العنف الأسرى .. آثاره وطرق التعامل معه
كتبت: منه زين
وبعدين كملي؟ عمل ايه بعد ما ضربك وورم لك دماغك كده؟
= أبدا… جاب لي تشيز كيك واتأسف لي… بجد على قد ما هو عصبي حنين جدا وبيخاف على زعلي…
ده موقف…
“بس ده أبويا… هعمل محضر ف أبويا؟ هو ده البر!”
آدي موقف تاني …
خد كمان موقف…
“دي مراتي وانا حر فيها”
“دي بنتي وانا حر فيها انا بربيها”
“انا حر”
لا .. هنا انت مش حر… هنا انت همجي …
حسيت ايه وانا بقولك يا همجي ؟
انك متعصب صح؟ طب انا ماعرفكش ولا بيني وبينك صلة عشان تزعل وتتعصب وانا وانت هننسى بعض أساسا مجرد م تخلص قراية المقال وكل واحد هيشوف أموره اليومية عادي…
بالك بإنسان متعلق أو متأثر بيك زي بنتك ولا مراتك ولا ابنك حتى… بالك الناس دي لما انت تأذيهم هيحسوا بإيه؟ سواء نفسيا أو جسديا…
حسيت ايه وانا بدي لنفسي الحق اني اقلل منك أواهينك؟ والناس بيأكدوا على كلامي انك فعلا همجي ؟
مش الناس اللي انت بتقعد معاهم على القهوة وبيسقفولك لا…
أنا اقصد الناس السوية… حسيت بإيه وهم بيدعوا عليك هم وعيالك ومراتك وبيبصوا لك بقرف ويتمنوا انهم يشوفوك على حبل المشنقه؟
شفت الناس مغلولة منك ازاي؟ رغم انهم مش يعرفوك…
بس سمعوا عنك ويمكن في اللي جربك وجاي ينتقم في مقالي هنا ويسمع اللي هو مش عارف يقوله…
انت بتدي نفسك الحرية تتصرف في جسم انسان تاني!
انت مش مستوعب ان ده ملكه هو مش ملكك انت؟!
طب بعيدا عن الأذى او الاعتداء الجسدي… انت مدرك انت بتبقى في نظر ابنك او بنتك ازاي وانت بتقارنهم بغيرهم؟ ولا بتقلل من قدراتهم قدام نفسهم او قدام الناس؟
هتبقى او هتبقي بابا وماما اللي بنهرب من حضنهم الخانق لأحضان ناس تانيه بتدينا الحنية اللي مش لقيناها معاهم… والناس دي احنا مانعرفش نواياهم ايه… ولا ممكن يحصلنا ايه في وجودهم… طب انت مستني منهم يحسوا ايه ناحيتك أساسا وانت بتتصرف تجاههم كده؟ انهم يحبوك ويحترموك مثلا ؟
طب تعالى انا كمان اطلع فيك غلي واجلدك واسلخك واقدمك عشا للفراخ اسمنهم واكلهم ع الغدا ف يوم كده…
تعالى اهينك وافرض عليك رأيي ولو ماسمعتش الكلام وعملت اللي بطلبه منك هقطعك تقطيع وهمارس عليك العنف اللي انت مدي لنفسك الحق تمارسه على غيرك مهما كانت درجة القرابة بينكم… وطالما شايف نفسك حر…
من حق كل شخص يمسكك ف الشارع يضربك أيا كان السبب…
ايه زعلان ليه كده من كلامي؟ ما انت اللي بتناقض نفسك…
أما لو انت بتلجأ للعنف فى العلاقة الحميمة بهدف انك تعف نفسك ، فكده بتدخل نفسك فى مصيبة أكبر اتكلمنا عنها قبل كده اسمها الاغتصاب الزوجي
طيب الزوجة ….
في كل مره بتقبلي تنضربي فيها قدام عيالك وتتصالحي بطاجن عكاوي كده انتي مش بتحمي بيتك من الخراب… انتي بتخربيه اكتر... وعيالك ده لو موجودين مش هينسوا التفاصيل دي وهتبقوا اسرة متفككه وبيئة مؤذيه ماحدش فيها سالك مع التاني…
في كل مره الشخص هيرفض فيها انه يقول “لأ” ضد أبوه أو أمه لما يتعرض للأذى هيبقى مع الوقت شخصية هشة واي حد ممكن يقطع فيها ويفتكر ان ده العادي ويتعامل على أساس انه فعلا غلطان وان العقاب ساري عليه …
يعني لامؤاخذه في الكلمة “قفا” اللي رايح واللي جاي يلطش فيه… البنت اللي هتتجوز هتتقبل ان جوزها يضربها عشان هي اتعودت على كده…
والشاب اللي شخصيته ضعيفه هيتقبل مراته تهينه قدام الناس وتمد ايديها عليه بردو… رغم ذلك خلونا نقول ان بردو الستات اكتر ناس متبهدلين في النقطة دي
بص انت هتقبل مقالي زي ما هو بكل كلمة فيه عشان انا ما بزايدش عليك الكلام ده كله انت اللي مطلعه على نفسك وما هم الا صفات ببرزهم فيك … واللي محتاج علاج هنساعده يخضع ليه… بس عشان تاخد العلاج اعترف انك مريض الأول…
في كل مكان في الدنيا في عنف أسري …
في أب بيمسك عياله ومراته ضرب وهو سكران في ركن هنا ولا هناك…
في زوج لسه ضارب مراته عشان عملت له عدس بدل الكشري اللي هو كان طالبه… ونفس الزوج بيصالح مراته بلب وسوداني آخر الليل ده بنسميه دس السم في العسل… عشان مافيش أي وسيلة من الوسائل تخلي الشخص يقبل انه يكون ملطشة…
العيل اللي مديت ايدك عليه هيكبر يمد ايده على الناس ويمارس عليهم العنف عشان ما لقاش اللي يوجهه وهيكون فاكر ان ده العادي مش مجرد انه بيكابر على الغلط… فانت مسئول… مسئولية كاملة عن الجيل اللي بتربيه…
ما تقولش وانا مالي! وكان في ايدي ايه! لا في ايدك تتكلم وفي ايدك تقنع اللي قدامك وفي ايدك تتأقلم على طباعه وأهوائه لو فضل يعاندك…
لكن تمد ايدك ده… عمري ما شفت له لا نص من القران ولا حديث من السنة…
تعالى لي انت بقى في الدين عشان اعرفك ان ربنا سبحانه وتعالى قال في القرآن “ولو كنت فظا غليظ القلب لانفضّوا من حولك” قالها للنبي صلى الله عليه وسلم وهو بيدعو الكفار للدين الإسلامي… انت متخيل ان دول كفار! بالك أهل بيتك! أقرب الناس لقلبك وهم هم اللي هيقفوا معاك في شدتك ويواسوك ويشاركوك الفرحة كذلك…
طب الآية الكريمة اللي بتقول: “ادع إلى سبيل ربك بالحكمة والموعظة الحسنة وجادلهم بالتي هي أحسن”!
طب النبي صلى الله عليه وسلم لما قال “رفقا بالقوارير” ولا لينه وعدله في التعامل مع زوجاته ده ما ألهمكش تحسن معاشرة زوجتك؟ وتكرمها بناءا على السنة كنوع من أنواع الالتزام؟
ولا انت ما بتلتزمش غير بالأعراف اللي بعيده كل البعد عن الدين؟
انا مصدري هنا الدين… انت مصدرك ايه؟ العادات والتقاليد؟
“اكسر للبنت ضلع يطلع لها 24″؟ كسر حُقّك… ودماغك ومبادئك الفاسدين…
انت سايب الدين ورايح تتمسك بالعرف؟
“انتي عايزه الناس تمشي على حل شعرهم بقى وبتحرضيهم على الفساد!”
يسعدني أقولك انت الفساد… ايوه انا جايه اجلدك في مقالي واشد حيلي عليك وهحرض الناس ضدك وهفضل ضد اللي انت بتعمله لحد ما انت وغيرك تقفوا عند حدكم وتنزل حملات توعوية تفهم الناس ان اللين في أي علاقة سواء زوجية أو أبوية لا بد منها وان أي حد هيتعنف على حد هيبقى في ضده عقاب…
انت فكرك ان انت القانون؟ فكرك ان اللي يؤيدك هو الصح والنقيض فاسد وفاسق وزنديق؟
لا انت بتحلم وبتهلس بس وانت بتخلص سجارة الحشيش في ايدك… لكن انت صفر على الشمال… انت وقوانينك الفاسدة… وأي حد يدعمك في اللي بتقوله…
موضوع النهارده ممسوس فيه الأطفال والنساء… لأن كل من ربنا وهبه سلطة ولا قوة لو مش سوي نفسيا هيستخدمهم على حد أضعف منه فينتج بالمعنى الحرفي “وحش”
اعتقد دلوقتي الكل قادر يعرف العنف الأسري على إنه اعتداء بيتم من أحد أفراد الأسرة على باقي الأفراد أو واحد منهم سواء كان الاعتداء جسدي أو لفظي…
وعيد التفكير معايا تاني كده بدل ما تقول “ما كلنا اتضربنا وبقينا زي الفل”
أولا احب أقول انك مازوخي … بتحب الضرب او التعذيب ودي حته تانيه فما ترغمش غيرك يبقى زيك ويتقبل نفس الفكرة عشان ترضي نفسك المريضة…
ثانيا انت مش زي الفل… لما تموت عيالك مش هيزعلوا عليك… ومراتك العبء اللي كانت شايلاه ومستحملاه سنين هتحس انها لأول مره بتتنفس… ايوه والله مش ببالغ…
ما قلنا ماتزعلش مستني منهم ايه يعني؟ ما قلنا مش لازم الكل يبقى مازوخي زيك ومتقبل ينضرب او يتهان ويتقلل منه… فكلامي هنا يحتمل عنصرين… اني بسلخك بلساني عشان مش قادره اطولك بإيدي واخد لهم حقهم… والعنصر التاني انك تتعالج… وتبطل تكابر… وماتسعاش تنول الرضا من المجتمع…
اسعى انك تنوله من أهل بيتك… عمودك في الحياة… لأننا بكل بساطة لو بنشتغل مع انسان زيك او بندرس معاه او في محيط بيجمعنا فيه فالمحيط ده أيا كان درجة انحدارك هيجبرك تلزم حدودك عشان القانون بيمنعك تعمل غير ده…
لكن في بيتك زي ما انت بتقول “انت حر”…
والمشكلة كلها بدأت من هنا…
لكن الملاجئ موجودة… سكن الطالبات او شقق ايجارها رخيص… والمحلات والشركات الصغيرة واي مكان بيبقى فيه وظايف شاغرة… تقدر توفر/ي منها مصروف شهري او يومي تأكل نفسك بيه… مش لازم رفاهية… انت بقدر الإمكان بتحاول تعيش… فخلينا نقف على رجلينا الأول وبعدين نبقى نشوف الرفاهية بعدين…
اللجوء لمنظمات حقوق الإنسان ومنظمات حقوق المرأة بردوه هيوفر مساعدات بالغة ومضمونة أكتر من نتايج الجهود الشخصية المذكورة فوق… لكنها حل مؤقت…
امتى اعمل كده؟
لو بدأت الاحظ اني بمارس العنف على غيري زي ما بيتمارس عليا… ولو بدأ يبقى في جسمي إصابات… لو حد من اخواتي فقد حاسه من حواسه من كتر الضرب… ولا امي اغمى عليها وجالها ارتجاج لنفس السبب… في اللحظة دي لازم بلاغ في أقرب قسم وأثبت حالة وأجيب تقرير طبي بالإصابات وأجيب شهود من أهل بيتي أو جيراني قدر المستطاع عشان أعرف اخلص نفسي أو غيري من المستنقع ده… خايف ومتأكد ان كل ده صعب وممكن يبقى في ثغرات تخليك تفشل؟
طيب الحل انك تنفصل تماما عن البيئة دي في أقرب وقت… في إعلانات شغل في كل حته عندك تطبيق wuzzuf و indeed بيتيحوا لك الفرصة تدور على شغل في مكان انت قريب منه… وتقدر تلاقي شقق ايجارها رخيص زي سكن الطلاب بعيد عن بيتك على قد ما تقدر بردو وتلم شنطك وتمشي… لا ده مش جنان… الجنان الحقيقي انك تفضل في مكان انت بتتعرض فيه لأذى مبالغ فيه…
انك تستحمل ده مش ذكاء ومش حنية ومش من الدين…
وانك تطيع والدك أو والدتك ده واجب إلا في الأمور الغلط… فماتحاولش تبرر…
ولو عندك قريب يقدر يحتويك وتآمن له هيكون أفضل على الأقل هتلاقي شخص يعينك في وضعك اللي انت فيه… لو ما لقيتش مافيش مشاكل تعيش لوحدك زي ما قلت لك… أبرك لك ألف مره من انك تقع في ايد الوحوش اللي معاك في البيت…
طب قانونية الموقف؟
تعالى افهمك حاجه… السلوك الإجرامي 3 أنواع:
1. الضرب
2. الجرح
3. إعطاء مواد ضارة
يعني القانون مطلعني مجرم على آخر زمن؟
تخيل!
استناني اعرفك بقى عقوبة اللي انت بتعمله ده ايه…
المادة رقم 240 من قانون العقوبات بتمسي عليك وبتقولك إنك لو ضربت حد أو جرحته لدرجة إنك سببت له عاهة مستديمة، أفقدته سمعه أو بصره على سبيل المثال او قطعت له ايده او رجله عقوبتك السجن من 3 ل 5 سنوات
ولو مع سبق الإصرار والترصد بيتحكم عليك بالأشغال الشاقة من 3 ل 10 سنوات… حلو؟
مطلوب منك ايه كشخص بيتعرض للعنف؟
قدامك حلين… لو خايف من الجانب القانوني ومش معاك تمنه فانت تقدر توفر تمن عيشتك في مكان تاني بعيد عن جهنم اللي انت حاطط نفسك فيها… وتقدر توفر شغل لنفسك زي ما قلت لك…
عايز تلجأ للحل القانوني مهما كلف الأمر؟
إثبات حالة… لازم تقرير طبي يوثق الإصابات من الطب الشرعي بإذن من النيابة وبناءا عليه تقدم محضر في ابوك او أيا كان اللي بيؤذيك ولازم يكون معاك شهود أو دليل بيّن على إن فلان بيؤذيك… ولازم تكون على تواصل مع أكتر من محامي عشان ماحدش يستغلك وتعرف تاخد تفاصيل من أكتر من مصدر…
أو تلجأ لمنظمات حقوق الإنسان أو المرأة وهم هيكون لهم دور كبير في خطوة زي كده…
طب بالنسبة للأطفال؟
لازم دايما يكون في متابعة من المدرسين والأخصائيين في المدارس أو الجامعات ولازم يكون في تقارير وعليها يتاخد اجراء قانوني لو في حالة يدان فيها ولي الأمر…
ولازم يكون في أي منظمة خاصة أو حكومية مش بس الأطفال أو النساء… بل بشكل عام… عشان نوقف أي شخص عند حده… ونمنع العنف قدر المستطاع مش هقولك انا بديك علاج سحري بس انا بقولك ايه المتاح تعمله في وضعك ده…
ولازم يكون في حملات توعوية بشكل دائم في القرى عشان الناس تفهم وتتعلم… للأسف معظمهم كبر وفاهم إن ده العادي… لازم ندي الموضوع أهمية ونبطل نتجاهله… كلنا مسئولين والغلط في أي ركن هيسمع في كل حته…
وراجع نفسك تاني Victim or not؟
الموضوع ده اختيارك وانت مسئول عنه مش حد تاني…
وربنا يحفظ الجميع
سلامي لكم وكل سنه وانتوا طيبين
سر نجاح الأعمال فى القرن ال21تُعدّ هذه الأفكار والمجالات بمثابة مفتاح النجاح في القرن الواحد والعشرين، حيث تُمكن الشركات من تعزيز قدرتها التنافسية، وتلبية احتياجات العملاء المتغيرة، وخلق فرص جديدة للنمو والتوسع وفي هذا السياق، نحاول تسليط الضوء على أهمية التركيز على بعض الأفكار والمجالات الحديثة لنجاح الأعمال في القرن الواحد والعشرين.
إقرأ الموضوع كاملا
هذه هي علامات الأمراض النفسية التي تنبهك لأهمية زيارة الطبيب النفسيمشاكل الصحة العقلية هي مشكلة حقيقية يمكن أن تؤثر على أي شخص. إذا كنت تعاني من أي من علامات مشاكل الصحة العقلية، فمن المهم طلب المساعدة من أخصائي الصحة العقلية. هناك العديد من العلاجات المتاحة التي يمكن أن تساعدك على التعافي من مشاكل الصحة العقلية والعيش حياة طبيعية سعيدة.
إقرأ الموضوع كاملا
مفاتيح النجاح في العمل الحر : إفهم سر اللعبةيتطلب النجاح في العمل الحر تعلم العديد من المهارات، بالإضافة إلى التخطيط الجيد والإصرار والصبر، فإذا اتبعت الاستراتيجيات التي ذكرناها وحرصت على تعلم مهارات النجاح وتطويرها سيساعدك ذلك على تحقيق النجاح في العمل الحر والمجال الذي اخترته لنفسك.
إقرأ الموضوع كاملا
التغلب على ضغوط الحياة بالمرونة النفسية : طاقتك الخفية لبناء شخصية قويةيعتبر بناء المرونة النفسية أمر حيوي لصحة وسعادة الفرد
ومن خلال تطبيق التمارين والاستراتيجيات المناسبة، يمكن للأفراد تعزيز قدرتهم على التكيف مع التحديات والضغوطات بشكل فعال، والحفاظ على صحة نفسية إيجابية
كما إن ممارسة التفكير الإيجابي، وتعزيز العلاقات الاجتماعية، وممارسة التمرين البدني، والبحث عن المساعدة الاحترافية عند الحاجة، كلها تساهم في بناء المرونة النفسية.
إقرأ الموضوع كاملا
استراتيجيات تحقيق الأهداف: كيف تضع أهدافًا ذكية وتحققها؟لم تكن الأهداف مجرد أحلام ولكنها بوصلة النجاح والتطور في حياتنا، لذلك سوف نستكشف معا في هذه المقالة استراتيجيات تحديد الأهداف وكيفية تحقيقها، كما نتعرف أيضا على الأهداف الذكية وخصائصها، فلنتابع سويا.
إقرأ الموضوع كاملا
كل ما يتوجب عليك فعله وأنت تقرأ لي؛ أن تنسى ذاتك قليلا وتبدأ جديّاً في تخيل نفسك كبطل ممن أكتب عنهم، سأكون سعيده إن شاركتني نتيجة قراءتك ..
