ليه مينفعش تؤمن بالأبراج او بتوقعات صفات الشخصيه ؟
مبدئيا انتشرت جدا في الفترة الاخيرة بوستات كتير عن شخصيات الابراج وازاي تعرف شخصيتك من اللون المفضل واختار صورة واحنا نعرف انت مين ..
الكلام ده مهم جدا بالنسبة لناس كتير وده لان الانسان بطبعه بيحب اوي اللى بيتكلم عنه ، اللى بيوصفه ، اللى بيقوله انت مين .
في حقيقة الامر الفكرة فلسفية ودايما في عملية بحث عن معنى لنفسنا وده الى بيخلينا ننجذب للنوعيه ديه من الخدمات المتاحه بكثافه وممكن حتى ندفع فلوس علشان نروح لعراف يقولنا معلومات عن ماضينا وشخصيتنا وبنصدقه ..
انضم لكوكب المعرفة فن إدارة الحياة
-
برترام فورر احد اشهر الناس اللى اتكلموا عن القراية الباردة وضح ان معظم الوصف اللى بيتقالك حقيقه بيكون معلومات عامه . بس لمجرد بديهيه المعلومات وانطباقها على ٩٩٪ من الناس بتتخيل ان الكلام ده بينطبق عليك بالحرف وصحة المرجع .
-
اغلب تحليل الشخصيات بيلعب على الايجو بتاعك ، يعني مثلا “انت نيتك كويسة وفيك نور وخير مش موجود في اي حد تاني” ..
مين فينا يقدر يقول لا على الكلام ده ؟ مستحيل تلاقي حد يقولك “لا انا نيتي وحشة ومعنديش نور وكله ظلام دامس وشر
-
اغلب المعلومات بتكون احكام غير مطلقة “بيلف ويدور” ، يعني بدل ماقولك انت انسان بتحب تشيل المسئولية
هقولك “انت بتحب تشيل المسئولية بمزاجك” ، لانك لو قولت لأ انا مش بحب اشيل المسئولية هتكتشف ان اضافة كلمة “بمزاجك” هتمنعك من انك تطلعني غلطان وهتخليك توافقني .. -
احنا كبشر بنحب اللى بيتكلم عننا ، وده واضح جدا والا مكنتش الابراج احتلت الاهتمام ده في حياتنا .
-
اسلوب الشخص عليه عامل كبير من صحة المعلومة بالنسبة لك ، يعني اسلوب كلامه وطريقته وشكله ومنصبه وتخصصه ، بيخلوك تصدق اللى هيقوله عنك حتى لو مش فيك .
-
“انا عارف انك شخص عارف ان عندك حاجات كتير اوي جواك وعايز تستخدمها بس الكسل والظروف منعاك.ومع ذلك انت عارف ان الطاقة اللى جواك ديه ممكن تخليك تعمل اي حاجة لو اتحطت في مكانها الصحيح وحد ادالك فرصة ، انت بتحب الخير للناس بس بعض الناس مش بتسمحلك انك تمارس حب الخير وبتضطر انك تتعامل معاهم بأسلوبهم في بعض الاوقات ، انت بطبعك بتقدر انك تحل مشاكل الناس وشوية صعب عليك تحل مشاكلك وساعات بتوجد حلول غير عادية للظروف اللى عندك ، عنيد وده يدل على قوة شخصيتك وعندك جراة غير عادية في انك تقول رأيك وميهمكش سواء بصوت عالي او في سرك ، عندك اسرار محدش يعرفها غيرك وناس تانيين يتعدوا على الاصابع ، وللأسف لسة فيه جرح في حياتك مأثر عليك “
-
لو عجبتك الجمله السابقة ديه ، اعرف انها هتعجب ٩٠٪ من الناس ، وده معناه انها مش بتوصفك … هي بس بتتلاعب بعقلك .
كتب : نهاد رجب
[latest-selected-content limit=”10″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”11″ type=”post” status=”publish” dtag=”yes” orderby=”dateD” show_extra=”taxpos_category_before-title”]