Because why not
نفسي ثم نفسي
كتب : نهاد رجب
فيه رد أمريكاني كده لما تسأل حد “انت ليه هتعمل كذا؟” فيرد عليك ويقولك “because why not” – “علشان ليه لأ؟”
الرد ده مش بسيط ابدا ، الرد ده جواه حب للذات وفهم أعمق للحياة ..
المشكلة اننا اتربينا من صغرنا على السببية .. هعمل كذا علشان كذا .. هذاكر رياضة علشان ادخل هندسة ، هلعب رياضة علشان اخد درجات اعلى في المدرسة وادخل كلية أفضل، هشتغل كويس علشان اجيب عربية علشان شكلي قدام الناس ، هتجوز علشان عيل يشيل اسمي .. لحد : هصلي علشان ادخل الجنة وهعبد ربنا علشان مدخلش النار .. الخ الخ
وبسبب غياب اجابة “because why not” .. بقينا مكن حقيقي ، مش بيعمل حاجة علشان نفسه ، هو حرفيا “بيستغل نفسه” علشان يعمل حاجة. وده مش الهدف ابدا يا صديقي من الحياة.
صديقي هشام بيسألني ، ازاي اعرف شغفي في الحياة ؟ انا خدت كورسات كتير ومش عارف اكمل في اي علشان اترقى في شغلي ..
قولتله روح لبنان ونط بالباراشوت
ومع ان الاجابة ملهاش علاقة بالسؤال ، بس الاجابة ليها علاقة بالبوست .. طريقة تفكير لو غيرتها هتمسك الدنيا بإيدك .. طريقة تفكير “اهو كده وخلاص”
انت بتاخد دورات مش علشان تشتغل شغل افضل
انت بتاخد دورات علشان انت بتحب نفسك وعايز تطور من نفسك بشكل مستمر .. ليه ؟ انسى بقى سؤال ليه .. من غير ليه .. because why not
انت بتتعلم طبيخ مش علشان تطبخ للناس ، انت بتتعلم طبيخ because why not
انت مش بتحب حد علشان انت بتدور على شريك حياة تكمل معاه وتجيب منه عيال يشيلوا اسمك .. انت بتعمل كده because why not
الصح يا صديقي هو انك تركب تجرب وتغامر وتعمل اللي انت عايزه لنفسك وتبطل تماما تبحث عن اجابة سؤال “انت هتكسب ايه”
عارف في المقابل هيحصل ايه ؟
فجأة كورس الخياطة اللي انت اشتريته هتلاقيه بيفيدك في وقت من الاوقات
فجأة كورس الحساب اللي انت اشتريته هتلاقي ليه لازمة بعدين
فجأة الدنيا هتحبك وهتختارك من غير ما تقعد تفكر وتحسب كل خطوة بتعملها هتوصلك لفين ..
عارف الاهم من كل ده ايه ؟
انك في اخر ايامك مش هتندم ان فيه حاجة انت مجربتهاش
وصدقني والله يا جميل ديه اصعب حاجة في الدنيا ممكن تعيشها
انك تقول “هو انا ليه مجربتش اطلع جبل عالي ، هو انا ليه مجربتش انط من طيارة او اتعلم سباحة او اركب خيل او حتى اتمشي من بيتنا لمحافظة تانية..
في الوقت ده يا صديقي هتكتشف ان مفهوم because why not
هينجدك وهيرسم ابتسامة كبيرة جدا على وشك وانت بتستقبل موجة الانتقال لحياة تانية .. ساعتها في اللحظة ديه بالذات هتكتشف ان مش مهم “انا حققت ايه .. المهم انا مش هموت وانا كان نفسي في حاجة ومعملتهاش”
اعمل todo list ، حاجات لازم تعملها قبل الانتقال لعالم تاني وقبل ما تكتشف انها خلاص خلصت .. وابدأ نفذها واحدة ورا التانية .. ولو لاقيت عقلك بيقولك “بلاش انت مش هتكسب حاجة ..” ابتسم وقوله “because why the f not ?”
وافتكر … مش مهم تعيش وانت معالك ملايين في البنك .. المهم لما تموت تموت ملك ومتحسش انك اتضحك عليك او ان جيت على نفسك في حاجة.. الثروة الحقيقية هي ثروة التجارب يا صديقي، ويوم ما ، هتكتشف انك مكنتش ابدا محتاج تحوش علشان تشتري فيراري ، كل اللي انت كنت عايزه هو انك تركبها وتشوف غيرها بعد كده.. لان ده اللي في يوم ما هتكتشف انه كان الاصح.
ويومكم اجمل من يومي
[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]
Founder of the H.I A , Public Speaker and Hypnotherapy Gangster, CMS-CHT, FIBH
مؤسس منهج فن الاقناع والتأثير النفسي بالتنويم الضمني ، مدرب ومعالج بالتنويم الايحائي ، مؤلف كتاب تعلم كيف تحدث التنويم بالايحاء ، مؤلف كتاب التنويم الضمني ، مؤلف الكورس الصوتي “لغة الاقناع والتأثير”
