كورونا من عند الله مهما كان السبب في ظهورها وهي مأموره بما تحصد وتمرض !!
كتب: أحمد فيصل حماد
من كام الف سنة كده ..قوم سبأ (بلد في اليمن) كان عندهم مزرعتين كبار جدا جدا من جميع انواع الفاكهه لدرجة ان الفاكهه كانت تسقط فروع الاشجار من ثقلها !!
وكانت مغرقة اهل البلد حرفيا ومعيشاهم في نعيم تام !!
حتي ان المؤرخين قالوا ان المرأة كانت تحمل فوق راسها الاناء وتمر فقط تحت الشجر فمن كثرة الفاكهة كانت تسقط بأنواعها فتملأ الوعاء فوق راسها إلى أن تصل بيتها !!
دون ان يقطفها أحد !!
وطبعا كانت لهم حضارة من اقدم الحضارات في الكوكب وجيش من اقوي جيوش الأرض وقتها ( اللي الملكة بتاعته كانت بلقيس . صاحبة العرش وقصتها الشهيرة مع سيدنا سليمان والهدهد )
المهم
كان سبب الازدهار بتاعهم ده سد علي النهر كبييير جدا طوله ٦٠٠ متر . وعرضه ٦٠ متر . وارتفاعه ١٦ متر . ومخزن الميه ومخلي المزرعتين دول يشربوا ويبقوا زي الفل، تمام كده !!
وبعدين فجأة ..
و مرة واحدة ، حصل شروخ في السد واتكسر تماما وطبعا حصل سيول عارمة مسحت الارض تماما ودمرت كل شيء.. . واصبحت ديارهم خرابا .
وانتهت حضارتهم للابد ..
اي مؤرخ هيقولك طبعا ان السد والميه والارض الخصبة كانت هي سبب الحضارة .
وهيحكيلك ان بسبب الجغرافيا وعوامل التعرية والزلازل مثلا كانت من أهم اسباب انهيار السد ده غير طبعا العمر الافتراضي . و خلاص
قصة منطقيه و واقعية جدا و مفهومة …
ولكن لما ربنا سبحانه وتعالي هوا اللي حكي القصة لينا في القران ،و قال في كتابه:
” لَقَدْ كَانَ لِسَبَإٍ فِي مَسْكَنِهِمْ آيَةٌ ۖ جَنَّتَانِ عَن يَمِينٍ وَشِمَالٍ ۖ كُلُوا مِن رِّزْقِ رَبِّكُمْ وَاشْكُرُوا لَهُ ۚ بَلْدَةٌ طَيِّبَةٌ وَرَبٌّ غَفُورٌ “
يعني كل اللي مطلوب الشكر لله، احترام و تقدير النعمة، مطلبش حاجة غير الشكر .
وفي اخر الايتين قال كلمتين اتنين ” فأعرضوا . فأرسلنا عليهم سيل العرم “ وبس . خلصت القصة
هي دي القصة وهو ده السبب الحقيقي . .
يعني انهم لو شكروا ربهم لما حدث هذا الانهيار . وماكانش حصل السيول دي !!
ايوه . ومش انا اللي قلت . ده ربنا اللي اكد كمان
سيبك بقي من الارض وجغرافيتها و الزلازل والبراكين والشروخ وعوامل التعرية بالسد ..
والله لو شكروا لكان السد موجودا الي يومنا هذا .. ولاكننا كلنا من ثمار جنانها بشرط ان نشكر ..
بالظبط العالم الان .. و كورونا
كلنا كنا عايشين . في نعم مالهاش حصر . ولكن العالم كله بيكفر بنعم الله،
كله باصص على كله . ومحدش مرتاح ولا بيشكر
علي مستوي الافراد والعائلات. و الدول
الكرة الارضية حكام و شعوب باصيين للخليج و فلوسهم !!
والخليج باصيين لاوروبا وامريكا والحريات والحضاره !!
واوروبا و العالم عينهم علي البترول اللي في الدول التانيه و الخليج !!
وبيموتوا ولادهم في حروب مفتعلة حرفيا في الخليج علشان البترول !!
واللي معاه ولاد بيبص للي معاه فلوس . واللي معاه فلوس بيتمني يشتري صحة بالفلوس ومش بيلاقيها . كل واحد بيبص علي التاني محدش بيحمد ربنا ع النعم اللي عنده، و بدل ما يستمتع بيها بيغل و يحقد علي ناس تانيه !!
وابلغ مثال علي كده هات اغني اهل الارض . وقوله انك هتموت بكورونا الان وشوفه يدفع كام مليار من فلوسه علشان يشتري يوم واحد فقط زيادة في عمره !!
واحنا دلوقتي سبحان الله اقصي امانينا ان نعود الي ماكنا عليه نسلم علي بعض واحنا مش خايفين نموت !!
او الكبيرة جدا
اننا نرجع نصلى فى المسجد أو إننا لما نموت نتغسل ونتكفن والناس تصلي علينا فى المسجد مش فى الشارع ومتبقاش خايفه تشيلنا
بالله عليكم حد في حياته طووول عمره تمني هذه الامنيه من قبل
اللي عنده نعمه يلحق يشكر عليها ربنا كويس جدا . ويتعظ من قوم سبأ . بدلا من ان تسلب منه
فالسعيد من وعظ بغيره . والشقي من نسي نفسه حتي وعظ به غيره !!
[latest-selected-content limit=”10″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”11″ type=”post” status=”publish” dtag=”yes” orderby=”dateD” show_extra=”taxpos_category_before-title”]
