Menu Close

ما لا تعرفه عن الإحتراق البشري الذاتي

human internal burning
human internal burning
ما لا تعرفه عن الإحتراق البشري الذاتي
كتبت: منه زين

Read the article in English


قوى الاحتكاك والقوى الكهربية معروف عنهم إنهم مصادر اشتعال ومؤثرات شديدة ممكن تسبب خساير فادحة…
طب فكرك ان البني ادم الضعيف اللي مخلوق من طين ممكن يكون له تأثير مماثل زي القوى اللي ذكرناها فوق؟
مبتكلمش هنا عن مدى كفائته في تسخير كل شئ حواليه في سبيل تحقيق غاية سواء شر أو خير لأ…
بتكلم هنا عن قدرة مختلفه حبتين، حاجه كده مش مألوفة، حاجه هو نفسه م كانش حاسس بوجودها قبل ما يبقى في عواقب.
تعالوا اديكوا فكرة عن ظاهره اسمها “الاحتراق البشري الذاتي / spontaneous human combustion”
ومن الاسم نقدر نحدد ان الظاهرة دي تحدث من تلقاء نفسها بدون مؤثر خارجي، زي stereotype اتكررت قدامنا في البرامج التليفزيونية وفي قصص مصورة وغيره من المصادر اللي الإنسان ممكن يطلع عليها ألا وهي التدمير الذاتي للروبوت مثلا…
“بسم الله الرحمن الرحيم قررت أدمر نفسي ….”

من زمان وانا بفكر أكتب عن المحتوى ده وأترجمه كمان
وحابه أقول إني بكتب المقدمة دي ومنبهي لسه مرنش يعني المفروض دلوقتي أكون نايمه أساسا
بس طقت ف دماغي أجهز محتوى غريب لأن كالعادة كل غريب ملفت، وأطرح تساؤلات حتى لو مالهاش إجابة دلوقتي …
فاستمتعوا بكل حاجه هكتبها هنا قدر المستطاع وللعلم كل دي نظريات غير مثبته يعني كل واحد هبد الهبده اللي شايفها منطقية من وجهة نظره فأنا مش جايه أتكلم عن حاجه مسلّم بيها كلهم يندرجوا تحت بند الغير منفي والغير مثبت يعني يقعوا ف دائرة الشك لا انت هنا ولا انت هنا انت ما بين البينين
لكن الحوادث كلها حقيقية المصدر أو السبب نفسه اللي مش مفهوم. وللعلم بردو كل شئ يحتمل الشك، في كام نظرية مثبته تم نفيها مع الوقت؟ اعتقد الموضوع مسألة وقت صح؟ دوامة يابوووي.
واستعنا ع الشقا بالله، صلوا بينا ع النبي عشان هحكيلكم قصتين ع السريع كده…
⬅️ ديسمبر، سنة 1885، في أحد المنازل الريفية في الولايات المتحدة …
استهلكت “ماتيلدا روني” وزوجها “باتريك” قدر كبير جدا من الخمرة الليلة اللي قبل عيد الميلاد..
واتعرفوا هم الاتنين إنهم مدمنين على الكحول بشكل عام وإن دي مش المرة الأولى اللي يتقلوا فيها
فانت متخيل شخص مروق على روحه وبكره العيد وبتاع ومره واحده وهو واقف في المطبخ يحصل له الظاهرة الغريبة دي من غير أي مقدمات معروفة حتى الآن!
ده بالظبط اللي حصل لماتيلدا وكان الجسم كله ما عدا رجليها في حالة هلاك تام ..
واتأثر زوجها بالدخان في الأوضة اللي كان قاعد فيها فاتخنق ومات بعدها على طول.
التحقيقات ما لقيتش أي مؤثرات خارجية يستشهدوا بيها في القضية. فكركوا اتقفلت على كده؟
هو العلماء هيسكتوا؟ لا طبعا …
كل قضية اتفتحت على مر الزمان كانت ولا تزال محل بحث والإنسان هيفضل طول عمره في صراع
عشان يحط لنفسه بصمة في التاريخ فبيحاول بقدر الإمكان ما يضيعش منه فرص…

 

 

⬅️ تاني حادثة هحكيها حصلت في يوليو سنة 1951، ولاية فلوريدا …
“بانسي كاربنتر” دقت باب “ماري ريسر” الأرملة اللي عندها 67 سنة ..
وده مش عشان في بينهم عشم والعواف يا أختي وقلت أجي اشرب معاكي كوباية شاي والكلام ده لا..
ده عشان هي كانت جايه توصلها برقية عادي ولما لقت فيه حرارة طالعة من الباب قلقت وقررت تبلغ السلطات خصوصا لما “ماري” ما فتحتش.
الشرطة لما دخلت البيت لقت البيت مافيهوش أي أضرار حتى الجرايد اللي كانت جنبها لا تشوبها شائبة،
على الرغم من ده كله ما اتبقاش من “ماري” غير عمودها الفقري والجمجمة ورجل واحده ما اتأثرتش نهائي…!
وبعد ما الأدلة وصلت الFBI “المباحث الفيدرالية” ما كانش في أيديهم غير بقايا ازاز و6 قطع صغيره افتكروها سنانها ..
بس اتضح انها أجزاء من السجادة وحذائها اللي كان في رجلها السليمة، مرات ابنها قالت إن كان في سجارة واقعه على حجرها ..
والأرض والكرسي وكل حاجه زي ما هي .. هو يمكن دهونها اللي ساعدت على الاشتعال .. وهناخد الورث امتى وكده؟ ههه
لا دي من عندي مش موجوده في التقارير….
وآدي يا سيدي تاني حادثة أدهشت المحققين والأطباء على حد سواء…
⬅️ نيجي للتفسيرات بقى، حيث إن كل عالم طلع قال للتاني أي حد فيكوا فاكر نفسه صح امه رقاصة …
عندنا فرقتين، عندنا إيه؟ فرقتين…. عال..
الفرقة الأولى بتحاول تثبت ظاهرة الاحتراق الذاتي باستماتة .
والفرقة التانية بترد تقول لا ما احنا نتكلم بالمنطق كده – يعني بالله عليكوا في شخص ممكن يتفحّم بالمنظر ده من غير وجود أي عوامل خارجية تؤثر عليه؟
مستحيييييييل.
وده شيء منطقي، بس أعتقد إن مش كل الظواهر هتخضع للمنطق أحيانا صح؟
وأي منطق أساسا اللي احنا بنفكر فيه؟
ما كل شخص ليه منطقه .. حلوه كل شخص ليه منطقه دي..
وبناءا على كده لازم نسيب للخوارق مساحتها شوية وندي للحوادث النادرة قيمتها كده ونرحب بيها ترحيب كامل بس من غير ما نثق فيها ثقة عمياء..
زي ضيف دق بابك الساعة 11 بليل عايز كوباية مياه وبينهج ، أو عامل نفسه بينهج، فاهمني؟
هي الفكرة في كده سيب لكل حاجه مساحتها مش مطلوب منك تنفي أو تثبت سيب مجال بس للاستيعاب إن في إمكانية لحدوث أي شيء أيا كانت الكيفية.
 
🚩 العالم آرنولد رفع إيده وقال أنا أقولك ازاي ممكن يحصل حاجه زي كده، الناس قالوا له ازاي …
فرد قال عجبني السؤال (وزن وقافية ومدلعاكوا أهو)
الموضوع يا أصدقائي وما فيه إن جسم الإنسان ممكن يكون عنده قابلية للإشتعال تحت ظروف معينة زي زيادة نسبة الكحول في الدم ..
(فاكرين أول حالة اتكلمت عنها؟) وإن ممكن بردو الضغط الشديد هو السبب ..
وقالك إن مش بالضرورة إن الاشتعال يحصل باللجوء للأكسجين الخارجي اللي بنتنفسه ده عشان يتفشى في جميع أنحاء الجسم عشان ممكن ما يكونش نتيجة تفاعل أكسدة واختزال
🚩 راح الباحث جو نيكل طالع قايله انت حمار
🚩 طلع لك واحد كده بيفكرني بالظبط بالشخص الرخم اللي بيبقى واقف معاكوا وانتوا بتدوا اوردر وكلكوا طلبتوا مثلا شاورما فراخ مع تومية وبطاطس وهو الوحيد اللي طالب شاورما لحمة فتفضلوا تدوروا في الكياس ع الاوردر بتاعه وليلة سود …
الشخص الرخم ده بقى اسمه “مايكل هاريسون”
أو مش رخم هو راجل صاحب وجهة نظر وقرر يحط التاتش بتاعه ويهبد زي اللي فوق وقالك إن ده بسبب قوة شيطانية…
✅ وفي بعض الأسباب الأخرى التي تم ذكرها كمفسرات لظاهرة الإحتراق الذاتي البشري زي:
  • إن التدخين عامل من عوامل اندلاع الحرائق وده لأن السيجارة بعد م بتفضل فترة ع المكان اللي هي اترمت فيه المكان ده بيبدأ يتأثر بيها وبالتالي بيتحرق.
  • تاني سبب ممكن هو الدهون، مش لوحدها، ناخد بالنا ها! بيقولك إن تواجد الدهون في الجسم أو افرازها بشكل مستمر على الهدوم مع وجود مصدر اشتعال
    بيبقى زي علاقة الوقود بالنار .. وده حسب نظرية ” wick effect تأثير الفتيل”
وبكده يا إخواتي أكون اديتكوا فكرة عن حاجة ممكن مش كلكم عارفها
وبعد اذنكوا آخد فرصتي أنا كمان واحط نظرياتي جنب اخواتي العلماء اللي فوق دول، يعني هي جت على قرمط؟
مش يمكن خير اللهم اجعله خير كان في أطعمة معينة موجود فيها أي احماض؟
او سوائل ساعدت على عمليات الاشتعال الجبارة دي؟
اصلا هي الناس دي كانت مهمة عشان تستهدف؟ ده لو مستهدفي .. ولا يمكن عشان مش مهمة
استهدفت من قبل فئة معينة كانت عايزه تعمل تجربة علمية وتشوف إن كان لها فعالية ولا لا!
مش شرط يكون كان في حروب في الأوقات اللي زي دي …
يمكن ده كله كان تمهيد لحرب معينة جايز فشلت ساعتها !
طب انت متخيل إن شخص قاعد بيقرأ كتاب أو بيعزف مقطوعة موسيقية أو حتى لسه واكل ودخل ينام ..
ومره واحده يحس ان جسمه اللي هو فاكر ان له سلطان عليه بيهدده ويتسحب منه الراية فجأة ويتفحم بالمعنى الحرفي!
في أكتر من حالة بعيدا عن اللي ذكرتهم دول وكل حالة في حقبة مختلفة ..
كل شخص فيهم كان بيمارس نشاطات حياته عادي لحد م اتحول لشوية رماد يتكنس ..
جايز أي شيء…
وأخيرًا وليس آخرًا….. سلام عشان انا تعبت جدا وخلاص يعني كفاية تضحيات الناس نايمه وانا ع المخدة مفتحه عيني ع آخرها
“بسم الله الرحمن الرحيم قررت أكتب بوست علمي”
ادعوا لي وقولوا سبحان الله كتير سلام بجد المره دي
اكتسب مهارات التحفيز الذاتي : طريقك الأمثل لتحقيق النجاحاكتسب مهارات التحفيز الذاتي : طريقك الأمثل لتحقيق النجاح

في هذا العالم المتغير بشكل مستمر أصبح التحفيز الذاتي أكثر أهمية من أي وقت مضى، فالنجاح في أي مجال من مجالات الحياة يحتاج إلى قدرة الفرد على الاستمرار من أجل السعي لتحقيق الأهداف التي يسعى إليها في ظل الكثير من التحديات والعقوبات التي تواجهه.

إقرأ الموضوع كاملا
هذا هو تأثير التوتر النفسي على صحتك .. معلومات يجب أن تعرفهاهذا هو تأثير التوتر النفسي على صحتك .. معلومات يجب أن تعرفها

يوجد العديد من التأثيرات للتوتر، حيث أنها لا تقتصر على التوتر الأثر النفسي فقط بل هي تشمل أيضا العواطف، والمشاعر، والصحة النفسية ويوجد الكثير من الطرق التي يمكن من خلال اتباعها إدارة التوتر، ومدى تأثيره على الجسم في مختلف الجوانب

إقرأ الموضوع كاملا
كيف يمكنك المساهمة في الحد من التلوث الهوائي بسهولة وبدون تكلفة؟كيف يمكنك المساهمة في الحد من التلوث الهوائي بسهولة وبدون تكلفة؟

التلوث الهوائي، هو احد أنواع التلوث، ولكن يعتبر أخطرها، حيث يوجد له الكثير من التأثيرات السلبية، فهو يؤثر على البيئة، والإنسان، والاقتصاد، كما يوجد بعض الطرق التي يمكن اتباعها من أجل التقليل من حدة هذا التلوث.

إقرأ الموضوع كاملا
كيف تحقق أقصى استفادة من منصة مداد السحابية من نسيجكيف تحقق أقصى استفادة من منصة مداد السحابية من نسيج

منصة مداد السحابية من نسيج، هي منصة إلكترونية تعليمية قائمة بمبادرة وطنية لدعم التحول الرقمي في المنظومة والمؤسسات التعليمية الخاصة والعامة، كما أنها توفر النظم الرئيسية التي تساهم في رقمنة العمليات التعليمية والتشغيلية لهذه المؤسسات

إقرأ الموضوع كاملا
الإبستمولوجيا - نظرية علم المعرفة ودراسة تطوير العلومالإبستمولوجيا - نظرية علم المعرفة ودراسة تطوير العلوم

وهو مصطلح ذو أصول يونانية يتكون من كلمتين: إبستمي (episteme) ومعناها العلم، و لوغوس (logos) ومعناها النظرية أو الدراسة. وبالتالي فإنه حرفيًا يفيد نظرية العلوم أو دراسة العلوم.هذه الدراسة تحيل إلى نظرية المعرفة،

إقرأ الموضوع كاملا

مقترح لك ...