الإختيار الأنسب لعلاقة صحيحة

أسس الإختيار المناسب فى العلاقات 
كتبت : ساندي هشام .

العلاقات شئ ضروري في حياتنا لإن الإنسان بطبعه إجتماعي ميقدرش يعيش لوحده بشكل كامل

لازم يكون جنبه أشخاص يساعدوه ويكونوا ونس وقت حزنه أو فرحه بس إختيارنا للأشخاص ده بيكون بناء علي إيه ؟

قبل ما تبدأ أي علاقه أيا كان نوعها سواء صداقه أو حب أو خطوبه لازم تكون عارف أنك هتواجه مشاكل لأن كلنا لينا وجهات نظر وأراء مختلفه حتي لو كنا متفقين في أغلب الاراء ولينا مبادئ واحده هيكون فيه ولو 1% إختلاف .

لو العلاقه التي انت علي وشك تدخلها دي علاقه صداقه بيكون ليك الإختيار في إنك تكمل في الصداقه دي مع علمك الكامل بنقط الإختلاف أو عيوب الشخص الأخر بتكمل بناء علي قدرة تحملك وتسامحك لعيوبه ومشاكله وبناء علي مقدار حبك وإحترامك للشخص ده .

لكن لو العلاقه دي علاقه خطوبه هتطور لجواز لازم تفكر مليون مره في الإختلاف الي بينكم لانه في أغلب الأحوال ومهما كان مقدار حبكم وإحترامكم لبعض والإتفاق الكبير في شخصياتكوا… بيكون فيه نقطه إختلاف وهي دايما المشكله ، بتفضل تكبر لغايه ما توصل للإنفصال، فمن الأفضل تكون موازن أمورك قبل ما تخوض في جواز ويتبعه طلاق .

هل الحب هو أهم حاجة ؟

من وجه نظري مقوله “أهم حاجه الحب ” دي مقوله مش كافيه في إنك تبني عليها حياه .

الحب شئ مهم بين الطرفين بس مش أساسي,

ده ممكن يكون في المرتبه الرابعه بعد التفاهم والأحترام والثقه ,حتي لو الحب بسيط ممكن نكمله بالعشره والموده, فنركن الحب علي جنب لو بندخل في علاقه جديه ونركز في المعايير الأهم .

طبعا الأقدار بيد الله ومتفقين كلنا علي كدا بس لازم ناخد بالأسباب .

إسأل نفسك سؤال لما تبدأ تشوف الإختلاف الي بينك وبين الطرف الأخر لما تشوف العيوب بتاعته وتوزنها …إسأل نفسك هل أنا هقدر أستحمل النوع ده من المشاكل ؟

هقدر أكمل وأواجه المشاكل دي من غير ما أسيبه في النص ..من غير ما أجرحه أو يجرحني ؟

لو إجابتك هي (اه)ولو بنسبه بسيطه كمل وواجه وحب بكل طاقتك ,بس متجيش عليه ولا تيجي علي نفسك بشكل كبير, حط جوه مخك انك قادر .. وهتعدي .

بس لو شاكك في قدرتك بإنك تتحمل المشاكل دي أيا كان نوعها أو شايف أن الشخص مش يستاهل أنك تتحمل عشانه وقف العلاقه دي حتي لو كانت روحك متعلقه فيها حتي لو واثق أن حبكم هيكمل.

الحب هيقل تدريجي طول ما فيه مشاكل أنت مش قادر تستحملها .. أهون تخسره وتتوجع علي قلبك فتره بدل ما تجرح كل الي حواليك عشان علاقه عرفت أن نهايتها كان الفشل ومع ذلك كملت وغضيت النظر عن أنك أضعف من أنك تتحمل.

نوع المشاكل الي بتقابل المقبلين علي دخول علاقه جاده :

خلينا نتفق إن المشاكل دي بتتمثل في:

1. مشاكل ماديه.

2. مشاكل إجتماعيه (الطبقيه) .

3. مشاكل ثقافيه (الدراسيه) .

لو مشاكل ماديه ممكن تتحل في يوم ,لو شايف أن نسبه حبك وثقتك وإحترامك للشخص أكبر من المشاكل الماديه كمل لأن الأرزاق بيد الله مش بتاعتك ولا بتاعته مين عالم يمكن ربنا يصلح الحال .

لو شايف إنك من النوع الي عايش في ترف طول عمرك ومن الصعب تنزل لمستوي مختلف تمام متكملش ,هتنجرح وهتجرح الشخص قدام رغبتك في إنك تقدر تعيش زي ما كنت عايش هتطغي عن حبك .

تاني نوع من المشاكل ممكن يقابلك هو إن يكون في إختلاف في الطبقه الإجتماعيه بينكم

بمعني أنت تكون من طبقه عاليه عايش ظروف معينه ومتعود علي إسلوب حياه معين بطريقه وكيفيه معينه وحبيت شخص مختلف في إسلوب الحياه والمستوي والطريقه والمبادئ.

لك كامل الإختيار بعد التفكير العميق في أنك تكمل أو ترفض, عندك القابليه إنك تستحمل الشخص ده وهو مختلف عنك في كل حاجه هتقدر تفهمه وتقدره وتحترمه وتتقبل مبادئه المختلفه عنك من غير ما تنجرح أو تجرح كمل

شايف أنه أكبر من أنك تستحمل الطريق ده بكل عواقبه إنهي متكملش وإنت مش عندك الثقه الكافيه .

أخر نوع وهو بيكون في إختلاف الجذري في ثقافتكم وتعلمكم

خلينا متفقين إن التعليم هو عامل أساسي في الطريقه الي بتشوف بيها الحياه كل واحد علي حسب تعليمه ودراسته بيواجه الحياه

الي إتعلم تعليم متوسط مش زي الي إتعلم تعليم عالي مش زي الي مش حظي بفرصه إنه يتعلم .

في الأخر محدش بيعيش حياه كلها راحه وسعاده, المعاناه والألم من أركان الحياه ,بس في حدود لكل حاجه لو بإيدك تمنع شئ أنت مش قده إمنعه. وإتعلم تفكر وتشوف من غير ما تاخد قرار متهور لمجرد مشاعر أو علي سبيل التجربه .

[latest-selected-content limit=”10″ display=”title,excerpt” titletag=”strong” url=”yes” linktext=”إقرأ الموضوع كاملا” image=”full” elements=”3″ type=”post” status=”publish” dtag=”yes” orderby=”dateD” show_extra=”taxpos_category_before-title”]