مراجعة وتحميل كتاب معجزة الصباح
6 عادات هياخدوا منك 6 دقايق اول ما تصحى من نومك.. من كتاب معجزة الصباح♥
١- الصمت
تخيل اول حاجة تعملها انك تفضل ساكت مكانك لمدة دقيقة.
تردد دعاء الاستيقاظ (الحمد لله الذي احيانا بعد ما اماتنا وإليه النشور) وتمسح آثار النوم من وشك، وتشرب كوباية الماية اللي سايبها جنبك من قبلها بليلة.. وتفضل ساكت في طمأنينة عارمة.
٢- توكيدات الصباح
المؤلف بيتكلم انه كان ساكن في شقة شخص ناجح جدا، وكان الشخص ده كل يوم يقول لنفسه بصوت مسموع : (انت الافضل، انت رائع) وبعد سنين فهم اخيرا ان مجرد التوكيدات الصباحية بيفرق في نفسيتك وأدائك 180 °
بتعملها ازاي؟ جرب مثلا تكتب على استيكي نوتس الحاجات الي عايزها تكون فيك
٣- التخيل/ التأمل
في الدقيقة التالتة اقعد في وضعية مريحة وافرد ضهرك واتنفس بعمق (شهيق- زفير) واتخيل يومك بافضل شكل ممكن وحياتك اللي بتتمناها. وممكن طبعا تستبدل الخطوة دي بالصلاة.
٤- الكتابة هتخصص نوت تكتب فيها كل يوم الصبح كلام ايجابي.
زي الامتنان على سبيل الامتنان اشكر ربنا على جميع النعم اللي في حياتك. واكتب كل حاجة نفسك تحققها.
٥- القراءة
خلي في كتاب محفز تقرأ منه لمدة دقيقة الصبح بدري.. لانك اكيد اكيد هتتعلم حاجة تفيدك لباقي اليوم،
ارشحلك كتاب ابق قويا 365 يوم. لأن كل يوم عبارة عن صفحة فيها حكمة جديدة.
٦- الرياضة
الدقيقة الاخيرة هي انك تنشط نفسك عن طريق التمارين الرياضية..
بدءًا من دقيقة وانت طالع. ولكن تذكر دايما ان خير الامور ادومها وان قل.
وتقدر بعد التمارين بقا تاخد شاور صباحي كده وتحضر فطار صحي، وتبدأ يومك بكل نشاط.
بجد الكتاب رائع وهيفرق معاك في نقطة تظبيط النوم جدا جدا ♥ رابط الكتاب pdf وملخصه من هنا