طفل عنيد أم لديه إصرار ؟

طفل عنيد أم لديه إصرار ؟

طفل عنيد أم لديه إصرار ؟

طفل عنيد أم لديه إصرار ؟
كتبت : شيريهان جنينة

نتكلم على السن الاكبر (من ٣ سنين  ل ١١ ) قبل سن المراهقة
و نتكلم تحديدا عن صفة العند ( الطفل العنيد )
و نسال نفسنا شوية اسئلة
ايه هو العند ؟ ايه الفرق بينه و بين الاصرار؟
العند و الاصرار صفات كويسة و لا وحشة ؟  ايه المفروض ادعمه في ابني و ايه اللي عايزة اقلله؟  ايه اللي بيخلي الطفل يعند؟

📌ايه هو العند ؟
رفض و عدم تنفيذ المطلوب بدوووون تفكير ….او الاصرار على شئ برغم معرفة و “ادراك”  انه خطأ او خطر او غير مناسب ….وساعات بيكون رفض اي اقتراح من شخص معين حتى لو في قرارة نفسه موافق عليه
📌ايه الفرق بينه و بين الاصرار ؟
الاصرار :هو التصميم على شئ مع “”الاعتقاد”” انه صح و ملائم جدا للظروف المحيطة و عدم التخلى عنه بسهولة
📌ايه الفرق بينهم ؟ وادعم ايه و اقلل ايه؟
الاصرار صفة ممتازة في الطفل مفروض ندعمها ونشجعه عليها
و للاسف بنخلط بينها و بين العند فبتقل مع الوقت لعدم التصرف السليم معاها (حنشوف ده في المثال)
العند صفة مش كويسة …ان الانسان “”يدرك”” خطأ الشئ و يستمر عليه …بس مش بتقل بالعند مع الطفل…..بالعكس محتاج ثبات انفعالي و صبر واتفاقيات  و حنقول ازاي في المثال في اخر البوست
📌ايه اللي بيخلي الطفل عنيد ؟
يعني مثلا ممكن تعرضي عليه حاجة هو بيحبها اصلا و برضه تلاقي رافضها
يبقى عارف و “””مدرك””” ان الفازة زجاج و لو رمها حتتكسر و برضه يرميها على الارض

اللي بيخلي الطفل يعمل كدة حاجتين
١- العقاب على كل حاجة واي حاجة من غير مناقشة المشكلة و اسبابها و حلولها و تجربة الحلول مرة و اتنين و تقييم الحلول مع الطفل  و البحث عن حلول تانية افضل (للاسف اول حاجة  دمغنا بتروحلها هو العقاب …مع اننا مدركين انه مش حتعلم منه اي مهارات او خبرات في الحياة )
٢- لغي شخصية الطفل : اجبارة دايما على اختيار واحد و طريقة  واحدة لحل المشكلة و خطوات محددة يتبعها بدون مخاطبة عقله و لا معرفة رأيه
الحاجتين دول لو ركزنا فيهم شوية حنلاقي انهم مش حيوصلوا غير لحاجة من اتنين :
🚫طفل عنيد متمرد رافض كل حاجة حتى لو عايزها …مصمم على الغلط حتى لو “”مدرك”” انه غلط
🚫او طفل شخصيته ضعيفة منتظر من امه تعمله كل حاجة …خايف يغلط لا يتعاقب و مستني الاوامر عشان ينفذها من غير تفكير
طيب يعني اعمل ايه اسيب ابني يغلط ؟؟؟؟؟
ده يجبنا للمثال
“ابني مصمم انه يفضل في النادي ميروحش”
١- نحلل الموقف
✴ هو مصمم …يعني هو عايز فعلا يقعد عشان مبسوط و عايز يفضل مبسوط ….مش بيعند معاكي و قاصد يغلس عليكي و يكسر كلامك لما قولتليه نروح (فده إصرار مش عند)
✴ هو مش فاهم و لامدرك ليه لازم نروح …محنا مبسوطين هنا ….ممكن يكون فاهم اننا لازم ننام و الدنيا بقيت ليل و في مدرسة بكرة
بس مش “”مدرك”” ايه عواقب انه ميروحش
✴ده الفرق ان واحد عارف حاجة …عارف معلومات …بس مش مدرك خطورتها او اهميتها …وعشان كدة كنت بركز على كلمة “””مدرك””” من اول  البوست ….مكن نعرف معلومة بس مندركهاش
٢- ايه المطلوب؟
استخدام اساليب مناسبه لاقناعه اننا نروح باقل قدر من المشاكل و نوبات الغضب و الشد والجذب بين الام و ابنها (يعني حنروّح برضه مش حنسمع كلامه و نضيع معاد النوم(حزم) …بس بدون منحسسه اننا ضده و قاصدين نضايقه (تعاطف) )
٣- بعض الحلول المقترحة
✴ تعريف مشاعره : حبيبي انت زعلان عشان احنا مروحين …ديه فعلا حاجة تزعل …انا حاسة بيك
✴ ذكر موقف مقارب من الطفولة: انا كمان و انا صغيرة مكنتش ببقى عايزة اروح من الفسحة
✴ اعطاء مهلة :ممكن اسيبك تلعب شوية بس مش كتير
✴ اعطاء اختيارات : عايز تفضل 5 دقايق و لا 10 دقايق؟ …لما يخلصوا تيجي انت تقولي و لا اجيلك انا اقولك ؟ (او مش عارف في الساعة قوليله لما العقرب الكبير ده يجي على الرقم ده …او لما الرقمين دول يبقوا 00 على الموبيل ) …تحب نجري لحد العربية و لانمشي
✴ استخدام روح الفكاهة : يلا نعمل سباق مين حيوصل للعربية الاول (بس ميكونش بيعيط و تهزري…استنى لما يهدى شوية)
✴ الالهاء : ايه رايك لما نرجع نجيب فيلم نشوفه مع بعض قبل مننام ….او نحكي قصة ..او نتكلم مع بعض شوية في السرير قبل النوم
ملحوظات :
✴ممكن ننفذ من الحلول اللي يناسب ابننا مش لازم كلهم بس تعريف المشاعر اساسي قبل  اي حل تاني (بيهدي بنسبة 80% )
✴ لو مش عارفين ايه المناسب لابننا ….كل مرة نجرب حاجة او ٢ لحد منعرف ايه اللي بيناسبه اكتر
اسفة على الاطالة😒😒
احكولي على موقف مع ولادكم كنتم شايفينوا “”عند””و بعد البوست ده اكتشفتم انه “”اصرار””
اكتبوها في الكومنتات ✏✏

Tagged , , , , , , , , , , , , , , , , , , , , , , . Bookmark the permalink.

Comments are closed.