إزاي تحصل على وظيفة متميزة؟ 8 نصائح هتسهل عليك المشوار وتساعدك كتير كتب: محمد البنا
لازم تعرف إن سوق الأعمال، سوق كبير ومتسارع التغيير، وكل يوم في جديد، ولو أنت عاوز تبقى من المميزين فيه يبقى ركز في الكلام الجاي ده:
عيب كبير انك تكون ضعيف في اللغة التانية
اللي هي الانجليزية، ولو أنت بتحلم بوظيف كويسة يبقى لازم يكون مستواك في اللغة جيد، جيد جدًا، ممتاز، لإن اللغة = فرصة، وعدم اتقانك للغة الانجليزية ولو بنسبة معقولة ده هيضيع منك فرص في أماكن محترمة، وللأسف هتلاقي نفسك مضطر تقبل بالأماكن الأقل لإنها مش بتشترط اللغة.
لو أنت متقن للغة انجليزية يبقى أنصحك تبدأ تعلم لغة جديدة أرشح لك الألمانية، لإنها هتزود فرصتك في الشغل بشركات كبيرة في ألمانيا، أو شركات مصرية وبتتعاون مع شركات ألمانية ومحتاجين ناس بتجيد اللغة دي، وبالأخص لو أنت مجالك له علاقة بالتكنولوجيا أو الطب، أو هتساعدك إنك تحصل على منح دراسية في ألمانيا ..
مفيش حاجة أسمها انك لا تجيد الكمبيوتر أو مستواك ضعيف فيه
إجادتك للكمبيوتر مش معناها إنك محترف تصفح انترنت أو فيس بوك، لكن المقصود هنا هو البرامج اللي بتستخدمها في مجال شغلك، مثلاً لو أنت محاسب يبقى (الاكسيل) ده أقل شيء، وممكن معاه برامج محاسبية تانية شهيرة بتستخدمها الشركات الكبيرة زي مثلا برامج Oracle وغيرها، أنصحك تسأل وتبحث عن أشهر البرامج اللي بتستخدم في مجالك.
بلاش تعتمد على دورات التنمية البشرية ولا التطوير الشخصي
دي مش أول حاجة بيركز عليها أصحاب العمل أو الـ HR، ممكن تضيفها وخاصة لو دورات في التواصل، فرق العمل أو القيادة،
الأهم هو إن تكون الكورسات دي فعلاً أثرت على شخصيتك بشكل إيجابي، مش مجرد شهادات وورق.
بلاش العشوائية في الكورسات والشهادات اللي عمال تاخدها
لو ناوي على مجال عمل محدد، يبقى شوف الكورسات المناسبة واللي تقوي موقفك، مش مجرد حشو للـ CV
ساعاتك اللي بتضيعها على الفيس بوك وتويتر دون فائدة هتدفع تمنها غالي جدًا مستقبلًا
لما تقدم على وظيفة وتلاقي الـ Cv بتاعك ضعيف وأنت داخل منافسة مع ناس أمكانياتها أعلى. (السوق شرس والمنافسة عالية)
لو أنت في الكلية لسه، ركز على التقدير، مهم جدًا متسمعش كلام اللي يقلك إن مقبول زي جيد زي امتياز، والله بيضحكوا عليك، وكل ما تقديرك يكون أعلى كل ما فرصك بتكون أكبر، والتقدير باضافة للمهارات واللغة والدورات بيقوي موقفك جدًا جدًا.
الوظيفة في الأول والأخر رزق
ولكن رزق مربوط بالسعي، فتأكد إن ربنا مش هيساوي بين واحد بيقعد كل يوم 4 ساعات على النت علشان يتعلم، وواحد تاني بيقضي نفس الوقت في الفيس بوك واليوتيوب والافلام والكورة والـ games
نجاحك في الحصول على وظيفة معينة يخضع للعبة الاحتمالات، والموضوع مش صدفة و عبثي، باختصار كل ما زودت مهاراتك وامكانياتك، كل ما احتمالية قبولك هتزيد، يعني مثلا: اتنين متقدمين لوظيفة محاسب ..
أحمد: لغة انجليزية جيد جدًا – الاكسيل جيد – دورة في المراجعة والضرائب
كريم: لغة انجليزية جيد جدًا – الاكسيل جيد – دورة في مهارات التواصل
تفتكروا مين الاحتمالية أكبر إنه يتقبل في الشركة؟ طبعًا بعيدًا عن الوسايط
احتمال (أحمد) أكبر في القبول لإنه عنده ميزة تنافسية ربنا معاكم وتحققوا كل اللي بتحلموا بيه لو حسيت إن المقال مفيد، ياريت تنشره علشان يشوفه أكبر عدد من الناس
