15 حاجة لازم تبطل تعملها لو عايز تعيش كويس

نهانا الله كثيرا عن ظلم النفس وللأسف أغلب الناس يظلم نفسه بدون علم

15 حاجة لازم تبطل تعملها ، العديد من الناس يظلم نفسه بنفسه ، ويعتاد مع الوقت على بعض السلوكيات المدمرة للحياة وللصحة النفسية بشكل عام ، ويجد نفسه مع الوقت محاصرا فى دوائر محبطة لا تسمح له بالتقدم ولا تحقيق أى معنى للنجاح.

انضم لكوكب المعرفة

1) بطل تعاقب نفسك على اخطاء الماضى:

دى أهم حاجة لازم تبطل تعملها ..
الى حصل حصل خلاص، مافيش حاجة ممكن ترجع الزمن او تغير الماضى، الحاجة الوحيدة فى ايدك انك تتعلم ماتغلطش نفس الغلط تانى وتتعلم ازاى ممكن يفيدك فى مستقبلك

انما عقاب نفسك بقية حياتك على اخطاء قديمة مش هايحل ولا هايضيف حاجة

2) بطل تخاف تغلط:

كلنا غلطنا فى مرحلة ما فى حياتنا وهانفضل نغلط لحد ماتموت
ماتخافش تغلط .. خاف انك تندم انك ماحاولتش

3) بطل تحاول انك تشترى السعادة:

السعادة غريزة اساسية، مابتجيش غير من جواك .. مافيش حاجة ولا حد فى الدنيا ممكن يخليك سعيد لو انت مش سعيد من جواك

4) بطل تتمسك بالماضى على حساب مستقبلك:

الماضى عامل زى مرايا العربية .. لازم كل شوية تبص تتأكد انك ماشى صح .. بس لو ركزت فيه زيادة عن اللزوم مش هاتشوف انت ماشى فين ولا ايه اللى جاى فى وشك

5) بطل تدى الناس مساحة انها تتحكم بمشاعرك:

دى كمان حاجة لازم تبطل تعملها ..

الاسهل من ان الانسان يغير من نفسه انه يحاول يغير الناس علشان تمشى على مزاجه
انت عملت كده مع غيرك وغيرك بيعمل كده معاك سواء قاصد او لأ، سواء بنية كويسه او لأ
ماتسمحش لحد انه يتحكم فى مشاعرك .. عيش زى ما انت عايز تعيش مش زى ما الناس عايزاك تعيش

6) بطل تدخل علاقات للاسباب الغلط:

كلنا بنمر بضغوط فى الحياة بأشكال مختلفة (اسرية، عائلية، مادية، إجتماعية، نفسية، وظيفية، جنسية، …) ، بس الدخول فى العلاقات “بسبب” الضغوط دى يبقى هروب من المشكلة اللى انت فيها بمشكلة اكبر
لو مش مقتنع تماما بعيدا عن اى ضغوط ان الطرف التانى هو نصك التانى ، نصيحة ماتدخلش

7) بطل تمشى مع التيار:

ماشى مع التيار يعنى ماعندكش خطة لحياتك
بتصحى تروح الشغل وترجع تنام علشان تصحى تروح اشغل اللى انت غالبا مش طايقه بس مضطر
بتخرج مع ناس لمجرد انك تعرفهم من زمان او مضطر تخرج معاهم حتى لو مابتبقاش مسبوط ولا على راحتك وانت معاهم
فيه حاجات كتير ممكن تبقى مضطر تعملها لإعتبارات معينة . بس مش معنى كده انك تعتبر ان الاضطرار دا هو حياتك
لازم يبقى ليك خطتك فى الحياة ورؤيتك الخاصة بيك .. مش كل اللى بينفع الناس بالضرورة ينفعلك ولا كل اللى بيبسط الناس بالضرورة بيبسطك

---

إقرأ أيضا: مهارات إدارة الغضب..تعلم كيف تسيطر على غضبك

---

8) بطل تقارن نفسك بحد:

كل واحد فينا له تجربتة فى الحياة
ومافيش تجربة ولا حياة بتتطابق بين اتنين ابدا
يعنى ماينفعش يبقى حد شبه التانى فى كل حاجة وهو دا سر تميزنا
يعنى انت فى حد ذاتك مميز ومختلف عن اى حد، يعنى مش شرط اللى ينفع لناس معينة ينفعلك انت كمان
دور على اللى ينفعلك انت .. حاجة تكون بتاعتك انت

9) بطل تحاول تبقى مثالى:

محاولة الوصول للمثالية دى حاجة لازم تبطل تعملها ..

عمر ما هيكون اى شخص فى الدنيا مثالى والا مايبقاش فيه معنى للحياة
طول ما احنا عايشين بنتطور .. والتطور عمره ما هايخلص
بدل ماتحاول تبقى مثالى، حاول تبقى إنسان احسن من اليوم اللى قبله .. دا كفاية قوى

10) بطل يفرق معاك كلام الناس:

كل واحد بيشوف الحياة من وجهة نظره هو .. يعنى اى شخص هايقولك رأيه فى حياتك بيقولها لو هو اللى كان مكانك بظروفه الحالية كان عمل ايه وبالتالى النتيجة هاتبقى مختلفة تماما عن واقعك انت

11) بطل تحاول انك تبقى شخص تانى غير نفسك:

ماتحاولش تبقى اى حد تانى غير نفسك لأنك حتى لو تصورت انك نجحت تبقى زى شخص تانى فهاتبقى مجرد نسخة مكررة او بهتانه منه
انت ممكن تكون احسن من الشخص اللى انت عايز تبقى زيه لو بس انت اشتغلت على نفسك
ممكن تشوف الصفات اللى انت عايزها تبقى فيك وحاول تحسنها فيك من غير ما تقلد حد

12) بطل تهرب من مشاكلك ومسؤولياتك:

المشاكل والمسؤوليات اللى بتمر علينا فى حياتنا مش مهمتها انها تنغص علينا حياتنا، هدفها انها تخلينا نتطور للأحسن
تخيل حياتك لو ماحصلش فيها المشاكل او المسؤوليات اللى عدت عليك، كنت هاتبقى بنفس القوة والادراك اللى انت عليهم دلوقتى؟!
لو مش قادر تحس بالفرق اللى شكلته مشاكلك وتأثيرها فى حياتك يبقى انت ماتعلمتش اللى كان المفروض تتعلمه من المشكلة او المسؤولية اللى انت (كنت) فيها، وبالتالى هاتفضل تلف فى دواير مفرغه مابتخلصش ولا بتعرف تطلع منها
قرارك انك تواجه المشكلة هو 50% من حل المشكلة .. الباقى انك تواجه فعلا

13) بطل تعمل حاجة لمجرد انها عادة:

لو الحاجة اللى بتعملها مش بتبسطك .. بطلها
طبعا فيه حاجات مش هاينفع تبطلها بالسهولة دى .. فكر ازاى هاتقدر تبطلها على المدى القصير او الطويل
المهم لو مش بتبسطك .. بطلها

14) بطل تدافع عن نفسك قدام الناس:

اللى عايز يصدق كلامك .. هايصدقك
واللى مش عايز يصدق كلامك .. هايفضل مش مصدق
واللى عايز يستفهم منك هايسألك
ماتشغلش بالك كتير .. كل واحد هايشوفك بالشكل اللى هو عايزه بغض النظر عن رأيك انت

15) بطل تبص على اللى فى ايد الناس:

“لو فرضنا ان نعم الله التى ليس لها عدد تساوى 24 قيراط، هاتلاقى كل إنسان واخد ال 24 قيراط بتوعه كاملين بس واخدهم مشكلين
هاتلاقى اللى واخد 10 قيراط مال + 7 صحة + 1 زوجة صالحة + 2 علم + 4 راحة بال
وهاتلاقى واحد غيره واخدهم كلهم برضه بس بشكل مختلف
بس كلة واخد ال 24 قيراط
من فيلم “جرى الوحوش”

إنضم لكوكب المعرفة  مجتمع التعلم الحديث