Menu Close

ما هى حقيقة الاغتصاب الزوجي؟

زوجة مقهورة
الاغتصاب الزوجي
الاغتصاب الزوجي
كتبت: منه زين

Read the article in English 


موضوع شائع الفتره الأخيرة… وعلشان كده أنا اخترته يكون خاضع للنقاش… مش للجدل لأن عمر ما الجدل كان بيوصل لحل أو بيفهم فكرة تجول الأذهان…
مبدئيا كده ايه معنى الاغتصاب الزوجي وهل له وجود أساسا ولا المصطلح ده مُخَلّق من الأخوات اللي عايزين يتمنعوا عن أزواجهم فقط ولا أساس له من الصحة؟
اهدى بس يا عزيزي القارئ وركز معايا…
كلمة اغتصاب أولا ممكن ترتبط بأي مصطلح تاني… طب معناها ايه؟
في اللغة : معناه الغصب
طب في الشرع؟ أخذ الشئ بالإكراه… أظن الكلمة معناها واضح اهو… يعني كده أقدر أقول ان في اغتصاب زوجي؟ هقولك 100% اه… هتقولي ازاي يبقى في مصطلح زي ده بين اتنين متزوجين؟! هقولك عادي…
لأن بكل بساطة في طرف من الاتنين مش موافق وطرف تاني موافق… لو الإيجاب والقبول ما تحققش كشرط لإتمام العلاقة يبقى ده يقع تحت بند “الإكراه”…
طب ما ده حق من حقوقه أو حقوقها… هقولك بردو لسه تحت بند الإكراه…
ربنا سبحانه وتعالى قال: “خلق لكم من أنفسكم أزواجا لتسكنوا إليها وجعل بينكم مودة ورحمة”
الموضوع مش حرب خالص… ولا عداوة… في أسر بيشتد فيها النزاع… فمانجيش في الحالة دي ونقول عادي الزوجين يجتمعوا ببعض!
لأ يا جماعه مش عادي… مش عادي يكون ضاربها وضارب عيالها ومسمع صوتهم لآخر الشارع وييجي آخر الليل يطلب طلب زي ده… في حين إن ممكن المشكلة نفسها ماتكونش لسه اتحلت بل ممكن تتفاقم كمان تاني يوم…
ماينفعش بردو يكون الزوج محترم جدا وشايف أمور بيته كويس قوي والزوجة ماتقومش بواجباتها وتيجي تطلب طلب زي ده منه في حين إن هي مقصره ولسه غلطانه فيه وفي أهله ومطلعه عينه وعين اللي جابوه…
التشتت في العلاقة لا يمكن أن يتيح للزوجين إنهم يجتمعوا ببعض… والتشوه الحقيقي هو إن المجتمع مصدق إن تأدية الواجب الشرعي مافيش منها مشاكل أيا كانت الظروف…
في اللحظة دي إنت ممكن تجيب للدنيا طفل غير سوي نفسيا مؤذي نتاج لبيئة مؤذيه اتربى فيها… وتفضل مرتبط بشخص انت مش متقبله عشان “عايز حقك الشرعي”
وربنا شرع الطلاق في الحالات الميؤوس منها…
والدليل “الطلاق مرتان فإمساك بمعروفٍ أو تسريحٌ بإحسان”
تسريح بإحسان؟ يعني ايه يا منة الله؟
يعني الراجل يطلق مراته وتخلص عدتها ويسيبها في حالها لوجه الله من غير أذية…
طب ده مش خراب بيوت؟ انت عارف خراب البيوت ده نقوله امتى؟
نقوله لما البيت يكون كل يوم مولع والعياذ بالله ومايخلاش من الإهانة نفسية كانت أو جسدية…
لما طفل أو طفلة يكونوا موجودين على وش الدنيا شايفين أبوهم وأمهم بيهزئوا بعض قدامهم وشوية يروحوا هنا وشوية يروحوا هنا…
ده خراب البيوت الحقيقي…
وممكن يا سيد الكل أدعم لك المقال بكمان آيتين كريمتين من القرآن الكريم… ألا وهما
الأولى قوله تعالى “فأمسكوهن بمعروف أو فارقوهن بمعروف”
الثانية قوله تعالى “ولا تمسكوهن ضرارا لتعتدوا”
فحسبنا الله ونعم الوكيل في كل شخص ضلالي وهم الناس بمبادئ غلط ونسبها للدين…
الإسلام كرم الإنسان وكرم المرأة مش واقف ضدها…
إن كانت المرأة لا تريد الاجتماع مع زوجها… فحقها… ممكن تكون تعبانه… أو متخانقين…
كذلك الرجل عشان مش تقولوا اني عنصرية ضد الرجال… الرجل ممكن يكون تعبان أو عنده مشكله في شغله مضايقاه مش شرط بيخونك أو بقى مابيحبكيش…
لو مش هتعرفوا تودوا بعض في العلاقة ككل ما تكملوش…
طب معنى كلامك ان أي مشكلة بقى تحصل يبقى خلاص كده الموضوع خلص؟
لأ طبعا لا حياة تخلو من المشاكل…
لكن اتبعوا سنة النبي صلى الله عليه وسلم… لما كان بيتشاجر مع عائشة رضي الله عنها كان يقول “اللهم اغفر لها ذنبها وأذهب غيظ قلبها وأعذها من الفتن”
وكان بيود أهل بيته ويمازحهم…
فحتى في وجود المشاكل ماتبقاش/ماتبقيش قاسين القلب… وتجرحوا في بعض وناخد الموضوع عافية وند…
للأسف أكتر المتضررين هنا من الموضوع ده هم النساء… لأن الرجل بيستغل قوة بدنه والقوة الوهمية اللي مديهاله المجتمع في إنه يفرض نفسه على المرأة تحت بند حقي الشرعي…
حقك الشرعي لما تكون مراضيها مش منكد عليها وواخدها غصب لإرضاء رغباتك… هي مش عبد… وطرف في العلاقة زيها زيك لها الحق تقول نعم ولها الحق تقول لا… إلا لو كان الإعراض متكرر يبقى نعمل باللي قاله ربنا في القرآن بردو “واللاتي تخافون نشوزهن فعظوهن واهجروهن في المضاجع واضربوهن” وخليني أوضح لك ان واضربوهن معناها فارقوهن والدليل آية تانية سبحان الله في الكتاب يقول بها الله تعالى للعباد “فضرب بينهم بسور له باب باطنه فيه الرحمة” فالمقصود هنا المفارقة أو المقاطعة… مش اني امسكها اضربها واوديها المستشفى ملامحها مش باينه من كتر الضرب… مش من حقك تمد إيدك أو تتطاول باللسان… هي ماخرجتش من بيت أهلها معززة مكرمة إلا عشان تعززها وتهننها تاني ويمكن أكتر كمان…
اتكلمنا هنا عن الجانب الشرعي والأهم واتكلمنا عن الجانب المجتمعي… مش فاضل غير الجانب القانون والجانب النفسي
هل في أي قوانين تدين الزوج في حالة “الاغتصاب الزوجي”؟
هقولك في مصر حسب المادة 267 من قانون العقوبات “من واقع أنثى بغير رضاها يعاقب بالإعدام أو السجن المؤبد”
يعني مافيش نص صريح عن الزوجة هنا…
فممكن نقول رأيين… إما بالإيجاب أو السلب… يعني ممكن نقول إن الزوجة أنثى فيتحقق فيها شروط المغتصبه أو نقول إن الأنثى دي باستثناء زوجته…
فمافيش للأسف رأي واضح وصريح في المسألة دي…
طب الجانب النفسي للموضوع؟
أو أحد الأسباب اللي تخلي الشخص يغتصب زوجته أو يجبرها تكون معاه في الفراش؟
أقدر أقولك إن طبيعي ان الشخص اللي هيعمل كده غير سوي نفسيا…
–         ممكن يكون عقيم وعقمه مسبب له مشكلة في الثقة في النفس أو في رجولته على وجه خاص
–         المقارنة المستمرة… مقارنة المرأة الرجل برجال أخرى… في الهيئة أو الطباع… “اللي هو انا مش مالي عينك ولا ايه! طب اهو”
طب ما هي تستاهل … هقولك لأ… وهو كمان مايستاهلش يقل من نفسه ويتطاول افتكر “أو تسريح بإحسان” يطلقها… وساعتها نرفع له القبعة ونديله تحية على شهامته… مش انه يمد ايده أو يجبرها…
–         ممكن يكون الزوج مدمن مخدرات او مدمن للكحول وبيفقد عقله وبيتصرف غلط وبتهور بناءا على ده
–         دخول الشك قلب الزوج نتاج لسماعه آراء الأخوة اللي قاعدين معاه ع القهوة أو حد من أهله لعب في دماغه ومش واخدين بالهم كلهم إن الطعن في الشرف جريمة محرمة دينيا وقانونيا…
–         تربية الزوج من ولادته تربية غير سوية… بيتربى على العنف وشاف أبوه بيضرب أمه فعمل زيه… وبقى شخص عنيف وقاسي في المطلق مش ساعة العلاقة بس
–         تعظيم الأنا عند الرجل من صغره بردو لها تأثير عليه في الكبر… انت تعمل اللي انت عايزه… فبقى مش شايف أي حد في العلاقة غير نفسه حرفيا…
وأسباب أخرى لكن أنا ذكرت لكم منها الشائع…
وبناءا عليه…
أنا هراجع معاك شوية حلول لمشكلة زي دي…
–         لو مش هتضمن لزوجتك المستقبليه قبل ما تقع في غلطة عمرك إنها تعيش آمنة مطمئنه معاك ما تتجوزش…
–         لو أهلك أجبروك على الجواز… ما تتجوزش… أنا شايفه أسرة بايظة من بعيد اهو… آه والله زي ما بقولك… اوعى تتهور انت اللي في ايدك القرار…
–         نفس الشئ للبنت لو أهلك أجبروكي على الجواز وما ارتحتيش للشخص ماتقبليش… ولو حصل مشاكل واعتدوا عليكي بالضرب تقدري تبلغي البوليس… الله! هعادي أهلي؟! لا انتي بتحمي نفسك منهم… مبروك.
–         لو متجوز بقى ولا حول ولا قوة الا بالله يعني … فلو انت كويس ومتأكد من ده مش كلام بتقوله قدام الناس عشان تطلعها غلطانه… فطلقها وسيبها في حالها وربنا يعوض عليك… زي ما الشرع بيقول… ما تجبرهاش تفضل معاك وتكمل على مزاجك… نفكرك تاني ان الجواز طرفين… مش طرف واحد
–         لو انتي متجوزة بردو وجوزك بيطلبك في الفراش ومافيش أي توافق ما بينكم فاطلبي الطلاق… مارضيش وطلع كويس بس انتي رافضها… كلمي أهلك وحلوا المشكلة ودي من غير خناق وغلط… مارضيش وطلع سافل وضربك وقطعك وأجبرك على العلاقة تبلغي البوليس وانتي مضروبة كده… وتبطلي تقولي جوزك أبو عيالك ده لو في عيال عشان ما يكبروش يبقوا مشوهين زيكوا كده والعياذ بالله يعني … مافيش يبقى أحسن وما تحاوليش يكون في…
ونتقي الله في أزواجنا وزوجاتنا يا جماعه
وحل أخير قبل ما نتوكل على الله جميعا ونكمل توضيبة العيد… لازم يبقى في حملات توعوية بشكل دوري في جميع المحافظات خاصة في منطقة الصعيد والمناطق اللي بيسود فيها الجهل والعادات والتقاليد على الشرع والمنطق… ونسأل الله لنا ولكم السلامة.

رحلة النجاح تبدأ بخطوة : نصائح ذهبية لنجاح المرأة فى المجتمعرحلة النجاح تبدأ بخطوة : نصائح ذهبية لنجاح المرأة فى المجتمع

تبنّي عادات إيجابية

حان الوقت لكي تستبدلي عاداتك السلبية بعادات أكثر إيجابية مثلاً استيقظي باكراً، كوني أكثر تنظيماً، مارسي هواياتك، توقفي عن التدخين، مارسي الرياضة، اتبعي أسلوب حياة صحي هذه الأشياء ستساعدك بشكل غير مباشر على تحقيق النجاح.

إقرأ الموضوع كاملا
كيفية البحث عن المعلومات باحترافية : تعلم أسرار جوجلكيفية البحث عن المعلومات باحترافية : تعلم أسرار جوجل

كيفية البحث عن المعلومات يمكن للباحث الوصول إلى المعلومات بشكل فعال من خلال الوصول إلى مصادرها وتتعدد المصادر وفقاً السبيل الذي يخطوة الباحث حيث تعتبر هذه المصادر بمثابة وسيلة أو وعاء نقل المعلومات وهناك العديد من الطرق البحث عن المعلومات ومنها؛-

إقرأ الموضوع كاملا
كيف يمكن تعليم الطلاب المسؤولية الاجتماعية - حجر الأساس لمجتمع أفضلكيف يمكن تعليم الطلاب المسؤولية الاجتماعية - حجر الأساس لمجتمع أفضل

في الصف، يمكن للطلاب في الصف مناقشة القضايا الاجتماعية والأخلاقية، مثل الفقر والظلم، والتغير المناخي، هذا بالإضافة إلى أنه يمكنهم العمل على المشاريع المجتمعية مثل جمع التبرعات للجمعيات الخيرية أو مساعدة الأشخاص المحتاجين.

إقرأ الموضوع كاملا
مفهوم التربية الايجابية | كيف تربي طفلك تربية صحيحة؟مفهوم التربية الايجابية | كيف تربي طفلك تربية صحيحة؟

التربية الإيجابية هي ما تبحث عنه كل أم؛ لتنشئ طفلها على أسس سليمة في بيئة صحية ويكون مستقبله مشرقًا، بينما إذا قامت الأم ببعض الأخطاء أثناء التربية سيتأثر الطفل بشكل سلبي وستترك ندوبًا كثيرة في شخصيته ومستقبله. 

إقرأ الموضوع كاملا

 

مقترح لك ...

1 Comment

  1. عبدالرحمن

    فى كل مرة بتفاجئ بكتابتها العظيمة و إثارتها لتلك المواضيع بطريقة مميزة للغاية
    اتمنى النجاح و التوفيق لها دائما فيه مقالتها المتمبزة

Comments are closed.