أخطر تطور علمي على الاطلاق تقدمه Neuralink

أخطر تطور علمي على الاطلاق تقدمه Neuralink
إعداد : أحمد السيد & محمود علام

العالم النهارده على ميعاد مع حدث تاريخي هيغير شكل التكنولوجيا ومفهوم كلمة (بشري) للأبد.. حدث هينقلنا خطوات طويلة على سلم التطور التكنولوجي، وهيخلينا نفتح باب المستقبل حرفيًا..

الحدث ده هو مؤتمر صحفي هيتم إذاعته على الهواء مباشرة اليوم الساعة ١٢ بالليل بالظبط، هتعرض فيه شركة Neuralink المملوكة لرجل الأعمال العظيم إيلون ماسك Elon Musk لأول مرة الشريحة الإلكترونية الصغيرة اللي هيقدروا يزرعوها جوه الدماغ، ويستعملوها في التحكم في المخ ومعالجة الأمراض الذهنية والعقلية، وكمان تغذية المخ بالمعلومات، وتطويره لمرحلة فوق بشرية!!

لو انت مش فاهم إيه ده، كوباية شايك الحلوة ف ايدك وتعالى أحكيلك الإبهار ده ❤☕

بص يا سيدي.. هنبدأ من الأول.. شركة Neuralink دي تم تأسيسها سنة ٢٠١٦ من إيلون ماسك وبعض الشركاء الآخرين.. وهي بتضم ليها كل سنة ألمع العقول العلمية في مجال التكنولوجيا الحيوية Biotechnology وطب المخ والأعصاب Neuroscience.. وعدت بمراحل كتير من الصراعات الداخلية لحد ما استقرت أخيرًا، وبقى عندها تمويل بقيمة ١٥٨ مليون دولار حسب آخر إحصائية ف ٢٠١٩، منهم ١٠٠ مليون من إيلون ماسك لوحده!

تقدروا تقروا أكتر عنها هنا:

https://en.m.wikipedia.org/wiki/Neuralink

المهم بقى.. الشركة دي كان هدفها إنها تشتغل على فكرة أشبه بالخيال العلمي.. واستوحاها إيلون ماسك فعلًا من سلسلة روايات خيال علمي اسمها The Culture للمؤلف إيان بانكس Iain M. Banks.

الفكرة دي كانت إنهم عايزين يزرعوا نوع من الخيوط الإلكترونية متناهية الصغر، جوه المخ البشري (تحديدًا فوق القشرة المخية Brain Cortex)، والخيوط دي هتكون متوصلة بشكل مباشر مع الخلايا العصبية المخية أو ال Neurons..

الخيوط دي بقى هتبقى متصلة بشكل لاسلكي أو Wireless مع جهاز خارجي متثبت على الدماغ من بره، وخارج المخ تمامًا.. وهيكون متوصل بالإنترنت بسرعات خيالية.. وهيقدر إنه يسجل لحظات عمل الخلايا العصبية، وكمان يغذي المخ بالمعلومات، ويديله القدرة على إنه يندمج بشكل مباشر مع أجهزة الذكاء الإصطناعي AI، بحيث يقدر يخلي الإنسان يتحكم بعقله بس، في الموبايلات وأجهزة الكمبيوتر وأي جهاز إلكتروني يقدر يتواصل مع الإنترنت أو يقدر يتواصل لاسلكيًا بشكل عام!!!

أنت متخيل أنا بقولك ايه؟!!

الفكرة والهدف ده طموح أكتر من أي حاجة تانية ف شركات إيلون ماسك،واللي بتضم أسماء زي شركة Tesla الخاصة بالسيارات الكهربائية المتطورة، وشركة Space X اللي بتنافس وكالة ناسا لأبحاث الفضاء وقدرت فعلًا تفوق عليها!!.. تخيل انت بقى اما الخبراء التكنولوجيين يقولولك إن ال Concept بتاع الشركة دي أهم وأعظم من أي شركة تانية لإيلون ماسك، ونقدر نقول في العالم كمان!

ده الموقع الرسمي للشركة:

https://www.neuralink.com/

التطبيقات الطبية بتاعته أصلًا هتبقى لا تعد ولا تحصى.. بداية من إنه هيدي الأطباء قدرة على معالجة الأمراض العصبية والمخية المستعصية، زي مثلًا مرض ألزهايمر Alzheimer’s (اللي الناس يعرفوه بإسم الزهايمر) وغيره كتير من الأمراض المخية اللي كان مستحيل على الطب قبل كده إنه يعالجها بصورة تقليدية.. ده بالنسبة للطب.

بالنسبة للتكنولوجيا بقى، ف عايز أقولك إن المشروع ده هينقل التطور البشري كله لمرحلة جديدة مستقبلية، محدش كان يحلم يشوفها إلا في أفلام الخيال العلمي.. هتسألني يعني ايه، هقولك..

البشر يا سيدي مش هيبقوا مجرد بشر خلاص.. لا هيبقوا حاجة إسمها Transhumans.. الكلمة دي جاية من مصطلح شهير في مجالات التكنولوجيا، إسمه Transhumanism، ومعناه الحرفي هو (ما بعد الإنسانية).. وده معناه باختصار إن البشر هيتعدوا كونهم مجرد بشر ضعفاء، وهيخشوا في مرحلة البشر المتطورين المعدلين تقنيًا، اللي بيقدروا يعملوا حاجات مستحيلة على البشري الطبيعي إنه يعملها.. زي مثلًا:

١- التخاطر الفكري مع البشر الآخرين بدون كلام.. تقدر تتواصل مع صديقك عقليًا ختى لو هو بعيد عنك، باستعمال ال Neuralink.

٢- التحكم في الأجهزة الإلكترونية بدون أي لمس وبالعقل فقط، والدخول على شبكة الإنترنت بسرعات عملاقة والبحث عن أي معلومة في أقل من ثواني وبالعقل فقط.

٣- مستقبلًا، في الأغلب مش هيكون في عملية تعلم أو دراسة بالشكل المفهوم والمتعارف عليه خلاص، ولا هيكون في تلقين من مدرسين أو ما يشبههم.. وده لإن البشر هيبقى متوفر ومزروع جوه عقلهم شبكة إنترنت كاملة خيالية السرعة، يقدروا من خلالها يتعلموا كل اللي هما عايزينه جوه عقلهم علطول.

٤- هيرتفع مستوى الذكاء البشري والقدرات الفكرية الفوق طبيعية بمعدلات خيالية لا يمكن استيعابها. وهيخلي البشر كلهم علماء في المجال اللي يفكروا فيه بس، وهتبقى المعرفة البشرية كلها موجودة ومفتوحة للجميع بمجرد التفكير فيها بس!

٥- هيقدر البشر يندمجوا ويوصلوا لمرحلة إسمها (التكافل أو Symbiosis) مع الذكاء الإصطناعي المتطور AI، بمعنى إنهم هيندمجوا ويبقوا معتمدين على بعض بشكل كلي.. البشر هيكونوا بيستعملوا الذكاء الصناعي داخل أدمغتهم، وبيستعملوه في تقويم مكونات الحياة.. تخيل إنك يبقى عندك جهاز زي (سيري Siri) بتاعت آبل Apple جوه دماغك، يقدر ينفذلك أي حاجة تطلبها منه، بمجرد التفكير بس!!

أنت متخيل ومستوعب اللي انا بقوله؟!!.. مستوعب حجم التطور البشري اللي ممكن يحصل لما الإبتكار ده يخلص ويبقى جاهز للتشغيل فعلًا هيكون عامل ازاي؟!.. متخيل شكل المستقبل؟!!

فيلم اللمبي ٨ جيجا هيبقى حقيقة 😂 شابوه محمد سعد 👏

أنا متهيألي الفريق اللي شارك في الاكتشاف ده مش بس هياخد نوبل، لأ ده متهيألي ممكن جايزة نوبل نفسها تقفل بعده.. أصل مفيش تطور بشري أو إبداع أكتر من كده!! 😃

الشركة دي أصلًا من ساعة ما بدأت وهي بتشتغل بشكل سري غير طبيعي، عشان تحافظ على الإكتشاف بتاعها من السرقة.. ومفيش غير مؤتمر واحد تقريبًا عمله إيلون ماسك سنة ٢٠١٩ في أكاديمية كاليفورنيا للعلوم California Academy of Sciences، عشان يقدم فيه الفكرة الثورية دي لأول مرة.. وقال ايه بقى؟!.. خد الانبهار ف وشك كده..

قالك إن التكنولوجيا المقترحة حاليًا في جيلها الأول، هتبقى عبارة عن جهاز إلكتروني متطور هيتم تركيبه وتعليقه خلف الأذن (زي الصورة كده 👇) وهيكون شغال بشكل لاسلكي Wireless.. الجهاز ده هيبقى متصل بشكل فوري مع أقطاب كهربائية أو Electrodes مزروعة جوه المخ البشري وفوق القشرة المخية Brain Cortex، على شكل خيوط أرفع بمراحل من الشعرة!!

النظام أو السيستم ده هيبقى إسمه Brain Machine Interface أو اختصارًا BMI.. وهيكون جواه أكتر من ٣٠٧٢ قطب كهربائي دقيق جوة كل صف، متوزعين على أكتر من ٩٦ خيط إلكتروني دقيق أرفع من الشعرة، عرض كل واحد منه ما بين ٤ – ٦ مايكرو متر!!

عشان تفهم بس مدى صغر الحجم ده، خليني أقولك إن المتر الواحد فيه مليون مايكرو متر Micrometer!! 😅

وأصلًا هما عشان يقدروا يطوروا الخيوط دي، حاليًا بيصمموا روبوت صغير بشكل لا يصدق، عامل زي العنكبوت بس أصغر بمئات المرات من الشعرة، بيقدر إنه يعمل الخيوط دي وينسجها بنفسه، ومسميينه إسم مبدئي هو Sewing Robot أو روبوت الخياطة!!.. وهدفهم هو إنهم يخلوا عملية تركيب الخيوط الإلكترونية دي جوه المخ أسهل وأقل خطورة من عملية الليزك اللي بتعملها ف عينك!!

أنا حاسس إن الإنبهار والذهول نفسه زهق من كتر ما انبهر 😅 يعني عايزك بس تفكر في قد ايه إيلون ماسك ده لوحده قدم للتاريخ والتطور التكنولوجي البشري أكتر من مئات العلماء والباحثين مجتمعين..

فكر ازاي هو بيبني لوحده مستقبل مبهر وأشبه بالخيال العلمي.. وشوف حتى الشركات التكنولوجية بتاعته مترابطة ازاي.. يعني عندك Neuralink هتخلي البشر يتحكموا ف الأجهزة بمخهم وتعالجهم من الأمراض العقلية وتزود معدلات ذكاءهم وتخليهم يتحكموا ف الذكاء الإصطناعي.. وفي نفس الوقت هيقدروا يستعملوا ده في التحكم في السيارات الكهربائية الإلكترونية المتطورة اللي بتعملها شركة Tesla المملوكة بردو لإيلون ماسك.. ده غير الانترنت الفضائي اللي هو بيعمله حاليًا بالأقمار الصناعية تحت إسم Starlink واللي هيكون سرعته تتعدى الجيجا في الثانية الواحدة، وده هيتم استعماله بشكل مباشر في تكنولوجيا Neuralink دي عشان هتحتاج انترنت سريع.. وكل ده كان ممكن بفضل أبحاث شركة Space X اللي قدرت اصلا تبتكر تكنولوجيا تطلع الأقمار الصناعية بتاعت الإنترنت دي للفضاء.. واللي هي بردو بتاعت إيلون ماسك!!

الراجل لوحده بيبني مستقبل الكوكب كله.. واحنا هنا بنشتمه وبنقول عليه ماسوني 😃 لا إحنا اللي جامدين أوي ما شاء الله ✌ مش عايز أقولك بقى كمية نظريات المؤامرة اللي هتطلع كمان شوية على الموضوع ده 😃 اللي هيقولك المسيح الدجال هيتحكم فينا وإن إيلون ماسك هيرجعه، واللي يقولك الماسونية ومش عارف ايه، وهتاخد كلام من ده للصبح، عشان البشر دايمًا أعداء ما يجهلون.. وخصوصًا التقنيات المتطورة.. ف ده مش جديد.. لا هو بيحصل من فجر التاريخ..

الحاجة الوحيدة المخيفة في الموضوع هي ان التكنولوجيا دي زي ما هي مبهرة، ف هي مرعبة بمدى تطورها، وممكن جدًا استعمالها في الحروب والتحكم في الجنود بشكل لاسلكي.. والله أعلم التطبيقات العسكرية اللي ممكن تتبني عليها ايه.. ده الخوف الحقيقي عشان التكنولوجيا دايمًا سلاح ذو حدين.. مثال عندك الطاقة النووية والقنابل النووية..

المهم.. البحث الخاص بالتكنولوجيا العظيمة دي تم تقديمه في ورقة بحثية على أكبر موقع للأبحاث العلمية في مجال البيولوجيا في العالم BioRxiv.. وتقدروا تشوفوا البحث والشرح التفصيلي للتكنولوجيا على اللينك بتاع الورقة البحثية هنا:

https://www.biorxiv.org/content/10.1101/703801v4

إقروا الكومنتات بتاعت المتخصصين في الطب والتكنولوجيا الحيوية على البحث في اخر الصفحة، وشوفوا مدى انبهارهم عامل ازاي، عشان تعرفوا إننا على أعتاب المستقبل نفسه ❤

وكل ده بقى، هيتم تقديم أول نظرة حقيقية عليه النهارده في مؤتمر صحفي مباشر، هيتم إذاعته للعالم كله الساعة ٣ بتوقيت PT، أو تحديدًا الساعة ١٢ منتصف الليل بالظبط بتوقيت القاهرة ❤ وإيلون ماسك قال إنهم لأول مرة هيورونا الخلايا العصبية البشرية وهي بتشتغل (بشكل فوريIn Real Time) 😃

لازم تشوفوا اللايف إيفينت ده، عشان ده غالبًا هيكون أعظم حاجة حصلت من بداية القرن الواحد والعشرين.. وده لينك تقدروا تشوفوا منه الإيفينت بشكل مباشر:

هتلاحظوا انه بيقول العد التنازلي باقي عليه ٨ ساعات 😃 وصدقوني لو فوتّوا الإيفينت ده، هتبقوا فوتّوا واحدة من أهم اللحظات العلمية في تاريخ التكنولوجيا الحديثة.. ف انتم حرين بقى 😅

شوفوا الصور اللي مع البوست والصور اللي في الكومنتات ضروري عشان تعرفوا شكل التكنولوجيا دي هيبقى عامل ازاي👇

المهم.. حابب بس أفكركم إن المقال ده تعبني جدًا في تقديمه، وانه ناتج مجهود ساعات من البحث والكتابة والتأكد من المصادر.. ف لو عجبكم يا ريت متنسوش الشير لإنه بيساعدني جدًا في نشر المقالات والعلوم دي للناس جميعًا، وكمان بيعبر عن تقديركم للمجهود المتواصل ده.. الشير هو دعمكم اللي بطلبه، ف متبخلوش به لو شايفين المجهود يستحق ❤

متنسوش تعملوا منشن لأصحابكم وأهاليكم وحبايبكم يقرأوا معاكم ويستمتعوا، وقولولهم يستنوا الإيفينت، ويكونوا ممتنين إنهم اتولدوا في اللحظة دي من التاريخ ❤

هستنى آراءكم وتحليلاتكم في الكومنتات تحت 👇 ودي بعض المصادر اللي ممكن تقرأوا فيها أكتر عن الموضوع:

[latest-selected-content limit=”5″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]