نهاد رجب | قوانين القوة فى التدريب

قوانين القوة في التدريب

انضم لكوكب المعرفة  مدرسة البيزنس

١- خليك دايما فوق السعر اللي بتطلبه نظير خدماتك ، وحدد سعر انت مش محتاجه أو ميفرقش معاك .. بمعنى ماتطلبش سعر انت محتاجه علشان تعمل بالمبلغ كذا وكذا . لو عملت كده أصبح المستفيد سلطة أعلى . حد سعر تقدر تعمله refund من غير ماتزعل لانه كده كده مش فارق معاك.

 

٢- الأشخاص اللي عندهم اكتر من سلة ، هم الأكثر تأثيرا .. بمعنى لازم يكون عندك اكتر من اتجاه تكسب منه ماديا حتى لو كان في نفس المجال ، ده هيديلك طاقة مميزة اسمها السلطة الأعلى، بيحسها العميل وانت كمان بتحسها في نفسك فتقدر تؤثر وتفيده أحسن

 

٣- الأكثر رفضا للعملاء هو الأفضل .. بمعنى يكون عندك القدرة على اختيار العميل اللي انت عايزه يشتري منك .. أول ما توصل لمرحلة انك انت اللي بتحط شروطك علشان يحصل فئة محددة من الناس على خدماتك ، انت ساعتها هتمتلك المجال وما فيه . انت كده عديت ، وطبعا ده هيحصل مش غلاسة منك ولكنك شايف ان مصلحة العميل مش معاك وبالتالي بترفضه بأدب. هتكسب دعايا وبرستيج وثواب .

 

٤- اوعى توافق على تقديم خدمة مجانا لأي شخص مهما كانت حالته ومتتأثرش بكلامه ، عايز تعمل صدقة عن علمك اعمل فيديوهات عاليوتيوب واكتب مقالات لكن انك تدي خدمة كاملة ومتكاملة لشخص طلب الكورس او الخدمة مجانا وبخل انه يعرض حتى انه يسدد السعر على فترات طويلة، فده شيء لا يمكن قبوله لسببين، اولا انت صارف ومكلف ثانيا هتزعل لما تلاقيه دفع في كورس تاني . ومع ذلك أفضل أنواع الكرم هو الكرم المفيد ، متديش سمك ولكن علمه ازاي يصطاد ، اطلب خدمات بالمقابل او تسويق او طول فترة الدفع ل ١٠ سنين حتى . صدقني انت كده بتفيده اكتر بكتير من لو كنت قبلته مجانا .

 

٥- تكملة ل ٤ ، ممكن اختار شخص اتفق معاه انه يسدد سعر التدريب من خلال الجلسات اللي هيعملها مع العملا بنسبة ، انا واثق من اني هديله حاجة يكسب بيها ، وواثق في مادتي، لكن برضه مديتش مجانا .

 

٦- كل يوم في حياتك لازم تقرا ٢٠- ٤٠ صفحة في تخصصك، قراية تدريب ، اقرأ وكأنك هتشرح الكلام ده لمجموعة ما .

 

٧- كل يوم في حياتك لازم تعمل حاجة جديدة للبراند بتاعك، لوجو، كوفر فوتو ، تعديل او تطوير في مادتك

 

٨- وأخيرا وليس آخرا .. اوعى تعلن للناس عن نفسك بنفسك ، فيه جهات مسئولة عن كده ، اعتمد على انك تدي احسن ما عندك والناس هتيجي دايما لصاحب النتائج