من البلاوي السودا اللي هيكتسبها.
الأزهر أكاديمي بحت وانا ماشيه مع بنتي من وهي صغيره بنظام تعلمي ممتع.
جدول احفظ واكتب 600 سطر في اليوم ده بالنسبه لي بتاع المجانين والرهبان أن الدين عندي رقم واحد أستاذه أمنيه عسكر في أول محاضره ليها لشرح كتاب Positive discipline.
أول شيء بتقرريه في تربية الطفل هي الرؤيه انتي عايزه ابنك يكون ايه همك وأولياتك ايه الدين ولا المنظر انه معاه الشهاده كذا وجو ما بيتأثرش والكلام اللطيف ده.
عايزه اقولك أن البيئه المحيطه أكبر معلم للطفل ولو ما اتأثرش في الأصول هيتأثر في العادات والتقاليد وحاجات احنا في غنى عنها اغرسي صح.
اتعلمي تعليم حر التعليم المنزلي مش بيغير طفل ده بيغير بيت.
انتوا بتتعلموا كل شيء سواء بتربوا باحث جديد عارف ازاي يعلم نفسه ذاتيا عارف ازاي يوصل للمعلومه مش مجرد حفظ معلومتين من كتاب المدرسه ونقشهم في الامتحان وبعدها يتنسي.
كتاب الدين مش كتاب بنحفظه قبل ليلة الامتحان اتعلموا عقيده احنا في زمن فتن اتعلموا لغه اتعلموا كل شيء تستمتعوا بيه فقط للاستمتاع وابتغاء مرضاة الله بلاش جو احنا بنذاكر عشان الامتحان تبا للامتحانات اصلا.
خامسا
الأمهات اللي بتشتغل فانتي محتاجه ساعة في اليوم مش اكتر مع الطفل يوميا زي ما وضحت أ / أميره سعد في كورس التعليم المنزلي.
وكده كده لو وديتي مدرسه برضه هتقعدي معاه عشان المتابعه والتربيه والواجبات وغيرها فوفري في وقت ومجهود المشوار ورتبي وقتك صح واللي يعرفني كويس وقريب مني وعارف ظروفي وطبيعة عملي هيعرف حقيقي يعني ايه ضغط شغل وضغط ظروف حياه.
وسواء كملت في شغلي أو لا فانا الحمد لله عرفت أحول بيتي على نظام المونتيسوري بشكل نسبي لكن طبعا لسه بكمل واحده واحده وربنا سخرلي أدوات وناس أقدر من خلالهم اعرف معلومات.
أفضل من اللي اتعلمتها في الحضانه بكتير ما خدتش منها غير اني فلست وليلى مرضت وتعبت نفسيا مش أكتر على رأي عبد الرحمن المكي : الحضانه جريمه ترتكب في حق الطفل …
سادسا
نقطة مش هيطلع اجتماعي فاحب اقولك لو رجعتي لفيديو تامي ستراود أم مربيه ل6 أطفال منزليا وطلعوا اجتماعيين وعاديين.
مش شرط الطفل يحتك بطفل آخر عشان يكون اجتماعي المهم يكون في أنشطه عائليه اجتماعيه تنمي عنده مهارة التواصل عموما غير أمهات كتير بيربوا منزليا وولادهم اجتماعيين وعادي.
غير اصلا الورش والرحلات اللي هتخليهم يكتشفوا ويتواصلوا أكتر من أي طفل مدرسي ما بيتواصلش بحرف غير لما مدرسه بنضاره شبرين تبرقله وتقوله اخرس وبس وانت مش متربي.
مش متربي عشان بيكون صداقه؟.
اقرأ أيضا:- الغزو الفكري والتكنولوجي للطفل خطر يهدد المجتمع
يا رب ما اكونش طولت ورغيت بس حبيت اشرح الفكره لكل اللي بعتولي لما شافوا تعليقي في جروب التعليم المرن وآسفه ما عرفتش اعمل فيديو لايف زي ما طلب البعض لاني بلاعب نفسي بحواجبي ومناخيري واضحك ومش هعرف اقول كلمتين على بعض.
ما اتدربتش على ده برضه في تربية وتعليم المدارس وفي مقال تاني هكتب المحاضرات والورش والكورسات اللي خدتها وغيرت لي حياتي انا وبنتى والأساليب المتبعه معاها.
لو أخطأت في شيء وانا بكتب فسامحوني حاولت تلخيص كل النقاط قدر المستطاع ولو مختلف معايا فدي وجهات نظر وكل واحد حر في طريقته مع ولاده ربنا يحفظهم ويهديهم ويهدينا جميعا جزاكم الله خيرا ونفع بكم وبأولادكم اللهم علمنا ما ينفعنا وانفعنا بما علمتنا وزدنا علما
وأخيرا أسيبكم مع فيديو تامي ستراود
إنضم لكوكب المعرفة مجتمع التعلم الحديث
